អានតួអត្ថបទ
នាទីសុខភាពនិងអនាម័យ

តើ​គួរ​​​ចម្អិន​អាហារ​ បែបណា ទើប​អាច​ទាញ​ប្រយោជន៍​បាន​ច្រើន​ចំពោះ​សុខភាព ?

ចុះផ្សាយ​នៅ​ថ្ងៃ៖

ការ​ចម្អិន​ម្ហូបអាហារ​ មិន​មែន​ត្រឹម​តែ​មាន​ឥទ្ធិពល​ផ្តល់ជា​​រសជាតិ​​ខុស​គ្នា​ប៉ុណ្ណោះ​ទេ ប៉ុន្តែ​ក៏​មាន​តួនាទី​សំខាន់សុខភាព​ដែរ។ ការ​ចម្អិន​អាច​ធ្វើ​ឱ្យ​ចំណី​អាហារ​​តែ​មួយ​ ​ផ្តល់​ផល​ផ្ទុយ​គ្នាស្រឡះ​ចំពោះ​សុខភាព។ របៀ​បចម្អិន​ខ្លះ ផ្តល់​ផល​ល្អ ដោយ​អាច​រក្សា​​គុណភាព​អាហារ ទាំង​ខាង​រសជាតិ និង​ខាង​ជីវជាតិ ឯ​របៀប​ចម្អិន​ខ្លះ​ទៀត អាច​ឆ្ងាញ់​មាត់ តែ​បង្ក​គ្រោះ​ថ្នាក់​ធ្ងន់ធ្ងរ​ទៅ​ថ្ងៃ​អនាគត​សម្រាប់​សុខភាព។ តើ​របៀ​ប​ចម្អិន​អាហារណា​​ផ្តល់​ផល​ប៉ះពាល់​ដល់​ចំណីអាហារ និង​សុខភាព ?

ស្ងោ ឆា អាំង បំពង តើ​វិធី​ចម្អិន​មួយ​ណា​ល្អ​ជាង​ ?
ស្ងោ ឆា អាំង បំពង តើ​វិធី​ចម្អិន​មួយ​ណា​ល្អ​ជាង​ ? Christophe Carmarans / RFI
ផ្សាយពាណិជ្ជកម្ម

ផ្ទុយ​ពី​គំនិត​ធ្លាប់​គិត ការ​ចម្អិន​អាហារ​មិន​មែន​ត្រឹម​តែ​ផ្តល់​រសជាតិ​ម្ហូបអាហារ​​ខុសៗ​គ្នាទេ។ ថ្វី​បើ​ការ​ចម្អិន​អាច​ធ្វើ​ឱ្យមូលេគុល​ខ្លះ​ក្នុង​​ចំណី​អាហារ​បន្លែ​សាច់​ប្តូរ​ទម្រង់​ តែក៏​មាន​មូលេគុល​ខ្លះ​ទៀត​ងាយ​បរិភោគ ដូចករណី​ចំណីអាហារ​មាន​ផ្ទុក​ពពួក​សារធាតុ​សរសៃ​ច្រើន​ជា​ដើម។

នៅ​​​ពេល​ចម្អិន កម្តៅ​បាន​បណ្តោះ​វីតាមីន និង​សារធាតុ​រ៉ែ​ខ្លះ​​ដែល​មាន​បង្កប់​ក្នុង​ចំណីអាហារ​ ឱ្យ​ងាយ​រំលាយ​ក្នុង​សរីរាង្គ​មនុស្ស មាន​ជាអាទិ៍​ពពួក​វីតាមីន អា ដែល​មាន​ច្រើន​ក្នុង​​​ការ៉ុត និង​ប៉េង​បោះ។ នេះ​មាន​ន័យ​ថា​គួរ​តែ​ទទួល​ការ៉ុត​ឆ្អិន​ ប្រសិន​ចង់​ទាញ​បាន​វីតាមីន​អាបាន​​ច្រើន។
ប៉ុន្តែ​កម្តៅ​ក៏​អាច​បំផ្លាញ​វីតាមីន​បាន​យ៉ាង​ងាយ និង​ទៅ​តាម​កំរិត​ និង​រយៈ​ពេលចម្អិន​​ដែរ។ បើ​ការ​ចម្អិន​កាន់​តែ​យូរ និង​បើក​គំរប​ ឱ្យ​ត្រូវ​ខ្សល់​ទៀត​ នោះ​វីតាមីន​បាត់​បង់​ខ្លាំង ជា​ពិសេស​វីតាមីន សេ ដែល​មាន​ច្រើន​ក្នុង​បន្លែ​ស្ពៃ ផ្កាស្ពៃ និង​វីតាមីនបេ១ និង ៩។

របៀប​ចម្អិន​មាន​ច្រើន ស្ងោ ឆា ដុត អាំង បន្តោបង់​ខ្លាញ់ ចៀន ចំហុយ ... តើ​មួយ​ណា​ប្រសើរ​ជាង​មួយ​ណា ?លោក​អ្នកនាង​អាច​ជ្រើសរើស​ តាមការ​គួរ​ទៅ​តាម​ប្រភេទ​បន្លែ ត្រី​សាច់ នៅ​តាម​ការ​ចូល​ចិត្ត ! ​ការ​ណែនាំ និង​ទម្លាប់​របស់​​មនុស្ស​ចាស់ ដែល​មាន​ទម្លាប់​តាំង​ពី​ដូនតា​ ធ្វើ​តាម​ចំណាំ​ដើម្បី​បានម្ហូប​​ឆ្ងាញ់​មាត់ និង​​មាន​ឱជារស​នេះ​ តែ​ជា​វិធី​ដែល​រក្សា​បាន​ខ្ពស់​នូវ​អត្រា​រូបត្ថម្ភ។

ការចម្អិនក្នុងទឹក

ដាំ​ទឹក​ស្ងោ​ចម្អិន​អាហារ​ ផ្តល់​ប្រយោជន៍​ដ៏​ធំ​មួយ គឺ​កំរិត​ការ​ប្រើ​ខ្លាញ់។ ប៉ុន្តែ​ការ​ចម្អិន​ក្នុង​ទឹក អាច​នឹង​ធ្វើ​ឱ្យ​សារធាតុ​រ៉ែ​មួយ​ចំនួន​ ព្រមទាំង​វីតាមីន​ ជាពិសេស​វីតាមីនបេ និង​សេ រលាយ​បាត់​ទៅ​ក្នុង​ទឹក។​ ដូច្នេះ​ដើម្បី​រក្សា​វីតាមីន​និង​រ៉ែ​ ពី​បន្លែ​សាច់​ចម្អិន​នោះ​ ដំបូន្មាន​ដ៏​ល្អ គឺ​កុំ​ចាក់​ទឹក​ស្ងោរ​បន្លែ​ឬ​សាច់​នោះ​ចោល ត្រូវ​យក​វា​មក​ប្រើ​ប្រាស់​សម្រាប់​ធ្វើ​ជា​ទឹក​សម្ល ឬ​ជា​ទឹក​ស៊ុប​សម្រាប់​ម្ហូប​ផ្សេងៗ​ទៀត។ ត្រូវ​ដាំ​ទឹក​ឱ្យ​ពុះ​កញ្ជ្រោល​ខ្លាំង​សិន សឹម​បង់​បន្លែ​សាច់​ចូល ព្រោះ​កម្តៅ​ខ្លាំង​​មាន​តួនាទី​​ទៅ​បន្ទន់​ ឬ​បង្កក​ជាតិ​ស្ករ​លើ​ផ្ទៃ​នៃ​បន្លែ​ផ្លែឈើ ឱ្យ​ក្លាយ​ទៅ​ជា​ស្រទាប់​ការពារ ទប់​កុំ​ឱ្យបាត់​បង់​​ជីវជាតិ​បន្លែ​ផ្លែឈើ​ច្រើន​ពេក។ ចម្អិន​បន្លែ​ផ្លែឈើ ទាំង​សម្បក​ ក៏​ជា​មធ្យោបាយ​មួយ​ជួយ​កំរិត​កុំ​ឱ្យ​បាត់​បង់​វីតាមីន​ច្រើន​ពេក​បាន​ដែរ។ បើ​ស្តាប់​ការ​បក​ស្រាយ​នេះ ម្ហូបអាហារ​ សម្ល​ម្ជូរ​ ស្ងោ​ជ្រក់​ និង​របៀប​ស្ល​របស់​ចាស់​បូរាណ​ខ្មែរ ជា​ក្បួន​ធ្វើ​ម្ហូប​ដ៏​ប្រសើរ​ ឆ្ងាញ់មាត់​ហើយ​ចំណេញ​ដល់​សុខភាពទៀត។ ​​

ក្នុង​ករណី​ចម្អិន​សាច់​វិញ​ ស្ងោ​រំងាស់​វិញ ស្ងោ​យូរ​សាច់​ផុយ ក្រពះ​ស្រួល​កិន​ ប៉ុន្តែ​ជាតិ​អំបិល​ ជាតិ​រ៉ែ​ដ៏​ខ្ពស់​របស់​សាច់​ អាច​នឹង​ត្រូវ​បាត់​បង់​អស់​ទៅ​វិញ​ប្រមាណ​ពីរភាគបី បើ​ប្រៀប​ទៅ​សាច់​ស្រស់​ឆៅ។

អាំង

អាំង​ជា​ការ​ចម្អិន​បែប​សុខភាព​ព្រោះ​មិន​ត្រូវ​ការ​ប្រើ​ជាតិ​ខ្លាញ់ និង​ថែម​ទាំង​អាច​សម្រកបញ្ចុះ​​ជាតិ​ខ្លាញ់​ក្នុង​អាហារ​បាន​ទៀត​ផង​។ យើង​អាច​អាំង​សាច់​ ជា​ពពួកសាច់​​មិន​សូវ​មាន​ខ្លាញ់​ដូច​ជា​សាច់​មាន់ ទា ហើយ​កុំ​​​ទទួល​ទាន​ស្បែក ឬ​សាច់​ក្រហម​ដូច​ជា​សាច់​គោ សាច់ជាប់​ខ្លាញ់។ បើ​ជា​សាច់​ក្រក ល្បី​ខាង​មាន​ខ្លាញ់​ច្រើន គួរ​តែ​ចាក់​ស្បែក​បន្តិចពេល​អាំង នោះ​ខ្លាញ់​នឹង​ស្រក​ចេញ​មក​ក្រៅ​អស់​ច្រើន។ និយាយ​ជា​រួម គ្រប់​ម្ហូប​អាហារ មិន​ថា​សាច់ គោ ជ្រូក មាន់ ត្រី ឬ​បន្លែ​ទេ​ សុទ្ធ​តែ​អាច​ធ្វើ​​ការ​ចម្អិន​ដោយ​អាំងបាន​ទាំង​អស់ និង​បាន​ផ្តល់​រសជាតិ​ឆ្ងាញ់​ចម្លែក​ ព្រោះ​ក្រៀម​ខាង​ក្រៅ ទន់​ក្នុង​។

ប៉ុន្តែការ​អាំង​សាច់ ជាពិសេស​ការ​អាំង​ដោយ​ប្រើ​ភ្លើង​ធ្យូង ក៏​ជាប់​ឈ្មោះ​ល្បី​ខាង​បង្ក​ឱ្យ​មាន​ជំងឺ​មហារីក​ដែរ។ ការសិក្សា​ជា​ច្រើន​បាន​បង្ហាញ​ថា អ្នក​ចូល​ចិត្ត​ទទួល​ទាន​អាហារ​ដោយ​អាំង​ភ្លើង​បាប៊ីក្យូ មាន​គ្រោះ​កើត​ជំងឺ​មហារីក​ ប្រូស្តាត មាត់ និង​លំពែង។

​នៅ​ពេល​ខ្លាញ់​ស្រក​ចេញ​ពី​សាច់​ធ្លាក់​ទៅ​លើ​ភ្លើង​ ហើយ​ក៏បណ្តាល​ឱ្យមាន​អណ្តាត​​ភ្លើង​ឆេះ ឬ​ផ្សែង​ហុយ​ឡើង រុំ​សាច់​លើ​ចង្អើ។ ចំហេះ​និង​ផ្សែង​នេះ មាន​ជាតិ​ពុល​ខ្លាំង​ណាស់ ! សារធាតុ​ពុល​ដំបូង​គេ​បង្អស់ គឺ បេនហ្សូពៀរ៉ែន ដែល​គេ​សង្កេត​ឃើញ​មាន​នៅ​ក្នុង​ផ្សែង​បង្ហុយ​ចេញ​ពី​បំពង់​ស៊ីម៉ាំងឡាន ឬ​ផ្សែង​បារី។ បើ​សាច់​អាំង​មាន​ខ្លាញ់​កាន់​តែច្រើន​ នោះ​ហានិភ័យ​មាន​កាន់​ខ្ពស់។ សាច់ក្រក​មាន​ខ្លាញ់​ច្រើន​ជាង​ដុំ​សាច់​មាន់​ដល់​ទៅ​១០​ដង។

អ្នក​ស្រាវជ្រាវ​បាន​រក​ឃើញ​ទៀត​ថា ល្បាយ​ជាតិ​ពុល​ឡើង​កាន់​ខ្ពស់ នៅ​ពេល​កម្តៅ​ភ្លើង​ឡើង​កាន់​តែ​ខ្លាំង ហើយ​គឺ​ភ្លើង​ខ្លាំង​នេះ​ឯង​ដែល​ជា​អ្នក​បង្ក​ឱ្យ​មាន​ផ្សែង​ពុល​ហុយ​ឡើង មិន​ថា​នៅ​ពេល​អាំង​ឬ​នៅ​ពេល​ឆា​ទេ។ ដូច្នេះ​​ដើម្បី​អាច​ទាញ​ប្រយោជន៍​ផ្នែក​សុខភាព​បាន យើង​ត្រូវ​ចេះ​ប្រុង​ប្រយ័ត្ន​ និង​គោរព​តាម​ការ​ណែនាំ​ដូច​ខាង​ក្រោម ៖

នៅ​ពេល​អាំង ត្រូវ​អាំង​ឱ្យ​សាច់​ឆ្អិន​ដល់​ក្នុង។ ភ្លើង​អាំង​មិន​ត្រូវ​មាន​អណ្តាត ឆាប​ឡើង​ទេ ព្រោះ​វា​អា​ធ្វើ​ឆេះ​ខ្លោច ឡើង​ខ្មៅ​ផ្ទៃ​នៃ​សាច់។ ផ្សែង​និង​លម្អង​ខ្មៅៗ​នេះ ជា​ភ្នាក់ងារបង្ក​ឱ្យ​មាន​ជំងឺ​មហារីក​ខ្លាំងណាស់ ជាពិសេស​មហារីក​ក្រពះ។ យក​ល្អ គួរ​តែប្រលាក់​​​សាច់​ មាន​ដាក់​ក្រូចឆ្មារ ដើម្បី​ឱ្យ​វីតាមីសេ​របស់​ក្រូច​ឆ្មារ ជួយការពារ​ទល់​នឹង​ការ​ឡើង​សារធាតុ​ពុល។
ប្រសិន​បើ​អ្នក​ចូល​ចិត្ត និង​មិន​អាច​មាន​មធ្យោបាយ​អ្វី​ផ្សេង​ក្រៅ​អំពី​អាំង​ដោយប្រើ​ភ្លើង​​អុសធ្យូង សូម​ដាក់​ចង្អើរ​ឱ្យ​ឆ្ងាយ​/ខ្ពស់​ពី​រងើក​ភ្លើង យ៉ាង​ហោច ១០​សង់ទី​ម៉ែត្រ​ពី​ភ្លើង និង​លាង​ចង្អើរ​បាន​ស្អាតរាល់​​ក្រោយ​ពេល​អាំង​រួច។

អាំង​លើ​ខ្ទះ (មិន​ផ្ទាល់​លើ​ភ្លើង)

អាំង​លើ​ខ្ទះរាប គឺ​ជា​ដំណោះស្រាយ​ដ៏​ល្អ ទាំង​ផ្នែក​របប​អាហារ​និង​ជីវជាតិ ព្រោះ​អាហារ​ត្រូវ​ឆ្អិន​ដោយ​ទឹក​ជោរ​ចេញ​ពី​សាច់ ឬ​បន្លែ​ខ្លួន​ឯង ដោយ​មិន​បាច់​ប្រើខ្លាញ់​។ ប្រសិន​បើ​សាច់​មាន​ខ្លាញ់​ច្រើន​នោះ ខ្លាញ់​នឹង​ហៀ​អាច​ជូន​ចេញ​បាន។ ឆ្អិន​លឿន ឆាប់ អាច​រក្សា​រស​ជាតិ​បាន​ល្អ ហើយ​សារធាតុ​អំបិល​រ៉ែ ព្រមទាំង​វីតាមីនខ្លះ ​មិន​ឱ្យ​បាត់​បង់។ មាន​ន័យ​ថា​បន្លែ​សាច់​អាច​រក្សា​គុណប្រយោជន៍​ផ្នែក​អាហារូបត្ថម្ភ​បាន​ច្រើន​ តាម​រយៈ​ការ​ចម្អិន​បែប​នេះ។
ចម្អិន​​លើ​ខ្ទះ​រាប​ មិនសូវ​មាន​ហានិភ័យ​ខ្លោច​​ខ្មៅ​សាច់​ទេ​ តែ​យ៉ាង​ណា​ក៏​ដោយ​ក៏សូម​កុំ​ភ្លេច​លាង​ខ្ទះ​រាប​ឱ្យ​បាន​ស្អាត​ពេល​អាំង​សាច់​រួច។

បន្តោរ​ ឬ​បំពង បង់​ខ្លាញ់

ដំឡូង​ចៀន ចេក​ចៀន ត្រី​ចៀន ត្រី​បំពង ចំណី​បង់​ខ្លាញ់​ជា​ទី​ពេញ​និយម​របស់​មនុស្ស​ភាគ​ច្រើន ឈ្ងុយ ស្រួយ ញ៉ាំ​ជក់​មាត់​ ប៉ុន្តែចំណី​អាហារ​ចម្អិន​របៀប​នេះ ក៏​បំផ្លាញ​សុខភាព​លឿន​ដែរ។ ដើម្បី​ចៀន ឬ​បំពង គេ​ត្រូវ​បង់​សាច់ បន្លែក្នុង​ខ្ទះ​ខ្លាញ់ ដ៏​ក្តៅ​គគុក ដែល​មាន​សីតុណ្ហភាព​ឡើង​ដល់​ ១៤០ ទៅ ១៨០​អង្សារ។

ចម្អិន​ដោយ​កម្តៅខ្ពស់​ខ្លាំង គឺ​ជា​កត្តា​ដែល​នាំ​ឱ្យ​មាន​​លេច​ឡើងនូវ​ម៉ូលេគុល​ម្យ៉ាង​មាន​សក្តានុពល​ខ្លាំង​ក្នុង​ការ​បំផ្លាញ​សុខភាព។ ការ​​ស្រាវជ្រាវHeatox របស់​​ប្រទេស​ជា​ច្រើន​នៅ​អឺរ៉ុប និង​នៅ​លើ​ពិភពលោក ​កាលពី​ឆ្នាំ​ទៅ ​បាន​ផ្ចង់​ការ​សិក្សា​យ៉ាង​យូរ​និង​ស៊ីជម្រៅ​អំពី​ដំណើរ​​ ចម្អិន​អាហារ​បង់​ខ្លាញ់​ក្តៅ​ខ្លាំង​នេះ បន្ទាប់​ពី​បាន​រក​ឃើញ​ជាតិ​អាគ្រីមីតនៅ​ក្នុង​ដំបូង​ចៀន។ អាគ្រីមីត​ជា​ធម្មតានិង​​ជា​ទូទៅ​ឃើញ​មាន​នៅ​ក្នុង​គ្រឿង​ផ្លាស្ទិកប៉ុណ្ណោះ។​ បើ​តាម​គិត​ស្មាន​របស់​ហៀតុក​ ដើម្បី​កុំ​ឱ្យ​​​ជាតិ​អាគ្រីមីតលេច​ចេញ​ក្នុង​ចំណី​អាហារ គេ​គួរ​តែ​កុំ​ចំអិន​ចំណី​អាហារ​ណា​ដែល​សម្បូរ​ជាតិ​ក្លុយស៊ីត​ ខ្លាំង​ដូច​យ៉ាង​ដំឡូង​បារាំង​ ឱ្យ​ឆ្អិន​ជ្រុល​ពេក និង​ក្នុង​កម្តៅ​ក្តៅ​ពេក​ឱ្យ​សោះ។

ខ្លាញ់​ដែល​បាន​ឆ្លង​កាត់​ការ​ចៀន​ បំពង​ហើយ​ ត្រូវ​តែ​ច្រោះ ត្រង​យក​កាស​សំណល់​កម្ទេច​កម្ទី​ចេញ​ឱ្យ​អស់ រួច​យក​ទៅរក្សា​​ទុក​​ក្នុង​ទី​ងងឹត។ សូម​កុំ​ប្រើ​​ខ្លាញ់​សល់​ យ៉ាង​ច្រើន​បំផុត​៥​ទៅ​៦​ដង​។ ការ​បំពង សម្រួល​ឱ្យ​ឆាប់​មាន​អាស៊ីត​ខ្លាញ់​បំផ្លែង និង​ជាពិសេស​ប្រសិន​បើ​ខ្លាញ់​នោះ​ត្រូវ​យក​មក​ប្រើសារ​ហើយ​សារ​ទៀត​ច្រើន​ដង។ អាស៊ីត​ខ្លាញ់ គឺ​ជា​ភ្នាក់​ងារ​បង្កើន​ហានិភ័យ​កើត​ជំងឺ​​សរសៃ​ឈាម​បេះដូង​ខ្លាំង​ណាស់។ ហើយ​សូម​ចង​ចាំ​បន្ថែម​ទៀត​ថា បំពង​ចំណី​អាហារ គឺ​ស្មើ​នឹងបង្កើន​​បរិមាណ​កាឡូរី​របស់​ចំណី​អាហារនោះ​ឱ្យ​​កើន​ឡើង​យ៉ាង​ខ្លាំង​តែ​ម្តង។

គោរព​ក្បួន​អនាម័យ ចំអិន​អាហារ​ដោយ​អាំង​កុំ​ប៉ះ​ផ្សែង ឬ​អាំង​ផ្ទាល់​លើ​ខ្ទះ មិន​ប្រើ​កម្តៅ​ភ្លើង​ខ្លាំង​ ព្រមទាំង​ទទួល​ទាន​អាហារ​បំពង​ខ្លាញ់​សម​រម្យ យើង​ពិត​ជា​អាច​ទាញ​ប្រយោជន៍​បាន​រស​ជាតិ​អាហារ​ឆ្ងាញ់​មាត់​ផង និង​មាន​សុខភាព​ល្អ​ជាក់​ជា​ប្រាកដ៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

មើលវគ្គផ្សេងទៀត
រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ