ទិវាសុខភាពពិភពលោក២០១៧ ឧទ្ទិសដល់ជំងឺធ្លាក់ទឹកចិត្ត
ចុះផ្សាយនៅថ្ងៃ៖
ស្តាប់ - ០៨:០៨
ទិវាសុខភាពពិភពលោក តែងប្រារព្ធធ្វើជារៀងរាល់ឆ្នាំ នៅថ្ងៃទី ៧ មេសា ដើម្បីជាការរំលឹកដល់ខួបនៃការបង្កើតអង្គការសុខភាពពិភពលោកឡើង និងដើម្បីឆ្លៀតឱកាសប្រមូលផ្តុំកម្លាំងគ្នាឧទ្ទិសដល់ប្រធានបទសុខភាពណាមួយជាប្រយោជន៍ដល់ពិភពលោកទាំងមូល។ នៅឆ្នាំ២០១៧នេះ អង្គការសុខភាពពិភពលោក សូមផ្តោតយុទ្ធនាការលើជំងឺធ្លាក់ទឹកចិត្ត។តើធ្លាក់ទឹកចិត្ត ជាជំងឺអ្វី ?
ជំងឺធ្លាក់ទឹកចិត្ត អាចកើតលើមនុស្សគ្រប់វ័យ នៅគ្រប់ប្រទេស នៅគ្រប់ជ្រុងនៃភពផែនដី ! វិបត្តិផ្លូវចិត្តបែបនេះបង្កឱ្យមានការបៀមទុក្ខព្រួយ និងអាចប៉ះពាល់ដល់កាយសម្បទារបស់មនុស្ស រំខានដល់ការរស់នៅប្រចាំថ្ងៃ ជួនអាចមានផលវិបាកធ្ងន់ធ្ងរ ដល់ទំនាក់ទំនងជាមួយគ្រួសារ ជាមួយមិត្តភក្តិ និងមិនអាចចេញទៅប្រកបរបរចិញ្ចឹមជីវិតបានទៀតផង។ កាន់តែអាក្រក់បំផុតទៅទៀត ជំងឺធ្លាក់ទឹកចិត្តអាចរុញច្រានឱ្យមនុស្សហ៊ានធ្វើអត្តឃាតខ្លួនឯង។ ការធ្វើអត្តឃាតគឺជាមូលហេតុទីពីរនៃមរណភាពរបស់យុវវ័យអាយុ១៥ទៅ២៩ឆ្នាំ។
ជំងឺធ្លាក់ទឹកចិត្ត ជាជំងឺផ្លូវចិត្តម្យ៉ាង ដែលកើតមានជាញឹកញាប់ជាងគេ និងមានកំណើនឥតឈប់ឈរ នៅលើពិភពលោក។ នៅរវាងពីឆ្នាំ១៩៩០-២០១៣ ចំនួនអ្នកមានវិបត្តិផ្លូវចិត្ត ធ្លាក់ទឹកចិត្តឬខ្វល់ថប់បារម្ភ បានកើនឡើងប្រមាណជិត ៥០%។ ប្រជាពលរដ្ឋនៅលើពិភពលោកប្រមាណជា១០% ធ្លាប់មានអាការៈធ្លាក់ទឹកចិត្ត ឬថប់បារម្ភ ឬអាការៈទាំងពីរតែម្តង។ ការធ្លាក់ទឹកចិត្ត តែមួយ បានធ្វើឱ្យយើងខាត និងរស់ក្នុងអសមត្ថភាព ប្រមាណជា១០%នៃរយៈពេលរស់រានមានជីវិត នៅលើពិភពលោក។
នៅក្នុងប្រទេសនិងតំបន់ដែលមានភាពបន្ទាន់មនុស្សធម៌ និងមានជម្លោះវិញ មានមនុស្សម្នាក់ក្នុងចំណោម៥នាក់ មានកើតជំងឺធ្លាក់ទឹកចិត្ត និងជំងឺខ្វល់ថប់បារម្ភ។ ជំងឺធ្លាក់ទឹកចិត្ត អាចជំរុញឱ្យយើងងាយកើតជំងឺមិនឆ្លងដទៃទៀត ដូចជាជំងឺទឹកនោមផ្អែម និងជំងឺសរសៃឈាមបេះដូង។ ផ្ទុយទៅវិញ ប្រសិនបើអ្នកមានផ្ទុកជំងឺទឹកនោមផ្អែម និងជំងឺសរសៃឈាមបេះដូង ជននោះក៏ងាយនឹងធ្លាក់ខ្លួនកើតជំងឺធ្លាក់ទឹកចិត្តដែរ។ ជំងឺធ្លាក់ទឹកចិត្តរបស់ស្ត្រីទើបឆ្លងទន្លេ អាចបង្កផលប៉ះពាល់យ៉ាងខ្លាំងដល់ការលូតលាស់របស់ទារកទើបនឹងកើត។
គេអាចសម្គាល់និងចាត់ទុកមនុស្សម្នាក់ថាមានជំងឺធ្លាក់ទឹកចិត្ត នៅពេលបុគ្គលនោះ មានការគិតធ្លាក់ចុះ ភាពវ័យឆ្លាតក៏បានថយចុះ សោះអង្គើយ បណ្តោយខ្លួនមិនខ្វល់ចង់សំអិតសំអាងខ្លួនសិតសក់អ្វីទាំងអស់ អស់សង្ឃឹម គ្មានចំណង់ គ្មានអារម្មណ៍និងអសមត្ថភាពអាចបំពេញកិច្ចការជាប្រចាំថ្ងៃបាន។ ការធ្លាក់ទឹកចិត្តដែលរាប់ថាជំងឺបាន ដរាបណាបុគ្គលនោះ មានអាការៈសញ្ញាដូចរៀបរាប់ខាងលើរយៈពេលយ៉ាងហោច២សប្តាហ៍ជាប់គ្នា។
ពេលខ្លះទៀត ជំងឺធ្លាក់ទឹកចិត្តអាចជំរុញឱ្យបុគ្គលម្នាក់នោះ ក្លាយជាមនុស្សអស់ថាមពល ប្តូរចំណង់អាហារ គេងមិនលក់ ថប់បារម្ភ ពិបាកផ្ចង់អារម្មណ៍ ពិបាកធ្វើការសម្រេចចិត្តអ្វីមួយ ជ្រួលច្រាលអន្ទះអន្ទែង មានអារម្មណ៍ថាខ្លួនជាមនុស្សអត់ប្រយោជន៍ ដាក់ទោសឬទម្លាក់កំហុសលើខ្លួនឯង គិតអ្វីវិលវល់តែម្នាក់ឯង ឬចង់បញ្ចប់ជីវិតដោយធ្វើអត្តឃាត។
ជំងឺធ្លាក់ទឹកចិត្តអាចកើតលើមនុស្សគ្រប់វ័យ គ្រប់ភេទ។ ជំងឺធ្លាក់ទឹកចិត្ត មិនមែនជាសញ្ញានៃភាពទន់ខ្សោយរបស់មនុស្សណាម្នាក់ទេ ! ជំងឺធ្លាក់ទឹកចិត្ត បញ្ហាផ្លូវចិត្ត អាចព្យាបាលជា តាមរយៈការប្រើថ្នាំ ឬតាមរយៈពាក្យសំដី អប់រំ ណែនាំ ឬលួងលោម !
ដូច្នេះប្រសិនបើអ្នកសង្ស័យថា ខ្លួនកំពុងចង់ធ្លាក់ទឹកចិត្ត សូមនិយាយប្រាប់ទៅនរណាដែលជាទីទុកចិត្ត។ ជាទូទៅ មនុស្សភាគច្រើន ច្រើនតែបានធូរស្បើយក្នុងចិត្ត នៅពេលបាននិយាយថ្លាថ្លែងពីដែលមានកប់ក្នុងអារម្មណ៍ ឱ្យចេញអស់ពីខ្លួន។ ជំនួយពីអ្នកដទៃ ត្រឹមត្រូវអ្នកនឹងបានប្រសើរ។ បន្តធ្វើសកម្មភាពដែលចូលចិត្ត តាមទម្លាប់។ រក្សាទំនាក់ទំនងល្អជាមួយគ្រួសារនិងមិត្តភក្ត្រ។ ទទួលទានអាហារ និងចូលគេង ឱ្យបានទៀងទាត់ ដោយចៀសវាង កុំទទួលទានស្រា ឬគ្រឿងស្រវឹងផ្សេងៗ។
ត្រូវព្រមទទួលស្គាល់ ដោយខ្លួនឯងថា យើងកំពុងធ្លាក់ក្នុងស្ថានភាពឈានទៅរកកើតជំងឺធ្លាក់ទឹកចិត្ត កំពុងមានបញ្ហាផ្លូវចិត្តដូច្នេះ លទ្ធផលការងារ ត្រូវតែចុះថយ និងមិនអាចសម្រេច១០០%ដូចការចង់បានទេ។ សំខាន់ត្រូវចេះនិយាយ និងស្វែងរកជំនួយ ! ជំនួយពីមនុស្សនៅជិតខ្លួន ជំនួយខ្លួនឯង និងជំនួយពីគ្រូពេទ្យឯកទេស។
សូមបញ្ជាក់ថា មានប្រទេសច្រើនណាស់ នៅលើពិភពលោកយើងនេះ ដែលពុំមានរចនាសម្ព័ន្ធគ្រប់គ្រាន់ ឬមានតិចតួចបំផុត ឬក៏គ្មានសោះតែម្តង ជួយគាំទ្រមានជំងឺផ្លូវចិត្ត និងសុខភាពផ្លូវចិត្តមិនសូវល្អ។ សូម្បីតែនៅក្នុងប្រទេសអ្នកមាន អ្នកកើតជំងឺធ្លាក់ទឹកចិត្តចំនួនជិតពាក់កណ្តាល មិនបានទទួលការព្យាបាលទេ។ បើគិតជាថវិកា គ្មានការព្យាបាលជំងឺវិបត្តិផ្លូវចិត្ត ដូចយ៉ាងជំងឺធ្លាក់ទឹកចិត្ត បានធ្វើខាតបង់សេដ្ឋកិច្ចខ្ពស់ណាស់។ ការសិក្សារបស់អង្គការសុខភាពពិភពលោក បានបង្ហាញថា ជំងឺធ្លាក់ទឹកចិត្ត និងការថប់បារម្ភ វិបត្តិផ្លូវចិត្តតែពីរមុខនេះសោះ អាចធ្វើឱ្យមានកំហាតសេដ្ឋកិច្ចអស់ជាង១០០០ពាន់លានដុល្លារអាមេរិក ក្នុងមួយឆ្នាំ។ ផ្ទុយទៅវិញ វិបត្តិផ្លូវចិត្តដែលមានកើតជាញឹកញាប់នេះ អាចការពារ និងទប់ស្កាត់បាន ដោយចំណាយថវិកាដ៏តិចតួចបំផុត។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ