រដ្ឋសភា ទាត់ចោលរាល់ការរិះគន់ដែលថាប្រសិទ្ធភាពរបស់ស្ថាប័ននេះបន្តធ្លាក់ចុះ
អ្នកនាំពាក្យរដ្ឋសភាជាតិ នៅថ្ងៃពុធនេះ បានប្រតិកម្មទាត់ចោលទាំងស្រុងលើរបាយការណ៍សង្កេតរដ្ឋសភា និងតំណាងរាស្ត្រ ឆ្នាំទី៤ នៃរដ្ឋសភានីតិកាលទី ៥ ឆ្នាំ ២០១៧ ដែលវាយតំលៃថា ប្រសិទ្ធភាពរបស់រដ្ឋសភា ត្រូវបានបន្តធ្លាក់ចុះជាងឆ្នាំ ២០១៦។ របាយការណ៍របស់គណៈកម្មាធិការដើម្បីការបោះឆ្នោតដោយសេរី និងយុត្តិធម៌នៅកម្ពុជា ហៅកាត់ថា COMFREL បានបង្ហាញថា សកម្មភាពស្ទើរគ្រប់ផ្នែកនៅក្នុងរដ្ឋសភា ក្នុងឆ្នាំ ២០១៧ គឺធ្លាក់ចុះ ព្រមទាំងមានលាយឡំដោយផលប៉ះពាល់អវិជ្ជមាន និងអយុត្តិធម៌ធ្ងន់ធ្ងរចំពោះសម្លេងម្ចាស់ឆ្នោត។ ប៉ុន្តែសម្រាប់រដ្ឋសភា អ្វីគ្រប់យ៉ាង គឺបានធ្វើតាមដំណើរនៃកិច្ចព្រមព្រៀងនយោបាយ ព្រមទាំងមិនដែលឃ្លាតពីការគោរពច្បាប់របស់ប្រទេសនោះឡើយ។
ចុះផ្សាយនៅថ្ងៃ៖
ស្តាប់ - ០២:០៧
លោក ឡេង ប៉េងឡុង អ្នកនាំពាក្យរដ្ឋសភាជាតិ បានប្រាប់វិទ្យុបារាំងនៅព្រឹកថ្ងៃទី ១៧មករាថា របាយការណ៍របស់អង្គការ COMFREL មិនមានឯករាជ្យ និងគ្មានមូលដ្ឋានគ្រឹះគ្រប់គ្រាន់ ដើម្បីអាចវាយតំលៃពីប្រសិទ្ធភាពរបស់រដ្ឋសភានោះទេ។ តាមលោក ឡេង ប៉េងឡុង រដ្ឋសភា ក្នុងនីតិកាលទី ៥ នៅឆ្នាំ ២០១៧ គឺបានប្រព្រឹត្តទៅដោយរលូន ព្រោះសមាជិកម្នាក់ៗ មិនបានរំលោភបំពានច្បាប់ ដូច្នេះប្រសិទ្ធភាពរបស់រដ្ឋសភា គឺគ្មានការធ្លាក់ចុះអ្វីទាំងអស់។
គួរជម្រាបជូនថា កាលពីដើមខែមករា ឆ្នាំ ២០១៨នេះ COMFREL បានចេញផ្សាយនូវរបាយការណ៍មួយ ពីការសង្កេតរបស់ខ្លួនជុំវិញប្រសិទ្ធភាព និងសកម្មភាពរបស់រដ្ឋសភាជាតិ ក្នុងឆ្នាំ ២០១៧។ តាមការវាយតំលៃដោយផ្អែកលើការពិនិត្យជាក់ស្តែង COMFREL មើលឃើញថា តំណាងរាស្ត្រនៃគណបក្សកាន់អំណាច បានផ្តួចផ្តើម និងសម្រេចជាឯកបក្ស ក្នុងការធ្វើវិសោធកម្មច្បាប់ ស្តីពីគណបក្សនយោបាយ រហូតដល់មានការរំលាយគណបក្សសង្គ្រោះជាតិ ដែលនេះជារូបម្តថ្មី ដែលធ្វើឲ្យប៉ះពាល់យ៉ាងអយុត្តិធម៌ ដល់សម្លេងម្ចាស់ឆ្នោត តាមរយៈការបែងចែកអាសនៈសភារបស់តំណាងរាស្ត្របក្សសង្គ្រោះជាតិ ទៅចែកដល់បក្សដទៃ ដែលមិនបានជាប់ឆ្នោត។
លើសពីនេះ ក៏មានការសង្កេតឃើញថា ការអនុម័តលើសេចក្តីព្រាងច្បាប់ និងសេចក្តីស្នើវិសោធនកម្មច្បាប់ ដែលមានចំនួន ១៧លើក គឺត្រូវបានអនុម័តដោយសម្លេងឯកបក្ស ដោយការធ្វើពហិការបស់គណបក្សសង្គ្រោះជាតិ និងដោយគ្មានការជជែកពិភាក្សាគ្នា ចំពោះសេចក្តីព្រាង ឬ សេចក្តីស្នើច្បាប់មួយចំនួន។ ប៉ុន្តែសម្រាប់លោក ឡេង ប៉េងឡុង ទោះបីជាឯកបក្ស ឬ ពហុបក្ស ក៏វាមិនជាបញ្ហាអ្វីលើការអនុម័តសេចក្តីព្រាងច្បាប់នីមួយៗនោះដែរ ពីព្រោះថាច្បាប់ទាំងនោះ សុទ្ធតែបានគិតគូរពីផលប្រយោជន៍ដល់ប្រជាពលរដ្ឋ រួចរាល់អស់ហើយ។
ក្រៅពីចំនុចទាំងនេះ COMFREL ក៏វាយតំលៃទៀតថា សកម្មភាពរបស់គណៈកម្មការជំនាញរដ្ឋសភា សកម្មភាពចុះមូលដ្ឋានរបស់តំណាងរាស្ត្រ ការកោះហៅរដ្ឋមន្ត្រីមកបំភ្លឺជុំវិញបញ្ហាផ្សេងៗ និងកិច្ចអន្តរាគមរបស់សភា និងតំណាងរាស្ត្រ គឺមានការធ្លាក់ចុះដូចគ្នា បើប្រៀបទៅនឹងសកម្មភាពឆ្នាំ ២០១៦ និង ២០១៥។ យ៉ាងណាមិញ មានការមើលឃើញថា មានតំណាងរាស្ត្រ ១០រូប ដែល ៥រូប មកពីបក្សប្រជាជនកម្ពុជា និង ៥រូបមកពីគណបក្សសង្គ្រោះជាតិ តែងតែមានភាពសកម្ម ក្នុងការឡើងបញ្ចេញមតិដោយយកចិត្តទុកដាក់ជាងគេ ក្នុងកិច្ចប្រជុំពេញអង្គនៃរដ្ឋសភា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ