ព្រះរាជអាជ្ញា សម្រេចចោទប្រកាន់អតីតបុគ្គលិកវិទ្យុអាស៊ីសេរីពីររូបជាផ្លូវការ
តំណាងអយ្យការអមសាលាដំបូងរាជធានីភ្នំពេញ នៅថ្ងៃសៅរ៍នេះ បានសម្រេចចោទប្រកាន់ជាផ្លូវការទៅលើ អតីតបុគ្គលិក វិទ្យុអាស៊ីសេរីពីររូប គឺ លោក អ៊ួន ឈិន និង លោក យាង សុជាមេត្តា។ គឺជាបទចោទលួចបញ្ចេញព័ត៌មានឲ្យទៅបរទេស ដែលអាចត្រូវប្រឈមមុខជាប់ទោសពន្ធនាគារពី៧ឆ្នាំ ទៅ ១៥ឆ្នាំ។
ចុះផ្សាយនៅថ្ងៃ៖
លោក សេង ហៀង ព្រះរាជអាជ្ញារងនៃអយ្យការអមសាលាដំបូងរាជធានីភ្នំពេញ បានសម្រេចចោទប្រកាន់អតីតបុគ្គលិកវិទ្យុអាស៊ីសេរីទាំងពីររូបនេះពីបទ"ប្រគល់ឱ្យរដ្ឋបរទេសនូវព័ត៌មានជាអាទិ៍ដែលអាចធ្វើឱ្យអន្តររាយការការពារជាតិ"តាមក្រមព្រហ្មទណ្ឌរបស់កម្ពុជា។
នេះបើតាមអ្នកនាំពាក្យសាលាដំបូងរាជធានីភ្នំពេញ។ លោក លី សុផាន់ណា បានឲ្យដឹងថាតំណាងអយ្យការបានធ្វើការចោទប្រកាន់តាមមាត្រា៤៤៥ នៃក្រមព្រហ្មទណ្ឌពី"បទប្រគល់ឱ្យរដ្ឋបរទេសនូវព័ត៌មានជាអាទិ៍ដែលអាចធ្វើឱ្យអន្តររាយការការពារជាតិ។ ជាបទល្មើសមួយដែលអាចនឹងត្រូវផ្ដន្ទាទោសជាប់ពន្ធនាគារពី៧ឆ្នាំទៅ១៥ឆ្នាំ"។
ក្រោយពីការចោទប្រកាន់ជាផ្លូវការរបស់តំណាងអយ្យការរួចហើយ សំណុំរឿងនេះត្រូវបានបញ្ជូនទៅចៅក្រមស៊ើបសួរដើម្បីចាត់ការបន្តតាមនីតិវិធី ថាតើសម្រេចឃុំខ្លួនបណ្តោះអាសន្នរង់ចាំបើកសវនាការឬមិនឃុំខ្លួន។
យ៉ាងណាក៏ដោយ នៅក្នុងសេចក្តីថ្លែងការណ៍របស់នាយកប្រតិបត្តិ វិទ្យុអាស៊ីសេរី ចុះថ្ងៃ១៧វិច្ឆិកា គេបានសំដែងក្តីសង្ឃឹមថា ពួកគេនឹងត្រូវដោះលែងដោយគ្មានការធ្វើទុក្ខបុកម្នេញដើម្បីបានជួបជុំគ្រួសាររបស់ពួកគេវិញ។
សូមបញ្ជាក់ថា លោក អ៊ួន ឈិន និងលោក យាង សុធារិន ហៅ យាង សុជាមេត្តា គឺជាអតីតបុគ្គលិកវិទ្យុអាស៊ីសេរី ដែលត្រូវបានអាជ្ញាធរខ័ណ្ឌមានជ័យឃាត់ខ្លួន កាលពីរាត្រីថ្ងៃទី ១៤ វិច្ឆិកា នៅក្នុងបន្ទប់សណ្ឋាគារមួយ ស្ថិតនៅក្បែរស្ពានអាកាសស្ទឹងមានជ័យ ក្រុងភ្នំពេញ។
ពួកគេត្រូវបាន សង្ស័យថា បានលួចដំឡើងប្រព័ន្ធផ្សព្វផ្សាយដោយខុសច្បាប់ និងលួចផលិតព័ត៌មានបញ្ជូនពីប្រទេសកម្ពុជាទៅកាន់វិទ្យុអាស៊ីសេរីដែលស្ថិតនៅទីក្រុងវ៉ាស៊ីនតោនសហរដ្ឋអាមេរិក។ ប៉ុន្តែបើផ្អែកតាមចំលើយសារភាពរបស់លោក អ៊ួន ឈិន បានប្រាប់សមត្ថកិច្ចនៅពេលចាប់ខ្លួនកាលពីវេលាម៉ោង៧យប់ ថ្ងៃទី ១៤ វិច្ឆិកាថា ខ្លួនបានជួលបន្ទប់សណ្ឋាគារម៉ារឌី ស្ថិតនៅសង្កាត់ស្ទឹងមានជ័យនេះ គឺដើម្បីតម្លើងស្ទូឌីយោផលិតបទចម្រៀងលក់ និងសម្រាប់ច្រៀងខារ៉ាអូខេជាលក្ខណៈគ្រួសារតែប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ