ក្នុងមួយឆ្នាំៗ នៅប្រទេសបារាំង មានមនុស្សប្រមាណ ១១លាននាក់មានគ្រោះថ្នាក់ក្នុងជីវភាពរស់នៅប្រចាំថ្ងៃ នៅក្នុងបរិវេណផ្ទះ។ ហើយគ្រោះថ្នាក់នៅផ្ទះនេះ បានសម្លាប់ជីវិតមនុស្ស២ម៉ឺននាក់ ពោលគឺច្រើនជាងគ្រោះថ្នាក់ចរាចរណ៍ដល់ទៅបីដង និងជាមូលហេតុមរណៈទីមួយរបស់កុមារអាយុក្រោយម៤ឆ្នាំ។ នេះបើតាមតុល្យការរាប់តែនៅស្រុកបារាំង។ មនុស្សចាស់ និងកុមារ ជាជនរងគ្រោះទីមួយ។ ដួលជំពប់ បាក់គ្រេច រលាក ពុល ថប់ដង្ហើម ....គ្រោះថ្នាក់ ភាគច្រើន កើតឡើងនៅក្នុងផ្ទះ តែម្តង។ នៅចំពោះមុខគ្រោះថ្នាក់ទាំងនេះ តើអ្នកត្រូវធ្វើដូចម្តេចខ្លះ ?
ផ្ទះជាជម្រកដ៏កក់ក្តៅសម្រាប់មនុស្សគ្រប់រូប ! ប៉ុន្តែផ្ទះក៏ជាកន្លែងសម្បូរគ្រោះថ្នាក់ សម្រាប់មនុស្សលោកទូទៅ ជាពិសេសកុមារនិងមនុស្សចាស់ដែរ។ គ្រោះថ្នាក់ដែលកើតឡើងយ៉ាងញឹកញាប់ជាងគេបំផុត និងដែលធ្វើឱ្យមនុស្សចាស់ស្លាប់ច្រើនជាងគេបំផុត គឺការដួល ! ដួលនៅផ្ទះតំណាងឱ្យ៨៥%នៃគ្រោះថ្នាក់ដួលជាទូទៅ។
ដើម្បីចៀងវាងគ្រោះថ្នាក់ដួលនៅក្នុងផ្ទះ គេត្រូវរៀបចំផ្ទះឱ្យស្រលះ
- កុំដាក់តុទូ នៅទើសផ្លូវដើរ
- ធ្វើផ្ទៃឱ្យរាបស្មើ និងកុំឱ្យរអិលនៅកន្លែងមុជទឹក
- រើសវត្ថុអីវ៉ាន់កុំឱ្យរាយលើដី សូមប្រយ័ត្នកុំឱ្យមានខ្សែភ្លើង ក្រណាត់ ដែលអាចទាក់ជើងដួល
- ផ្តល់ពន្លឺតាមផ្លូវដើរ តាមជណ្តើរ
- ដាក់បង្កាន់ដៃ នៅជណ្តើរ នៅបង្គន់ បន្ទប់ទឹក
ចំណែកការពុល ថប់ដណ្តើម ស្លាក់ រលាក ... គឺជាតំណាងគ្រោះថ្នាក់នៅផ្ទះ លំដាប់ទីមួយ ដែលច្រើនកើតឡើងចំពោះក្មេង និងកុមារ។ ហើយសូមបញ្ជាក់ថា គ្រោះថ្នាក់ទាំងអស់នេះ ភាគច្រើនកើតឡើងនៅក្នុងផ្ទះ ដែលកន្លែងរស់នៅជាប្រចាំថ្ងៃរបស់យើងតែម្តង។
ទារកចាប់ពីអាយុ១៨ខែឡើងទៅ អាចចាប់បាន និងយល់នូវអ្វីដែលមនុស្សចាស់ប្រាប់ ស្តីអំពីវិធានសុវត្ថិភាព និងបម្រាមហើយ ដូចជាហាមដាក់ដាក់នៅត្រចៀកទ្វារ កុំរត់ដោយកាន់របស់ស្រួចៗឬមុត កុំប៉ះភ្លើង កុំប៉ះចង្ក្រានវាអាចរលាកជាដើម។ល។ ប៉ុន្តែការប្រុងប្រយ័ត្នរបស់ឪពុកម្តាយនិងអ្នកថែ ត្រូវរក្សាជាប់ជានិច្ច ព្រោះថាមុនអាយុ៦ឆ្នាំ ក្មេងគ្មានស្មារតី សតិ យល់អំពីភាពធាតុពិតនៃគ្រោះថ្នាក់ទេ រវល់លេងពេកក្មេងអាចភ្លេចបណ្តាំ និងបម្រាមម្តាយ ភ្លាមមួយរំពេច។ មានសកម្មភាពខ្លះ កុមារចាំបាច់ត្រូវប្រើប្រដាប់ការពារសុវត្ថិភាព ដូចជាត្រូវពាក់មួយពេលជិះកង់ ឬជិះវត្ថុរអិល។
ជាទូទៅ គ្រោះថ្នាក់នៅក្នុងផ្ទះសុទ្ធតែអាចបញ្ចៀស និងកាត់បន្ថយមិនឱ្យក្លាយជាបញ្ហាធំ ឬបន្សល់ទុកនូវផលវិបាកធ្ងន់ធ្ងរបានទៅថ្ងៃក្រោយ ប្រសិនបើ យើងមានការប្រុងប្រយ័ត្ន និងចេះបញ្ចេញកាយវិការជួយបានដោយត្រឹមត្រូវ និងទាន់ពេលវេលា។ សួរថាតើកាយវិការសង្គ្រោះមានអ្វីខ្លះ ? និងយ៉ាងដូចម្តេចខ្លះ ?
ក្នុងករណីរលាក៖ ទោះជាការរលាកដោយភ្លើង ដោយទឹកពុះ ឬប្រភពក្តៅ ត្រូវយកទឹកត្រជាក់ធម្មតា ស្រោចឱ្យចំកន្លែងរបួស រយៈពេល១៥នាទី រួចពន្លត់ប្រភពកម្តៅ។ ដោះខោអាវដែលឆេះ រលាកចេញ លើកលែងតែក្នុងករណីអាវខោនោះស្អិតជាប់សាច់រលាក។
ក្នុងករណីមុតហូរឈាម ត្រូវផ្តេកអ្នកជំងឺ ហើយខ្ទប់របួស ប៉ុន្តែសូមកុំសាកល្បងដកវត្ថុដែលមុតក្នុងសាច់ចេញឱ្យសោះ ព្រោះអាចធ្វើអ្នកជំងឺហូរឈាមខ្លាំង រហូតខ្សោះ។ ត្រូវបង្អាក់ការហូរឈាមដោយច្របាច់សង្កត់ខ្ទប់ចំលើស្នាមរបួស រុំ ឬរកក្រណាត់ចងឱ្យតឹងខាងផ្នែកលើនៃរបួស បើជាករណីរបួសខ្លាំងមែនទែន ប្រឈមនឹងគ្រោះខ្សោះឈាម។
ក្នុងករណីមានគ្រោះថ្នាក់ប៉ះលើអវៈយវៈ ជាម្រាមដៃ ម្រាមជើង របួសដាច់ ឬបាក់ធ្មេញ ត្រូវរក្សាទុកនូវបំណែកសាច់ ឬឆ្អឹងនោះ ឱ្យបានត្រឹមត្រូវ នៅក្នុងស្បោងស្អាត ហើយរុំក្លាសេឱ្យជិត និងឆាប់រូតរះទៅរកជួបគ្រូពេទ្យ នៅមជ្ឈមណ្ឌលសុខភាព ឬគ្លីនិក ឱ្យបានកាន់តែឆាប់កាន់តែប្រសើរ ដើម្បីព្យាបាលតភ្ជាប់វិញ។ ការតភ្ជាប់មានប្រសិទ្ធិភាពខ្លាំង ប្រសិនបើធ្វើនៅក្រោម៦ម៉ោង។
បើមានគ្រោះថ្នាក់ប៉ះដល់ក្បាល ហើយបាត់បង់ស្មារតី តែនៅមានដង្ហើម ត្រូវផ្អេកអ្នកជំងឺ ក្នុងដំណេកផ្អៀង ចំហមាត់ ជង្គង់ជើងខាងលើទល់នឹងដី បាតដៃ (ដៃខាងលើ)បត់ទ្រទ្រាប់ថ្ពាល់ កុំឱ្យប៉ះដី។ និងផ្ទៀងផ្ទាត់ដង្ហើម។ (សូមអានអំពីបច្ចេកទេសផ្តេកអ្នកជំងឺក្នុងជំហសុវត្ថិភាព)
ប្រសិនបើអ្នករងគ្រោះថ្នាក់ បាត់ស្មារតី និងបាត់ដង្ហើម សូមចាប់ផ្តើមធ្វើម៉ាស្សាបេះដូងភ្លាម ដោយដាក់ដៃរបស់យើងទាំងពីរត្រួតលើគ្នា ចំពីលើដើមទ្រូង ត្រង់ចន្លោះក្បាលដោះទាំងពីរ សង្កត់ក្នុងល្បឿន១០០ដង ក្នុងមួយនាទី។ ទន្ទឹមគ្នានោះត្រូវហៅឡានពេទ្យនិងក្រុមសង្គ្រោះជាបន្ទាន់។
សូមចងចាំថា ក្នុងករណីជាគ្រោះថ្នាក់ បុក ធ្លាក់ ដែលអាចបណ្តាលឱ្យមានការបាក់ប្រេះស្រាំឆ្អឹងខ្នង និងលលាដក្បាល សូមប៉ះពាល់លើកដាក់ និងប្រែប្រួលជនរងគ្រោះ ដោយប្រុងប្រយ័ត្នបំផុត និងយកល្អជួយទប់ក្បាលជនរងគ្រោះឱ្យនៅនឹង ព្រមទាំងសម្រួលអារម្មណ៍ជនរងគ្រោះ ក្នុងពេលរង់ចាំពេទ្យជំនាញសង្គ្រោះមកដល់។
បច្ចេកទេសនៃវិធីសង្គ្រោះ
បើនិយាយអំពីវិធីជួយសង្គ្រោះវិញ សូមចងចាំថា ជាដំបូងបង្អស់ សូមលោកអ្នកការពារសុវត្ថិភាព និងចេះវាយតម្លៃអំពីលក្ខខណ្ឌនៅកន្លែងគ្រោះថ្នាក់ ដើម្បីធ្វើយ៉ាងណាកុំឱ្យមានគ្រោះថ្នាក់ថែមមួយជាន់ទៀត។ សូមចូលទៅកាន់កន្លែងគ្រោះថ្នាក់ ជួយជនរងគ្រោះ តែក្នុងករណីតែអ្នកប្រាកដថាគ្មានគ្រោះថ្នាក់សម្រាប់ខ្លួនឯង ហើយហៅរកក្រុមអ្នកជំនាញសង្គ្រោះនិងពន្លាតរង្វង់សុវត្ថិភាព ក្នុងពេលរង់ចាំក្រុមគ្រូពេទ្យមកដល់។
បន្ទាប់មកអ្នកត្រូវពិនិត្យស្ថានភាពអ្នករងគ្រោះ ដើម្បីបានដឹងថាតើជាគ្រោះថ្នាក់អ្វី ជនរងគ្រោះនៅមានស្មារតីដែរឬអត់ ដោយហៅនិងស្តាប់ដង្ហើម មុននឹងចាប់ផ្តើមអនុវត្តវិធីសង្គ្រោះ ទៅតាមករណីជាក់ស្តែង ដោយអារម្មណ៍ជឿជាក់ និងមិនស្លន់ស្លោ។
ស្ទះឬស្លាក់ ៖ បើជនរងគ្រោះ មានសតិស្មារតីត្រឹមត្រូវ តែនិយាយមិនចេញ អាចត្រឹមផ្តល់សញ្ញាគ្រវីឬងក់ក្បាលបាន មិនអាចក្អក ឬបញ្ចេញសំឡេងអ្វី បាន សូមតប់ខ្នង ជនរងគ្រោះ យ៉ាងច្រើនបំផុត៥ដង ! តប់ម្តងហើយត្រូវផ្ទៀងផ្ទាត់ភ្លាមថាជនរងគ្រោះបានស្រួលមកវិញ សិមតប់ម្តងទៀត។ ការតប់គឺត្រូវធ្វើដោយលាបាតដៃ វាយត្រង់ថ្លើមដៃ (មិនក្តាប់តប់ទេ)។ វិធីតប់ ៖ ឈរនៅចំហៀងបញ្ឆិតក្រោយបន្តិចពីជនរងគ្រោះ យកដៃម្ខាងទៅទ្រទ្រូងជនរងគ្រោះ ដែលឈររាងអោនទៅចុះក្រោមបន្តិច រួចផ្តើមតប់ខ្នងខ្លាំងល្មមនឹងធាក់វត្ថុស្ទុះឱ្យខ្ទាតចេញមកក្រៅ។
ប្រសិនបើការតប់៥ដងហើយ ជនរងគ្រោះនៅមិនព្រមធូរ ត្រូវប្រើវិធីម្យ៉ាងទៀត សង្កត់សម្ពាធនៅពោះ។ វិធីធ្វើ ត្រូវអោបអ្នករងគ្រោះពីក្រោយ ដោយយក ដៃម្ខាងក្តាប់ និងក្តោបទប់ដោយបាតដៃម្ខាងទៀត ដាក់ផ្អិបត្រង់ចុងដង្ហើមរបស់ជនរងគ្រោះ រួចបុកបែបរុញឡើងមកលើ។ បើធ្វើកាយវិការបែបនេះ៥ដងហើយ ជនរងគ្រោះនៅស្ទះស្លាក់ដដែល ត្រូវបន្តធ្វើវាទៀត ដោយឆ្លាស់ជាមួយការតប់ខ្នង។ កាយវិការបែបនេះ អាចធ្វើចំពោះមនុស្សធំពេញវ័យនិងកុមារចាប់ពីអាយុមួយឆ្នាំឡើងទៅ និងចៀសវាងកុំលើកជើងកូនបញ្ច្រាសទម្លាក់ក្បាលចុះក្រោមឱ្យសោះ។
វិធីផ្តេកជនរងគ្រោះក្នុងដំណេកសុវត្ថិភាព
ប្រសិនបើជនរងគ្រោះបាត់ស្មារតី លែងដឹងខ្លួន ប៉ុន្តែនៅមានដង្ហើម និងដកជាធម្មតា អ្នកត្រូវជួយការពារជនរងគ្រោះកុំឱ្យស្ទះផ្លូវដង្ហើម។
ជាទូទៅ នៅពេលមនុស្សណាម្នាក់ បាត់ស្មារតី សាច់ដុំតែងតែរលា អណ្តាតអាចនឹងធ្លាក់ចូលក្នុងបំពង់ក ហើយទៅបិទបំពង់ដង្ហើម។ សូមផ្ងើយក្បាលអ្នករងគ្រោះដោយដៃម្ខាង សង្កត់លើថ្ងាស ដៃម្ខាងទៀតទប់ចង្ការ ដាក់ត្រចៀកយើងក្បែរច្រមុះជនរងគ្រោះ ដើម្បីស្តាប់ខ្យល់ ភ្នែកសំឡឹងមើលចលនាដើមទ្រូង។ បន្ធូរសំលៀកបំពាក់ និងរបស់ដែលតឹងរួតរឹតចេញ បើអាច។ បើមានដំណកដង្ហើម យើងត្រូវរៀបចំស្ថានភាពដំណេកសុវត្ថិភាព ដោយដាក់ជនរងគ្រោះឱ្យដេកផ្អៀង ដែលគេហៅជាភាសាបច្ចេកទេសថា PLS (Position latérale de sécurité) ក្នុងពេលរង់ចាំជំនួយពីគ្រូពេទ្យ។
វិធីធ្វើ
- បើជនរងគ្រោះពាក់វែនតា ត្រូវដោះវែនតាចេញ
- សណ្តូកជើងជនរងគ្រោះទាំងពីរឱ្យជិតទន្ទឹមគ្នា ស្របតាមដងខ្លួន
- យកដៃជនរងគ្រោះដែលនៅជិតអ្នកបំផុត បត់កែងទៅលើ
- អ្នកត្រូវលត់ជង្គង់អង្គុយឱ្យកៀកអ្នករងគ្រោះ
- ចាប់យកដៃម្ខាងទៀតរបស់ជនរងគ្រោះ ដោយពន្លារបាតដៃ មកដាក់ផ្អិបនឹងត្រចៀកខាងដៃបត់កែងទៀត (បើជាដៃស្តាំត្រូវយកមកផ្អិបនឹងត្រចៀកឆ្វេង បើជាដៃឆ្វេងត្រូវយកទៅផ្អិបនៅត្រចៀកស្តាំ) និងសូមកាន់ដៃនោះឱ្យជាប់កុំទាន់ព្រលែងដៃអ្នកចេញ
- យកដៃរបស់អ្នកម្ខាងទៀត ទៅចាប់គន្លាក់ជង្គង់នៃជើងអ្នករងគ្រោះដែលនៅឆ្ងាយពីអ្នកជាងគេ បញ្ឈរឡើងតែនៅបាតជើងនៅបះដីរហូត
- រួចបង្ខិតខ្លួនឯងឱ្យឆ្ងាយពីខ្លួនអ្នករងគ្រោះ ដោយទាញជង្គង់បញ្ឈរមកខាងអ្នក រហូតដល់ទាល់តែជង្គង់បះដី ពេលនោះអ្នករងគ្រោះនឹងរមៀលផ្អៀងមកដោយសម្រួលហើយ
- ដកដៃរបស់អ្នកដែលពី ក្រោមក្បាលជនរងគ្រោះដោយថ្មមៗ ដោយរក្សាដៃអ្នករងគ្រោះឱ្យនៅ ទ្រមុខគាត់ជាប់
- សម្រួលជើងគាត់ឱ្យបត់កែង កុំឱ្យគងគ្នា
- យកម្រាមដៃទៅចុចបង្ហើបមាត់គាត់បន្តិច តែកុំរង្គើរដល់ក្បាល
- ប្រសិនបើអ្នកនៅម្នាក់ឯង ពេលនេះអ្នកអាចរត់ទៅហៅជំនួយបាន
ជនរងគ្រោះបាត់ស្មារតី បាត់ដង្ហើម
ប្រសិនបើជនរងគ្រោះសន្លប់បាត់ស្មារតី លែងដកដង្ហើម ត្រូវរូតរះធ្វើម៉ាស្សាបេះដូង ភ្លាម និងហៅក្រុមពេទ្យមកសង្គ្រោះ។
វិធីធ្វើម៉ាស្សាបេះដូង ៖
- ដាក់ជនរងគ្រោះ លើផ្ទៃរាប ឬផ្ទាល់នឹងដី
- អ្នកត្រូវលត់ជង្គង់ឱ្យកៀកអ្នកសន្លប់
- ដាក់កែងបាតដៃអ្នកឱ្យចំកណ្តាលទ្រូង កំរិតស្មើនឹងក្បាលដោះ (ឡើងពីចុងដង្ហើមបីបួនធ្នាប់)
- ដាក់កែងបាតដៃអ្នកម្ខាងទៀតពីបាតដៃទីមួយ ផ្អិបគ្នាឱ្យជាប់ ដើម្បីមានកម្លាំងដៃ
- រក្សាជំហរអ្នកយ៉ាងណាឱ្យដៃលាអស់ និងឱ្យត្រង់ ទម្រាក់កម្លាំងដៃរបស់អ្នកតាំងពីស្មាមក សង្កត់ឱ្យត្រង់លើទ្រូងជនរងគ្រោះ ក្នុងទម្ងន់កម្លាំងផុងប្រមាណជាង៥ទៅ៦សង់ទីម៉ែត្រ ក្នុងល្បឿនប្រមាណជា១០០ក្នុងមួយនាទី ចំនួន៣០ដង រួចបើអាចត្រូវឆ្លាស់ជាមួយនឹងការផ្លុំខ្យល់តាមមាត់បន្ថែមចំនួនពីរ ផាំង។ បន្ទាប់មកត្រូវចាប់ផ្តើមធ្វើមាស្សាបេះដូងនេះទៀត រហូតទាល់ក្រុមគ្រូពេទ្យសង្គ្រោះមកដល់
វិធីផ្លុំបញ្ចូលខ្យល់ ៖ ត្រូវយកដៃម្ខាងដាក់លើថ្ងាស សង្កត់ផ្ញើយក្បាលបន្តិច រួចយកម្រាមដៃច្របាច់បិទច្រមុះ ដៃម្ខាងទៀត ចាប់ទាញចង្កាដើម្បីបង្ហើបមាត់។ ត្រូវយកមាត់របស់យើងគ្របឱ្យជិតមាត់ជនរងគ្រោះ រួចផ្តុំខ្យល់បញ្ចូលយឺតៗ ដោយងាកភ្នែកសំលឹងមើលទ្រូង រហូតប៉ោងស្មើ។ សំរាកដកដង្ហើមមួយភ្លែតឱ្យទ្រូងអ្នករងគ្រោះស្រកចុះមកវិញ ទើបចាប់ផ្លុំម្តងទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ