តើធ្វើដូចម្តេចដើម្បីបញ្ចៀសកុំឱ្យឈឺខ្នងឈឺចង្កេះ ព្រោះការងារ ?
ចុះផ្សាយនៅថ្ងៃ៖
ស្តាប់ - ០៨:៣៦
មិនថាអ្នកមានរបរអ្វី មានសកម្មភាពការងារអ្វីឡើយ លោកអ្នកតែងជួបប្រទះ ការឈឺចុកចាប់ដៃ ជាប់ក ជាប់ខ្នង ឈឺស្មា ឈឺក្បាល ហើមជើង ស្ត្រេស និងការនឿយហត់ ... អ្នកធ្វើការភាគច្រើនតែងជួបអាការៈសញ្ញាខាងលើនេះ ជួនខ្លាំង ជួនស្រាល។ គេមិនអាចបញ្ចៀសការឈឺចុកចាប់បានទាំងស្រុងមែន ប៉ុន្តែមានកាយវិកាយមួយធំអាចជួយកាត់បន្ថយហានិភ័យនេះបាន។ តើត្រូវការពារដូចម្តេច ?
ឈឺខ្នង ឈឺចង្កេះ មានបញ្ហាសាច់ដុំ-ឆ្អឹង ស្ពឹកស្រពន់ ... ការឈឺចុកចាប់នៅកន្លែងធ្វើការមានច្រើនណាស់។ ប៉ុន្តែបើអ្នកចេះគោរព និងប្រតិបត្តិកាយវិការត្រឹមត្រូវតែបន្តិចបន្តួច នោះការឈឺចុកចាប់ លែងស្តែងឡើង និងមានកំរិតដូចមុនទៀតហើយ។
ប្រសិនបើអ្នកធ្វើការត្រូវលីសែងលើករបស់ធ្ងន់
ប្រសិនបើអ្នកជាកម្មករ ត្រូវលី ត្រូវសែង ត្រូវលើករបស់របរធ្ងន់ៗ យូរឬឆាប់ ញឹកញយ ឬម្តងម្កាល អ្នកនឹងមានអារម្មណ៍ឈឺចាប់យ៉ាងខ្លាំងនៅខ្នង។ ការឈឺចាប់នេះ មានករណីខ្លះមិនអាចបញ្ចៀសបានទេ ! ប៉ុន្តែគេអាចកាត់បន្ថយហានិភ័យនៃការឈឺចាប់នេះបានខ្លះ។ លោក នីកូឡា ប៊ែរត្រង់ គ្រូពេទ្យជំនាញចាប់សរសៃនិងឆ្អឹង សូមផ្តល់ដំបូន្មានយ៉ាងសាមញ្ញ ដែលអ្នកត្រូវអនុវត្តឱ្យខ្ជាប់ខ្ជួន នោះគឺ
“យកល្អបំផុត ត្រូវចៀសវាងកុំលើករបស់អ្វីដែលធ្ងន់ ! ប៉ុន្តែបើមិនអាចគេចបាន ត្រូវចេះការពារខ្លួន ៖ នៅពេលត្រូវលើករបស់ធ្ងន់ ត្រូវបង្ខិតខ្លួនឱ្យនៅកៀកវត្ថុនោះ មែនទែន រួចបន្ទន់ជង្គង់បន្តិចមុននឹងចាប់លើកវត្ថុធ្ងន់នោះ។ សូមប្រើជង្គង់ជួយ ប្រសើរជាងប្រើតែខ្នងអោនទៅមុខឈោងលើវត្ថុធ្ងន់ ដែលងាយនឹងធ្វើឱ្យខ្នងឆាប់មានបញ្ហា។ អោនងើបៗ ទោះជាត្រូវលើករបស់ស្រាលក៏ដោយក៏ជាបន្ទុកដ៏ធ្ងន់ធ្ងរសម្រាប់ខ្នង។ បង្កោងខ្នងអោនរើសរបស់អ្វីមួយនៅនឹងដី ហើយងើបឡើងវិញដោយប្រឹងកាន់របស់មកជាមួយផង មើលទៅឃើញស្រាលទេ តែជាតំណាងឧបសគ្គខ្ទាស់ប្រឹងស្រទាប់ឆ្អឹងកងខ្នងខ្លាំងណាស់។ ខ្លាំងដែលយើងនឹងស្មានមិនដល់ឡើយ។”
ខ្នង និងឆ្អឹងកងខ្នងរបស់អ្នក ជាអ្នកទ្រទ្រង់រាងកាយ ដ៏សំខាន់ ! សូមថែរក្សាវាឱ្យបានល្អម៉ត់ហ្មងបំផុត ! បើចង់លើករបស់ធ្ងន់ ត្រូវប្រើជង្គង់ជាជំនួយ គន្ធែកជើងបន្តិច រួចបន្ទន់ជង្គង់បន្តិចមុននឹងចាប់លើកវត្ថុ មិនត្រូវបណ្តោយឱ្យខ្នងនិងឆ្អឹងកងខ្នងមកទទួលបន្ទុកលើករបស់ធ្ងន់ ! ត្រូវរក្សាដងខ្លួននិងខ្នងអ្នកឱ្យត្រង់ជានិច្ច ! ប្រសិនបើអាចត្រូវឆ្លៀត និងប្រើជំនួយ ជាម៉ាស៊ីន ជារទេះ។
សូមព្យាយាមសម្រាកបន្តិច ក្រោយពីបានបញ្ចេញកម្លាំងខ្លាំង ក្នុងការលើកដាក់របស់ធ្ងន់រួច។ ឧស្សាហ៍ទៅជួបពិគ្រោះជាមួយគ្រូពេទ្យ ឯកទេសឆ្អឹង ឬសរសៃ ដើម្បីផ្ទៀងផ្ទាត់ថាឆ្អឹងខ្នងអ្នកនៅរក្សាទម្រង់ត្រង់ដដែល គ្មានវៀចវច។
ចំពោះអ្នកធ្វើការនៅមុខកុំព្យូទ័រ
គេពិតជាយល់ខុស ដែលគិតថាអ្នកធ្វើនៅក្នុងការិយាល័យ នៅក្នុងមុខកុំព្យូទ័រស្រណុកស្រួល មិនស្គាល់ពាក្យថាឈឺចាប់នោះ។ ការងារនៅមុខអេក្រង់ដ៏មហាស្រណុកជ្រុលមួយនេះ ជាប្រភពនៃការឈឺចុកចាប់សាច់ដុំនិងឆ្អឹងខ្លាំងណាស់ ៖ ព្រោះវាអាចនឹងងាយបង្កឱ្យមានជំងឺរលាកសាច់ដុំ សរសៃ ឆ្អឹងឆ្អែង នៅម្តុំក កញ្ចឹងក នៅខ្នង នៅស្មា និងដៃ ឬក៏ជើងទៀត។ ការប្រឹង និងផ្ចង់ការងារនៅមួយកន្លែងមុខអេក្រង់ អាចនឹងបង្កឱ្យមានភាពតានតឹងនៅសាច់ដុំនិងសរសៃនៅចុងសាច់ដុំ។
ដើម្បីបញ្ចៀសការឈឺចាប់ យើងសូមណែនាំឱ្យលោកអ្នកអង្គុយឱ្យបានស្រួលបួលបំផុតលើកៅអី រក្សាខ្នងឱ្យត្រង់ល្អ និងដាក់អេក្រង់កុំព្យូទ័រឱ្យត្រង់ចំពីមុខភ្នែក។ កុំខ្លាចនឹងងើបដើរ ឬឈរពីរបីនាទី។ ពាក្យថាអង្គុយឱ្យបានស្រួលបួល គឺប្រែប្រួលទៅបុគ្គល ធ្វើយ៉ាងណាឱ្យខាងតែមានផាសុកភាព ដោយឧស្សាហ៍ផ្លាស់ជំហរចង្កេះ ជង្គង់ កជើង កែងដៃ។ ខាងក្រោមនេះ គឺជាអនុសាសន៍ទូទៅស្តីអំពីរបៀបអង្គុយដ៏ត្រឹមត្រូវ
- រក្សាសន្លាក់ ត្រង់ចង្កេះ ជង្គង់ និងកជើង ឱ្យបត់កែងធំជាង៩០ដឺក្របន្តិច
- បញ្ឈរជង្គង់ឱ្យស្មើចង្កេះ ឬទាបជាងបន្តិច
- ដាក់កជើងទៅមុខជង្គង់
- អង្គុយឱ្យស៊ុបលើកៅអី ដោយទុកឱ្យគន្លាក់ជង្គង់ក្រោយ (គន្លាក់អាចម៍) ឃ្លាតពីកែមកៅអីតែបីធ្នាប់
- បាតជើងត្រូវដាក់រាបស្មើដី ឬលើទម្រជើង
- ផ្នែកខាងលើនៃដងខ្លួន អាចប្រែប្រួលជំហរត្រឹមពី០ ទៅ ៣០ដឺក្រេ
- បង្អែកកៅអីត្រូវកល់ទប់ទ្រទ្រង់តំបន់ចង្កេះ
- ក្បាលត្រូវត្រង់ស្របតពីឆ្អឹងខ្នង
- ដាក់ដើមដៃឱ្យនៅកៀកដងខ្លួនចំផុត និងអាចប្រែប្រួលឃ្លាតពីត្រឹម០ទៅ២០ដឺក្រេ
- ដាក់កំភួនដៃរាបលើតុ កែងជាមួយដើមដៃ ៩០ទៅ១២០ដឺក្រេ
- ដាក់កដៃឱ្យត្រង់ស្មើបនឹងកំភួនដៃ លើតុ ដើម្បីកុំឱ្យមានអាការៈស្ពឹកស្រពន់។
- ដាក់កែងដៃឱ្យជិតខ្លួន ដោយមានភ្នាក់ដៃជាទម្រផង ដើម្បីសម្រួលសាច់ដុំស្មា និងឧស្សាហ៍ពន្លារសាច់ដុំ ដោយលើកដៃលាត្រដាង ឬលើកចុះលើកឡើង
- កុំធ្វើការអោនកោងទៅមុខ និងកុំអង្គុយផ្អៀង
- កុំអង្គុយជាប់គូថយូរអត់ងើបសោះលើសពី៥០នាទី
“ជាទូទៅនៅពេលអង្គុយ ត្រូវសារ៉េកំពស់កៅអីធ្វើយ៉ាងណាឱ្យពេលអង្គុយទៅចង្កេះ ជង្គង់ កជើង បញ្ឈរបត់កែងត្រង់។ បាតជើងត្រូវដាក់រាបសំប៉ែតជាប់នឹងដី ឬលើប្រដាប់ទម្រជើង។ កុំអង្គុយគងជើងគ្នាឱ្យសោះ ព្រោះជំហរបែបនេះ ងាយនឹងធ្វើឱ្យស្ទះឈាមនៅម្តុំកំភួនជើងខ្លាំងណាស់ និងឆាប់ធ្វើឱ្យយើងមានអារម្មណ៍ធ្ងន់ ស្ពឹកជើង។ ជីវិតទំនើបសម័យថ្មី បានបង្ខំឱ្យយើងអង្គុយរាប់ម៉ោង ក្នុងជំហរដដែលតែមួយ ដូច្នេះត្រូវចេះសម្របខ្លួន ដោយត្រូវគិតគូរធ្វើយ៉ាងណាអង្គុយឱ្យបានស្រួលបួលបំផុត។ ហើយអនុសាសន៍ដ៏សំខាន់មួយទៀត គឺ សូមទទួលទានទឹក។ ពិសារទឹកមួយក្អឹកពីរ ចន្លោះពេលបាយ អាចជួយសម្រួលចរន្តលំហូរទឹករង៉ៃនៃជាលិកាផង និងផ្អើមខួរក្បាលផង។ ហើយកុំភ្លេចធ្វើតាមអនុសាសន៍ដែលបានរៀបរាប់ខាងលើ។”
ប្រសិនបើអ្នកធ្វើការឈរ
អាជីពខ្លះ តម្រូវឱ្យអ្នកឈរស្ទើរពេញមួយថ្ងៃ ! ថ្វីបើការឈរ ជាជំហរធម្មជាតិមួយរបស់មនុស្សមែន ប៉ុន្តែការឈរអាចធ្វើឱ្យយើងហត់ខ្លាំងណាស់ និងអាចបង្កអាការៈឈឺចុកចាប់ខ្លាំង នៅខ្នង នៅជើង និងចង្កេះ ដូចជាឈឺខ្នង ស្ពឹកស្រពន់ជើង ក្រហាយចង្កេះ។
ដើម្បីបន្ធូរបន្ថយការឈឺចាប់បែបនេះ សូមចៀសវាងកុំឈរស្ងៀមដូចរូបចម្លាក់ ! អ្នកអាចលួចទាញពន្លារសរសៃសសូង ដោយផ្អែកនឹងជញ្ជាំង ឬឈរកយកដៃច្រត់តុ ដើម្បីសម្រួលបន្ទុកខ្នង។ ប្រសិនបើអាច នៅពេលឈប់សម្រាក ទោះមួយភ្លែតក្តី ក៏ត្រូវចេះឆ្លៀតធ្វើកាយវិការសាមញ្ញៗមួយចំនួនដូចជាលើកជើងឡើង ដើម្បីសម្រួលចរន្តឈាមឱ្យហូរបញ្ច្រាសឡើងវិញបានប្រសើរ។
សូមគិតគូររកពាក់ស្រោមការពារជើង ដែលអាចជួយសម្រួលចរន្តឈាមហូរចុះទៅជើង និងបកឡើងមកបេះដូងបាន នៅពេលយើងឈរយូរនិងច្រើន។ បើអាចគេចមិនពាក់ស្បែកជើងកែងចោទទៀតបាន កាន់តែប្រសើរ។ សាកល្បងសម្រាកជើងឆ្លាស់គ្នា ម្តងឆ្វេងម្តងស្តាំ ដោយទម្លាក់ទម្ងន់ទៅលើជើងម្ខាងទៀត ប្រមាណជាពីរបីវិនាទី។ បើត្រូវឈរស្ងៀមយូរ សូមរំលែកទម្ងន់លើជើងទាំងពីរឱ្យបានស្មើ។
ដើម្បីជាកិច្ចការពារ នៅផ្ទះជារៀងរាល់ព្រឹក សូមធ្វើលំហាត់ប្រាណដ៏សាមញ្ញ តែបីនាទី នៅពេលភ្ញាក់ពីដំណេកភ្លាម នោះចរន្តឈាមអ្នកនឹងដើរស្រួលល្អ អារម្មណ៍ឈឺចាប់ធ្ងន់ជើងនឹងបានធូរស្រាល។
“លំហាត់ទីមួយគឺត្រូវ ជំទើតឈរលើចុងជើង រួចដើរ អ្នកធ្វើបែបនេះបួនដប់ដង។ កាយវិការនេះ គឺជាការដាស់លំហាត់ទីមួយគឺត្រូវ ជំទើតឈរលើចុងជើង រួចទម្លាក់ខ្លួនមកវិញ ដោយឈរលើកែងជើងម្តង .... អ្នកធ្វើបែបនេះបួនដប់ដង ដើម្បីដាស់សន្លាក់និងសាច់ដុំ ពោលគឺសម្រួលចរន្តឈាម។ លំហាត់មួយទៀត គឺអ្នកងើបឈរឱ្យត្រង់ខ្លួន លើកជង្គង់ឱ្យខ្ពស់ស្មើនឹងចង្កេះ បន្ទន់ជង្គង់និងគន្ធែកជើងទាំងពីរ ដើម្បីបើកត្រគៀក។ ម្តងជង្គង់ឆ្វេង ម្តងជង្គង់ស្តាំ ១០ដង មុននឹងទៅលុបមុខរៀបខ្លួនទៅធ្វើការ”។
ប្រសិនបើអ្នកត្រូវអង្គុយយូរក្នុងរថយន្ត
ជាអ្នកបើកបររថយន្តផ្លូវឆ្ងាយ ផ្លូវជិត ឡានក្រុង ឡានតូច ឬជាបុគ្គលិកការងារដែលប្រើឡានច្រើន ត្រូវធ្វើដំណើរច្រើនអង្គុយក្នុងឡាន ជំហរអង្គុយក្នុងឡាននេះក៏មិនមែនស្រួលប៉ុន្មានឡើយ ហើយអាចជាបុព្វហេតុនាំឱ្យមានជំងឺឈឺចង្កេះយ៉ាងខ្លាំងផង។ ដំបូន្មានដែលអ្នកឯកទេសអាចផ្តល់ឱ្យអ្នកក្នុងអាជីពនេះ គឺត្រូវ សារ៉េកៅអីឡាន ធ្វើយ៉ាងណាឱ្យអ្នកអាចអង្គុយបានដោយស្រួល ដោយខ្នងត្រង់ ហើយអាចទម្លាក់ដៃស្របនឹងដងខ្លួន។ បើអាចគួរតែប្រើភ្នាក់ដៃ ដើម្បីឱ្យដើមដៃអាចសម្រាកបានខ្លះ និងសម្រួលសាច់ដុំកញ្ចឹងក ស្មាកុំឱ្យប្រឹងរហូតពេក។
នៅពេលបើកបរ ឬធ្វើដំណើរតាមឡាន ពេលខ្លះវាមិនមែនជាការងាយឡើយ ក្នុងការឈប់សម្រាកតាមផ្លូវនោះ ប៉ុន្តែវាជាការចាំបាច់បំផុតដែលអ្នកត្រូវចំណាយពេលពីរបីនាទីដើរ និងសម្រួលឥរិយាបថ រាល់ពីរម៉ោងម្តង ដើម្បីពន្លារសាច់ដុំ។ អ្នកបើកបរ មិនចូលចិត្តដើរ តែការដើរនឹងធ្វើឱ្យអ្នកស្រួលខ្លួន ហើយបញ្ចៀសហានិភ័យនៃការងោកងុយក្នុងពេលបើកបរបានទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ