ក្រសួងមហាផ្ទៃ កោះហៅពលរដ្ឋបឹងកក់ចូលបំភ្លឺជុំវិញបណ្តឹងអំពើហិង្សា កាលពីឆ្នាំ ២០១៣
នាយកដ្ឋាននគរបាលព្រហ្មទណ្ឌនៃក្រសួងមហាផ្ទៃ នៅថ្ងៃទី ២៥ ខែ ឧសភា បានកោះហៅប្រជាពលរដ្ឋសហគមន៍បឹងកក់ ឲ្យចូលបំភ្លឺក្នុងនាមដើមបណ្តឹងដែលបានប្តឹងអាជ្ញាធរក្រុងភ្នំពេញថាប្រើអំពើហិង្សាលើរាងកាយ នៅក្រសួងមហាផ្ទៃ។ សូមបញ្ជាក់ថា កាលពីឆ្នាំ ២០១៣ ពលរដ្ឋសហគមន៍បឹងកក់និងបុរីកីឡាបានរួមគ្នាធ្វើកូដកម្មបង្អត់អាហារដើម្បីទាមទារដំណោះស្រាយដីធ្លីនិងដោះលែងសកម្មជនដីធ្លី រហូតធ្វើឲ្យមានការប៉ះទង្គិចគ្នាជាមួយក្រុមសន្តិសុខខណ្ឌដូនពេញ។សរ ពិសី រាយការណ៍៖
ចុះផ្សាយនៅថ្ងៃ៖
ស្តាប់ - ០១:៣១
រយៈពេលជិតបីឆ្នាំហើយ ចាប់តាំងពីការបង្រ្កាបដោយហិង្សាមួយលើអ្នកភូមិបឹងកក់ ខណៈដែលពួកគេបានធ្វើកូដកម្មអត់អាហារ នៅរមណីយដ្ឋានវត្តភ្នំ។ ជាការប៉ះទង្គិចគ្នា រវាងអ្នកភូមិបឹងកក់ ដែលបណ្តាលឲ្យ មនុស្សជាង ១០ នាក់ បានរងរបួស ធ្ងន់ និង ស្រាល នៅក្នុងនោះ ក៏មាន អ្នកឃ្លាំមើលសិទ្ធិមនុស្ស ជាជនជាតិបរទេសម្នាក់ផងដែរ។
នាយកដ្ឋាននគរបាលព្រហ្មទណ្ឌនៃក្រសួងមហាផ្ទៃ បានឲ្យដឹងថា នៅព្រឹកថ្ងៃទី ២៥ ខែ ឧសភា នេះ ដើមបណ្តឹងចំនួន ៥ រូប បានចូលបំភ្លឺ និង បំពេញសំណុំឯកសារ នៅក្នុងចំណោមដើមបណ្តឹងចំនួន ១១ រូប។
នីតិវិធីជាបន្តទៀត នាយកដ្ឋាននគរបាលព្រហ្មទណ្ឌនៃក្រសួងមហាផ្ទៃ នឹងកោះហៅអ្នកពាក់ព័ន្ធផ្សេងទៀត ដែលជាចុងបណ្តឹង មុននឹងបញ្ជូនសំណុំរឿងនេះទៅកាន់ សាលាដំបូងរាជធានីភ្នំពេញ នាពេលឆាប់ៗនេះ។
ដោយឡែក តំណាងអ្នកតវ៉ា អ្នកស្ត្រី ទេព វន្នី បានអះអាងថា នៅព្រឹកថ្ងៃទី ២៥ ខែ ឧសភា នេះ ប្រជាពលរដ្ឋសហគមន៍ចំនួន ៥ នាក់ បានចូលខ្លួនទៅបំភ្លឺក្នុងនាមជាដើមបណ្តឹង ជុំវិញបណ្តឹងអំពើហឹង្សារបស់អាជ្ញាធររាជធានីភ្នំពេញ។
យ៉ាងណាក៏ដោយ តំណាងអ្នកតវ៉ា រូបនេះ បានសម្តែងនូវក្តីបារម្ភថា ប្រជាពលរដ្ឋសហគមន៍បឹងកក់ជាជនរងគ្រោះ មិនរំពឹងថានឹងទទួលបានយុត្តិធម៌ពីប្រព័ន្ធតុលាការនៅកម្ពុជានោះទេ ព្រោះ ករណីនេះ បានកន្លងផុតទៅអស់រយៈពេលជិតបីឆ្នាំមកហើយ ទើបខាងក្រសួងមហាផ្ទៃ ចេញលិខិតកោះហៅពួកគាត់ឲ្យចូលបំភ្លឺ។
សូមបញ្ជាក់ថា នេះជាលើកទីមួយហើយ ដែលអ្នកភូមិបឹងកក់ ត្រូវបានក្រសួងមហាផ្ទៃ កោះហៅចូលបំភ្លឺ ពាក់ព័ន្ធករណីអំពើហឹង្សាក្បែរវត្តភ្នំ កាលពីឆ្នាំ ២០១៣។ ខណៈដែលភ្លាមៗ បន្ទាប់ពីអំពើហឹង្សាកើតឡើង ពួកគាត់ បានដាក់ពាក្យបណ្តឹងទៅកាន់ សាលាដំបូងរាជធានីភ្នំពេញ និង ក្រសួងមហាផ្ទៃ ប៉ុន្តែ មិនមានអន្តរាគមន៍ណាមួយនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ