មនុស្សមួយក្រុមបានប្រកាសបង្កើតរដ្ឋាភិបាលខ្មែរនិរទេស
ក្នុងលិខិតកាលពីថ្ងៃទី ២៣ តុលា មនុស្សមួយក្រុម បានប្រកាសបង្កើតរដ្ឋាភិបាលនៅក្រៅប្រទេសមួយ ដែលមានមូលដ្ឋាននៅប្រទេសដាណឺម៉ាក។ ក្រុមទាំងនោះមកពី គណបក្សនយោបាយ រណសិរ្យរំដោះជាតិខ្មែរ ចលនានៃបក្សនយោបាយ សហគមន៍រងគ្រោះដីធ្លី សហគមន៍ខ្មែរកម្ពុជាក្រោម និងសហគមន៍ខ្មែរនៅជុំវិញពិភពលោកជាដើម។ ប៉ុន្តែរដ្ឋាភិបាលកម្ពុជានៅក្នុងស្រុក និងគណបក្សនយោបាយធំៗ បានប្រឆាំងចំពោះការប្រកាសបង្កើតនេះ។
ចុះផ្សាយនៅថ្ងៃ៖
ស្តាប់ - ០២:០០
មនុស្សមួយក្រុមមានគ្នាប្រមាណជាង ៥០នាក់ បានប្រកាសបង្កើតរដ្ឋាភិបាលខ្មែរនិរទេសនៅក្រៅប្រទេសមួយ ដែលមានសមាសភាពនាយករដ្ឋមន្ត្រី រដ្ឋមន្ត្រីក្រសួងការពារជាតិ និងប្រធានរដ្ឋសភាជាដើម។ នៅក្នុងលិខិត ដែលប្រព័ន្ធផ្សព្វផ្សាយទទួលបាន មនុស្សមួយក្រុមនេះ គឺសុទ្ធតែជាអ្នកនៅក្រៅប្រទេសហើយមនុស្សភាគច្រើន គ្មានអ្នកស្គាល់នោះទេ។ ដូចជានាយករដ្ឋមន្ត្រីឈ្មោះថាលោក សម សេរី ប្រធានសភាឈ្មោះក្រិច ស៊ីផន និងមានឈ្មោះនរោត្តម ច័ន្ទរង្ស៊ី ដែលត្រូវបានគេដឹងថាស្លាប់រួចទៅហើយជាដើម។
រដ្ឋាភិបាលកម្ពុជា បានអះអាងថា ការប្រកាសបង្កើតនេះ គឺជារឿងខុសច្បាប់ព្រោះថា ច្បាប់កម្ពុជាមិនអនុញ្ញាតឱ្យមានរដ្ឋាភិបាលពីរនោះទេ។ យ៉ាងណាក៏ដោយ លោក ទិត្យ សុធា អ្នកនាំពាក្យទីស្តីការគណៈរដ្ឋមន្ត្រីបានអះអាងថា រដ្ឋាភិបាលនឹងគ្មានប្រតិកម្មអ្វីលើការប្រកាសបង្កើតនេះទេ ព្រោះថាការប្រកាសតែលើក្រដាស ហើយគ្មានសកម្មភាព។ ប៉ុន្តែរដ្ឋាភិបាលរក្សាសិទ្ធិចាត់វិធានការលើក្រុមនេះ ប្រសិនបើមានសកម្មភាព ដូចជាបង្កើតកម្លាំង ឬធ្វើសកម្មភាពប៉ះពាល់ដល់អធិបតេយ្យភាពរបស់កម្ពុជា។
ដោយឡែកគណបក្សប្រជាជនកម្ពុជា ដែលជាបក្សដឹកនាំប្រទេសវិញ បានអះអាងថា ចេតនានៃការប្រកាសបង្កើតរដ្ឋាភិបាលនេះ គឺចង់បំផ្លាញសន្តិភាព និងស្ថេរភាពរបស់កម្ពុជា ដែលនៅក្នុងប្រទេស។ គណបក្សសង្គ្រោះជាតិវិញ ដែលជាបក្សធំទី២ បានស្នើឱ្យអ្នកដែលប្រកាសបង្កើតរដ្ឋាភិបាលនិរទេសនេះ គួរតែចូលក្នុងប្រទេសកម្ពុជា ដើម្បីប្រកួតប្រជែង ព្រោះថាកម្ពុជាមានច្បាប់ ហើយកម្ពុជាមិនត្រូវការរដ្ឋាភិបាលនិរទេសអ្វីនោះទេ។ នេះគឺជាការបញ្ជាក់ពីលោក យឹម សុវណ្ណ អ្នកនាំពាក្យរបស់គណបក្ស។
តាមសេចក្តីប្រកាសបង្កើតនេះ ក្រុមគណៈរដ្ឋមន្ត្រី ដែលមិនសូវលឺឈ្មោះនេះ បានស្នើឱ្យអន្តរជាតិ និងអង្គការសហប្រជាជាតិដាក់សម្ពាធដល់ប្រទេសវៀតណាម និងរដ្ឋាភិបាលកម្ពុជាឱ្យគោរពកិច្ចព្រមព្រៀងសន្តិភាពក្រុងប៉ារីស។ មិនត្រឹមតែប៉ុណ្ណោះក្រុមនេះ ក៏ចង់ឱ្យអង្គការសហប្រជាតិដកអសនៈរបស់រដ្ឋាភិបាលក្រុងភ្នំពេញចេញផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ