រដ្ឋាភិបាលតែងតាំងការងារច្រើនបន្ថែមឱ្យលោកប៊ិន ឈិន
លោកនាយករដ្ឋមន្ត្រីហ៊ុន សែន បានចុះហត្ថលេខាលើសេចក្តីសម្រេចមួយកែសម្រួល និងកំណត់ភារៈកិច្ចឱ្យលោក ប៊ិន ឈិន ដែលជារដ្ឋមន្ត្រីស្តីទីនៃគណៈរដ្ឋមន្ត្រី។ ក្នុងលិខិតដែលអ្នកសារព័ត៌មានទើបតែទទួលបាន ប៉ុន្តែបានចេញកាលពីថ្ងៃទី ២៧មីនានោះ លោកប៊ិន ឈិនមានមុខងារជាច្រើនដែលសុទ្ធតែជាការងាររបស់លោកសុខ អាន អតីតរដ្ឋមន្ត្រីទទួលទីស្តីការគណៈរដ្ឋមន្ត្រី។
ចុះផ្សាយនៅថ្ងៃ៖
ស្តាប់ - ០២:២៥
មានមុខនាទីជាច្រើនដែលលោកនាយករដ្ឋមន្ត្រីហ៊ុន សែនបានប្រគល់ឱ្យលោកប៊ិន ឈិនដើម្បីជួយដោះស្រាយការងារប្រចាំថ្ងៃរបស់ប្រមុខរដ្ឋាភិបាលបន្ទាប់ពីមរណៈកាលរបស់លោកសុខ អាន។ ការងាររបស់លោកប៊ិន ឈិនរួមមាន ទទួលបន្ទុកប្រចាំការដោះស្រាយការងារប្រចាំថ្ងៃជំនួសនាយករដ្ឋមន្រ្តី សម្របសម្រួលកិច្ចការសម្រាប់គណៈរដ្ឋមន្រ្តី នាយករដ្ឋមន្រ្តី និងបណ្តាឧបនាយករដ្ឋមន្រ្តី។ ក្រៅពីនេះ លោកប៊ិន ឈិនក៏នឹងត្រូវទទួលបន្ទុកការងារតាមដានសម្របសម្រួលដំណើរការតុលាការកាត់ទោសអតីតមេដឹកនាំខ្មែរក្រហមផងដែរ។ លោកប៊ិន ឈិនក៏ទទួលសិទ្ធិពីនាយករដ្ឋមន្រ្តី ក្នុងការពិនិត្យ និងសម្រេចលើការងាររបស់ «ច្រកចេញ-ចូលតែមួយ» នៃក្រុមប្រឹក្សាអភិវឌ្ឍន៍កម្ពុជា ប៉ុន្តែការងារនេះលោកប៊ិន ឈិននឹងសុំការណែនាំ ឬការសម្រេចពីលោកនាយករដ្ឋមន្ត្រីលើការងារដែលមានវេទយិតភាពខ្ពស់។
បន្ថែមពីការងារខាងលើ រដ្ឋមន្ត្រីស្តីទីរូបនេះនឹងទទួលសិទ្ធិពីនាយករដ្ឋមន្រ្តីក្នុងការពិនិត្យ និងសម្រេចលើសំណើរស្មុំកូន និងការលាសញ្ជាតិ ហើយដោយឡែកការងារចាស់របស់លោកគឺដឹកនាំផ្ទាល់អាជ្ញាធរជាតិដោះស្រាយទំនាស់ដីធ្លីក៏ស្ថិតនៅក្រោមការគ្រប់គ្រងរបស់លោកដដែល។ ហើយលោកប៊ិន ឈិន នឹងទទួលបន្ទុកលើការងារដឹកនាំផ្ទាល់ក្រុមប្រឹក្សាអ្នកច្បាប់ និងការងាររៀបចំចម្លើយតបនឹងសំណួររបស់សមាជិករដ្ឋសភា ស្របតាមនីតិវិធីច្បាប់ ហើយចុងក្រោយគឺជួយការងារនាយករដ្ឋមន្ត្រីលើការងារបង្ការ ទប់ស្កាត់ និងប្រឆាំងអំពើពុករលួយ។ គួរបញ្ជាក់ថា លោកប៊ិន ឈិន ដែលជាឧបនាយករដ្ឋមន្ត្រីប្រចាំការ ត្រូវបានរដ្ឋាភិបាលតែងតាំងជារដ្ឋមន្ត្រីស្តីទីទទួលបន្ទុកទីស្តីការគណៈរដ្ឋមន្ត្រី នៅថ្ងៃទី ១៦ មីនាក្រោយមរណកាលរបស់លោកសុខ អាន កាលពីថ្ងៃទី ១៥ មីនាកន្លងទៅនេះ។
សូមរំលឹកផងដែរថា រដ្ឋាភិបាលកម្ពុជា ទើបបានផ្ទេរអាជ្ញាធរ និងគណៈកម្មការចំនួន ៥ឱ្យចូលទៅនៅក្រោមក្រសួងនីមួយៗវិញ។ ក្នុងនោះមានអាជ្ញាធរអប្សរា និងអាជ្ញាធរព្រះវិហារ ត្រូវទៅនៅក្រោមក្រសួងវប្បធម៌ គណៈកម្មការគ្រប់គ្រងផ្លូវដែក ត្រូវផ្ទេរឱ្យទៅនៅក្រោមក្រសួងសាធារណៈការ និងដឹកជញ្ជូន ក្រុមប្រឹក្សាគណៈវិស្វកម្មត្រូវប្រគល់ឱ្យក្រសួងការងារ។ ដោយឡែកក្រុមកាយរិទ្ធិរបស់ជាតិក៏ត្រូវផ្ទេរមកឱ្យក្រសួងអប់រំផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ