ក្រសួងសាធារណការ ដាក់ចេញផែនការពង្រឹងវិស័យដឹកជញ្ជូនតាមផ្លូវទឹក
រដ្ឋមន្រ្តីក្រសួងសាធារណការ និងដឹកជញ្ជូន នៅព្រឹកនេះ បានប្រកាសដាក់ចេញទិសដៅអនុវត្តការងារ ក្នុងការពន្លឿន និងពង្រឹងវិស័យដឹកជញ្ជូនតាមផ្លូវទឹក ផ្លូវសមុទ្រ និងកំពង់ផែ ឲ្យកាន់តែទូលំទូលាយ នៅក្នុងឆ្នាំ២០១៨នេះ។ បើតាមគម្រោង នៅមុនពិធីបុណ្យចូលឆ្នាំខ្មែរខាងមុខនេះ ក្រសួងសាធារណការ នឹងដាក់ឲ្យដំណើការជាផ្លូវការ ការធ្វើដំណើរតាមផ្លូវទឹកពីស្ពានព្រែកព្នៅ -ភ្នំពេញ-តាខ្មៅ ដើម្បីសម្រួលដល់ការដឹកជញ្ជូន និងកាត់បន្ថយការកកស្ទះចរាចរ។
ចុះផ្សាយនៅថ្ងៃ៖ កែប្រែថ្ងៃទី៖
ថ្លែងនៅក្នុងពិធីបិទសន្និបាតបូកសរុបលទ្ធផលការងារ ឆ្នាំ២០១៧ និងលើកទិសដៅការងារឆ្នាំ២០១៨ លោកស៊ុន ចាន់ថុល រដ្ឋមន្រ្តីក្រសួងសាធារណការ និងដឹកជញ្ជូន បានបញ្ជាក់ទៀតថា រហូតមកទល់ពេលនេះ ក្រសួងសាធារណការ កំពុងតែរៀបចំទីតាំងកំពង់ផែចំណតកាណូតដឹកអ្នកដំណើរចំនួន១៥ ទីតាំងនៅក្នុងរាជធានីភ្នំពេញ។
ក្រៅពីនេះ លោកទេសរដ្ឋមន្ត្រី ស៊ុន ចាន់ថុល បានថ្លែងថា ក្រសួងសាធារណការ ក៏កំពុងតែបន្តសិក្សាបញ្ចប់លើគម្រោងសាងសង់ផែបណ្តែត តាមបណ្តាខេត្ត ដើម្បីសម្រួលការដឹកជញ្ជូន រួមទាំងបញ្ចប់សេចក្តីព្រាងច្បាប់ បទដ្ឋាននានា និងគោលនយោបាយជាតិ ស្តីពីការដឹកជញ្ជូនតាមផ្លូវទឹក។
សម្រាប់ការងារនាវាជំនួញសមុទ្រវិញ ត្រូវបានលោក ស៊ុន ចាន់ថុល អះអាងថា ក្រសួងបានរៀបចំគោលនយោបាយជាតិ ស្តីពីការដឹកជញ្ជូនផ្លូវសមុទ្រ ការពិនិត្យឡើងវិញសេចក្តីព្រាងក្រមនាវាចរណ៍សមុទ្រ និងរៀបចំសេចក្តីព្រាងអនុក្រឹត្យស្តីពីនាវិក ការពិនិត្យលទ្ធភាពនៃការចុះបញ្ជីនាវាសញ្ជាតិកម្ពុជា ឡើងវិញ ដោយអនុលោមតាមគោលការណ៍អន្តរជាតិ ដើម្បីធានាថាសេវានៃការចុះបញ្ជីនាវានេះមានតម្លាភាព ស្របតាមការវិវត្តរបស់សង្គមជាតិ។
ថ្លែងនៅក្នុងពិធីដដែលដែរនេះ លោក ស ខេង រដ្ឋមន្រ្តីក្រសួងមហាផ្ទៃ និងជាតំណាងលោកនាយករដ្ឋមន្រ្តីហ៊ុន សែន បានថ្លែងស្វាគមន៍ និងគាំទ្រចំពោះផែនការសកម្មភាព និងគម្រោងដាក់ឲ្យដំណើការមធ្យោយបាយទឹកជញ្ជូនទាំងនេះ។ លោក ចាត់ទុកថា គំនិតផ្តួចផ្តើមទាំងនេះ នឹងចូលរួមចំណែកដោះស្រាយបញ្ហាដឹកជញ្ជូននៅកម្ពុជា ឲ្យកាន់តែប្រសើរឡើង។
សូមជម្រាបជូនផងដែរថា បន្ថែមពីលើទិសដៅការងារ ពង្រីកមធ្យោបាយដឹកជញ្ជូនតាមផ្លូវទឹក នៅក្នុងឆ្នាំ២០១៨នេះ ក្រសួងសាធារណការ ក៏គ្រោងនឹងជម្រុញវិស័យផ្លូវដែកផងដែរ។ បើតាមគម្រោង ក្រសួងជំនាញមួយនេះ ក៏កំពុងតែសាងសង់ផ្លូវដែកតភ្ជាប់ចូលព្រលានយន្តហោះអន្តរជាតិភ្នំពេញ កំពុងសិក្សាលទ្ធភាពសាងសង់ផ្លូវរថភ្លើងស្វ័យប្រវត្តិលើអាកាសនៅរាជធានីភ្នំពេញផងដែរ ហើយគ្រោងបញ្ចប់ការសាងសង់ស្ថានីយ៍រថភ្លើងអន្តរជាតិប៉ោយប៉ែត នាពេលដ៏ខ្លីខាងមុខនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ