ថៃអនុញ្ញាតឲ្យកម្ពុជាបើកការិយាល័យផ្តល់ភាពស្របច្បាប់៥កន្លែងនៅលើខេត្ត៥របស់ថៃ
គណៈកម្មការផ្តល់ភាពស្របច្បាប់ដល់ពលករកម្ពុជា នារសៀល ថ្ងៃទី៦ ខែកុម្ភៈ ឆ្នាំ២០១៧ បានជួបពិភាក្សាជាមួយរដ្ឋមន្ត្រីក្រសួងការងារថៃ នៅទីស្តីការក្រសួងការងារថៃ។ វត្តមានរបស់គណៈប្រតិភូខ្មែរនៅប្រទេសថៃ ដែលដឹកនាំដោយលោក ហ៊ុន ម៉ាណែត កូនប្រុសលោកនាយករដ្ឋមន្ត្រីហ៊ុន សែន គឺដើម្បីស្នើសុំភាគីថៃសហការបង្កើនចំនួនការិយាល័យ និងលទ្ធភាពបង្កើនល្បឿនបើកផ្តល់លិខិតឆ្លងដែន លិខិតធ្វើដំណើរ និងប័ណ្ណពលករកម្ពុជាទៅធ្វើការនៅបរទេស (OCWC)ជូនដល់ពលករកម្ពុជា។
ចុះផ្សាយនៅថ្ងៃ៖
ស្តាប់ - ០២:២៦
ប្រទេសថៃបានឯកភាពអនុញ្ញាតឲ្យគណៈកម្មការផ្តល់ភាពស្របច្បាប់កម្ពុជាចុះធ្វើការបើកផ្តល់លិខិតឆ្លងដែន លិខិតធ្វើដំណើរ និងប័ណ្ណពលករកម្ពុជាទៅធ្វើការនៅបរទេស(OCWC)ជូនពលករកម្ពុជា ដែលធ្វើការនៅតាមរោងចក្រ សហគ្រាស ដែលមានប្រើប្រាស់ពលករកម្ពុជាចាប់ពី៨០នាក់ឡើងដោយផ្ទាល់។
ការសម្រេចរបស់ភាគីថៃដូច្នេះ បានធ្វើឡើងបន្ទាប់ពីមានជំនួបពិភាគ្សាមួយនៅក្រសួងការងារថៃ រវាងលោក ហ៊ុន ម៉ាណែត អនុគណៈកម្មការផ្តល់ភាពស្របច្បាប់ដល់ពលករកម្ពុជានិងរដ្ឋមន្ត្រីការងារថៃលោក Sirichai Distakul ។ ជាលទ្ធផល បន្ថែមពីលើការិយាល័យបើកផ្តល់ភាពស្របច្បាប់ ដែលមានស្រាប់នៅក្នុងស្ថានឯកអគ្គរាជទូតកម្ពុជាប្រចាំទីក្រុងបាងកក ភាគីថៃបានឯកភាពអនុញ្ញាតឲ្យកម្ពុជាបើកការិយាល័យ ផ្តល់ភាពស្របច្បាប់ចំនួន៥បន្ថែមទៀត ដែលមានទីតាំងស្ថិតនៅក្នុងខេត្តសាមុទ្ទប្រាកាន ឈុនបុរី ផាធុមថានី ឆាក់ឆុងសាវ និងខេត្ត រ៉ាក់យ៉ង។
ភាគីថៃនឹងជូនដំណឹងដល់កម្ពុជានូវទីតាំងទាំង៥កន្លែងថ្មីនោះ។
លើសពីនេះ ភាគីថៃនឹងអនុញ្ញាតដល់កម្ពុជា ចាប់ផ្តើមចុះប្រមូលទិន្នន័យ និងបញ្ជាក់សញ្ជាតិដល់ពលករកម្ពុជាដែលមានបណ្ណព័ណ៌ស៊ីជំពូឡើងវិញ ក្រោយពេលដែលការិយាល័យបើកផ្តល់ថ្មីទាំង៥នេះ ដំណើរការទៅដោយរលូន។ មួយវិញទៀត ការិយាល័យអន្តោប្រវេសន៍ថៃនៅគ្រប់ទីតាំងនឹងផ្តល់ទិដ្ឋាការស្នាក់នៅដល់ពលករកម្ពុជាទាំងឡាយណា ដែលមានបណ្ណព័ណ៌ស៊ីជំពូស្របច្បាប់ និងទទួលបានលិខិតឆ្លងដែន លិខិតធ្វើដំណើរ និងប័ណ្ណ OCWCពីគណៈកម្មការផ្តល់ភាពស្របច្បាប់របស់កម្ពុជា។
ជាមួយគ្នានេះ ភាគីទាំង២បានបង្កើតក្រុមការងារចំពោះកិច្ច១ ដើម្បីរៀបចំផែនការសកម្មភាព អនុវត្តនូវស្មារតីកិច្ចប្រជុំនាថ្ងៃនេះ ដោយកំណត់ពេលវេលាយ៉ាងយូរ១៥ថ្ងៃដល់ក្រុមការងារចំពោះកិច្ចនេះ ដើម្បីដាក់ចេញផែនការសកម្មភាពសម្រាប់អនុវត្ត។ សូមបញ្ជាក់ថាកិច្ចប្រជុំដើម្បីសម្រួលការងារបន្ថែមម៉ោង និងម៉ោងបំរើសេវាដល់ពលករកម្ពុជាដែលកំពុងបំរើការងារនៅប្រទេសថៃនៅពេលនេះ បានធ្វើឡើងបន្ទាប់ពី ក្រសួងការងារកម្ពុជាបានចេញសេចក្តីជូនដំណឹងកាលពីថ្ងៃទី៤ ខែកម្ភៈ ឆ្នាំ២០១៧ ទៅនេះ ក្នុងបំណងផ្តល់ភាពងាយស្រួលដល់ពលករកម្ពុជាធ្វើការនៅប្រទេសថៃ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ