គណបក្សសង្គ្រោះជាតិថា គ.ជ.ប ដំណើរការជាវិជ្ជមាន
គណបក្សសង្គ្រោះជាតិ នៅថ្ងៃពុធទី២៧ ខែកក្កដានេះ បានបង្ហាញពីលទ្ធផលនៃកិច្ចប្រជុំគណៈអចិន្ត្រៃយ៍ជាប្រចាំថ្ងៃរបស់ខ្លួន។ ចំណុចទាំងនោះរួមមាន ការស្នើសុំរួបរួមជាមួយបក្សកាន់អំណាច ដើម្បីដោះស្រាយបញ្ហាពីខាងក្រៅ និងការចូលរួមបោះឆ្នោតរបស់គណបក្សប្រឆាំងជាដើម។ យ៉ាងណាក៏ដោយ ការលើកឡើងនេះ បានផ្ទុយនឹងអ្វីដែលលោកសម រង្ស៊ី ធ្លាប់បានបញ្ជាក់ថាវិបត្តិនយោបាយបច្ចុប្បន្នគឺជាយុទ្ធសាស្ត្រចង់បំផ្លាញការបោះឆ្នោត។
ចុះផ្សាយនៅថ្ងៃ៖
ស្តាប់ - ០២:២៤
គណបក្សសង្គ្រោះជាតិអះអាងថា គណៈកម្មាធិការជាតិរៀបចំការបោះឆ្នោតនាពេលនេះ បានដំណើរការជាវិជ្ជមាន ខណៈដែលលោកសម រង្ស៊ី ប្រធានគណបក្សធ្លាប់លើកឡើងថាការចាប់ខ្លួនមន្ត្រីគ.ជ.ប និងការគំរាមកំហែងផ្លូវតុលាកា ដែលហូរចេញពីវិបត្តិនយោបាយនាពេលបច្ចុប្បន្ន គឺជាការចង់បំផ្លាញដំណើរការបោះឆ្នោត។
លោកយ៉ែម បុញ្ញឫទ្ធិ អ្នកនាំពាក្យគណបក្សបានបន្តថា គណបក្សបានរៀបចំខ្លួនជាស្រេចសម្រាប់ចូលរួមការបោះឆ្នោត ក្រុមប្រឹក្សាឃុំ-សង្កាត់ និងការបោះឆ្នោតតំណាងរាស្ត្រនាពេលខាងមុខ។ ហើយ គណបក្សបានសម្រេចកែទម្រង់ស៊ីជម្រៅដល់ថ្នាក់មូលដ្ឋាន ដើម្បីជ្រើសរើសអ្នកឈរឈ្មោះបោះឆ្នោតឃុំ សង្កាត់ និងការបណ្តុះបណ្តាលអ្នកអង្កេតការណ៍។ ក្រៅពីនោះ គណបក្សប្រឆាំង ដែលមានអាសនៈ២២កៅអីនៅសភា បានជំរុញឱ្យពលរដ្ឋទាំងអស់ត្រូវចុះឈ្មោះបោះឆ្នោតថ្មីដែលគ.ជ.ប នឹងផ្តើមយុទ្ធនាការចុះឈ្មោះចាប់ពីខែកញ្ញា រហូតដល់ថ្ងៃទី២៩ វិច្ឆិកា២០១៦។
សូមរំលឹកថា លោកសម រង្ស៊ី ប្រធានគណបក្សសង្គ្រោះជាតិ ដែលកំពុងនិរទេសខ្លួននៅបរទេស ធ្លាប់បានលើកឡើងថា ក្នុងសន្ទរកថាកាលពីថ្ងៃទី២៩ មិថុនានៅប្រទេសហ្វីលីពីនថា ក្នុងវិបត្តិនយោបាយនាពេលបច្ចុប្បន្ន មន្ត្រីសង្គមស៊ីវិល ចាប់ខ្លួនមន្ត្រីជាន់ខ្ពស់គ.ជ.បលោកនីចរិយា និងលោករ៉ុង ឈុន សមាជិកក្បាលម៉ាស៊ីនគ.ជ.ប កូតាគណបក្សសង្គ្រោះជាតិត្រូវបាន ចាប់ខ្លួន និងកំពុងយាយីតាមប្រព័ន្ធតុលាការ។ សម្រាប់លោក សម រង្ស៊ី យុទ្ធសាស្ត្ររបស់បក្សកាន់អំណាច ដែលដឹកនាំដោយលោកនាយករដ្ឋមន្ត្រីហ៊ុន សែន គឺកំពុងបំភ័ន្តភ្នែកអន្តរជាតិទៅលើយុទ្ធសាស្ត្របំភិតបំភ័យនិងបង្ករឿងរបស់ខ្លួន ដើម្បីចង់បំផ្លាញដំណើរការបោះឆ្នោត។ លោកគល់ បញ្ញា នាយកប្រតិបត្តិអង្គការជំនាញការបោះឆ្នោត ខុមហ្វ្រែល អះអាងថាដំណើរការរបស់គ.ជ.បសព្វថ្ងៃគឺមិនស្ថិតក្នុងភាពវិជ្ជមាននោះទេ ព្រោះថាអគ្គលេខាធិការរង និងសមាជិកកំពូលត្រូវប្រឈមនឹងប្រព័ន្ធតុលាការ។ វិធានការច្បាប់នេះ គឺជាការបំភិតបំភ័យពីសុវត្ថិភាពដែលគ.ជ.បនឹងមិនអាចដំណើរការដោយឯករាជ្យបាននោះទេ។
យ៉ាងណាក៏ដោយ អ្នកជំនាញការបោះឆ្នោតរូបនេះ បានមើលឃើញថាគ.ជ.ប កំពុងខិតខំធ្វើកិច្ចការងារបោះឆ្នោតរបស់ខ្លួន ដើម្បីកែលម្អឱ្យកាន់តែប្រសើរ ប៉ុន្តែកត្តាច្បាប់គឺជាអ្នករារាំងដល់កិច្ចខិតខំប្រឹងប្រែងទាំងនោះ។ ការរារាំងនោះគឺគ.ជ.ប មិនអាចឱ្យពលរដ្ឋនៅក្រៅប្រទេសចុះឈ្មោះបាននោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ