យុទ្ធនាការកណ្តាប់ដៃដែក៖ រថយន្តធុនធ្ងន់ជិត១ម៉ឺន៦ពាន់គ្រឿងត្រូវបានត្រួតពិនិត្យ
យ៉ាងហោចណាស់រថយន្តធុនធ្ងន់ជិត១ម៉ឺន៦ពាន់គ្រឿង ត្រូវបានសមត្ថកិច្ចនគរបាលចាប់ឃាត់ធ្វើការត្រួតពិនិត្យនៅទូទាំងប្រទេសរយៈពេល៧ថ្ងៃមកនេះ។ នេះគឺជាចំណាត់ការដែលធ្វើឡើងទៅតាមបញ្ជារបស់ប្រមុខរដ្ឋាភិបាល លោក ហ៊ុន សែន ក្នុងយុទ្ធនាការកណ្តាប់ដៃបង្រ្កាបលើរថយន្តកែច្នៃខុសលក្ខណៈបច្ចេកទេស ដែលនាំឲ្យមានការដឹកលើសទម្ងន់ និងខូចផ្លូវថ្នល់ ហើយក៏អាចប្រឈមនឹងគ្រោះថ្នាក់ចរាចរណ៍ផងនោះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៥
លោកឧត្តមសេនីយ៍ឯក រុន រ័ត្នវាសនា បញ្ជាក់ប្រាប់វិទ្យុបារាំងRFIថា ក្នុងចំណោមរថយន្តដែលបានឃាត់ធ្វើការត្រួតពិនិត្យទាំង១៥,៩៨៩គ្រឿងនោះ គឺមានចំនួនជាង១ពាន់១រយគ្រឿង ជារថយន្តល្មើសច្បាប់។ ប្រធាននាយកដ្ឋាននគរបាលចរាចរណ៍ដដែល ឲ្យដឹងទៀតថា មានរថយន្តជិត៦រយគ្រឿងត្រូវបានកាត់ទ្រុងនិងកាត់សណ្តោងចោលនៅនឹងកន្លែងតែម្តង។ ប៉ុន្តែចំនួនរថយន្តកែច្នៃខុសលក្ខណៈបច្ចេកទេសអាចនឹងមានការថយចុះនៅក្នុងពេលធ្វើការត្រួតពិនិត្យបន្តទៅមុខទៀត។ នេះបើតាមលោកឧត្តមសេនីយ៍ រុន រ័ត្នវាសនា។
សូមបញ្ជាក់ថា យុទ្ធការចាប់រថយន្តធុនធ្ងន់នេះ គឺធ្វើឡើងទៅតាមបទបញ្ជាឲ្យប្រើកណ្តាប់ដែករបស់លោកនាយករដ្ឋមន្រ្តី ហ៊ុន សែន។ ជាបញ្ជាផ្ទាល់មាត់ដែលភ្ជាប់នឹងការព្រមានដកអភិបាលខេត្តនិងអភិបាលស្រុកណាដែលបណ្តោយឲ្យមានរថយន្តកែច្នៃខុសលក្ខណៈបច្ចេកទេសធ្វើចរាចរណ៍តាមផ្លូវសាធារណៈ។
ក៏ប៉ុន្តែក្រោយពីសមត្ថកិច្ចចាប់ឃាត់ទុករថយន្តធុនធ្ងន់ទាំងនោះ សមាគមរោងចក្រកាត់ដេរនៅកម្ពុជាហៅកាត់ថា GMAC បានស្នើឲ្យលោកនាយករដ្ឋមន្រ្តី ហ៊ុន សែន ពិចារណាឡើងវិញ ចំពោះវិធានការនេះ។ នេះបើតាមសេចក្តីថ្លែងការណ៍របស់ GMACជាលើកទី៣ កាលពីម្សិលមិញ។
បើតាម GMAC វិធានការរបស់រដ្ឋាភិបាលនៅពេលនេះ បង្កជាការគំរាមកំហែងថ្មីមួយទៀតដល់វិស័យកាត់ដេរសំលៀកបំពាក់ ស្បែកជើង និងកាបូប ដែលកំពុងប្រឈមនឹងការប្រកួតប្រជែងខ្លាំងលើទីផ្សារពិភពលោក និងពេលវេលាផលិតដែលអ្នកបញ្ជាទិញដាក់ឲ្យដែលកាន់តែខ្លីទៅៗ។ ហើយថាវិធានការតឹងរឹងរបស់រដ្ឋាភិបាលកម្ពុជាប៉ុន្មានថ្ងៃមកនេះ ក៏អាចធ្វើឲ្យប៉ះពាល់ដល់៥០%នៃសកម្មភាពនាំចេញ-នាំចូលរបស់រោងចក្រ បើសិនមិនមានជម្រើសណាបណ្តោះអាសន្ន។
ទោះជាយ៉ាងណា មកទល់ពេលនេះ នៅពុំទាន់មានកិច្ចអន្តរាគមន៍ណាមួយនៅឡើយទេពីសំណាក់លោកនាយករដ្ឋមន្ត្រីហ៊ុន សែន ខណៈGMAC ស្នើសុំឲ្យលោកដែលជាអ្នកដាក់បទបញ្ជា ពិចារណាឡើងវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ