ម៉ាសមាឌខ្លួនធំឬតូចមិនសំខាន់ទេ ! សំខាន់សូមមើលក្បាលពោះរបស់អ្នក ! បើមានរាងល្មម តែដុះក្បាលពោះធំ ប៉ោងដូចផ្លែប៉ោម នោះមានន័យថាសុខភាពបេះដូងប្រឈមនឹងគ្រោះថ្នាក់ហើយ។ នេះបើតាមការអ្នកស្រាវជ្រាវអាមេរិក។ តើបេះដូងនិងក្បាលពោះមានទំនាក់ទំនងគ្នាយ៉ាងណា ? ក្បាលពោះប៉ុណ្ណាដែលចាត់ទុកធំ ជាតំណាងគ្រោះថ្នាក់សម្រាប់សុខភាព ?
ទំហំពោះ គឺជាកញ្ចក់ឆ្លុះបញ្ចាំងអំពីសុខភាពបេះដូងឬ ? មែន ! បើតាមការស្រាវជ្រាវរបស់អ្នកវិទ្យាសាស្ត្រអាមេរិក ក្បាលពោះធំ ជាកត្តាគ្រោះថ្នាក់ សម្រាប់បេះដូង ខ្លាំងជាងការធាត់ជ្រុលចុកខ្លាញ់ទៅទៀត។ ទំហំនៃពោះ ការដុះក្បាលពោះ និងការមានខ្លាញ់សល់ទៅកកនៅក្នុងពោះ អាចបង្កើនគ្រោះកើតជំងឺសរសៃឈាមបេះដូង មួយទ្វេជាពីរ។ ដុះក្បាលពោះធំ មានគ្រោះថ្នាក់ ចំពោះសុខភាពបេះដូងខ្លាំងជាងមានជំងឺធាត់ជ្រុលទៅទៀត បើទោះបីជាអ្នកមានទម្ងន់សមល្មមនិងកម្ពស់ក៏ដោយ។ អ្នកមានទម្ងន់ធម្មតា ប៉ុន្តែក្បាលពោះធំ នោះអ្នកនឹងមានគ្រោះហានិភ័យខ្ពស់ជួបបញ្ហាបេះដូង ច្រើនជាងមនុស្សធាត់ ធាត់ចុកខ្លាញ់ តែគ្មានក្បាលពោះ ទៅទៀត។ នេះបើសេចក្តីពន្យល់របស់អ្នកស្រាវជ្រាវអាមេរិក Jose Medina-Inojosa។
ឬបើនិយាយឱ្យខ្លី ទំហំក្បាលពោះ ធំជ្រុលជាតំណាងគ្រោះថ្នាក់ខ្លាំងជាងសន្ទទស្សន៍ម៉ាសមាឌរាងកាយទៀត។ បើតាមអង្គការសុខភាពពិភពលោក សន្ទទស្សនម៉ាសមាឌរាងកាយត្រឹមត្រូវ ត្រូវស្ថិតនៅចន្លោះពី ១៨-២៥។ ដើម្បីគណនា គេត្រូវយកទម្ងន់ ជាគីឡូក្រាម ទៅចែកនឹងកម្ពស់ដែលលើកជាការ៉េ ៤៣Kg ៖ ១,៥m2។ ឧទាហរណ៍ មនុស្សកម្ពស់ ១,៥ម៉ែត្រ ត្រូវមានទម្ងន់ត្រឹម ពី ៤៣ទៅ៥៦Kg។
ក្បាលពោះ ដែលគេចាត់ទុក និងរាប់បានថាជាសញ្ញាគ្រោះថ្នាក់ ឬមានជំងឺក្បាលពោះធំជ្រុល ត្រូវមានទំហំប៉ិន ឬធំជាងទំហំត្រគៀក៩០% សម្រាប់បុរស និង៨៥%សម្រាប់ស្ត្រី។ អ្នកទៅជួបពិគ្រោះសុខភាពជាមួយគ្រូពេទ្យ នៅពេលវាស់ឃើញថាទំហំចង្កេះរបស់អ្នកធំជាងទំហំត្រគៀក។ នេះបើតាមសេចក្តីណែនាំរបស់អ្នកស្រាវជ្រាវ។ លទ្ធផលនៃការស្រាវជ្រាវ ជាឱកាសរំលឹកឡើងវិញអំពីសារៈសំខាន់នៃការគិតគូរវាស់ទំហំខ្លួន។ អនុសាសន៍នាបច្ចុប្បន្ននេះ មិនបានវាយតម្លៃអំពីភាពធាត់និងដុះក្បាលពោះធំជ្រុលរបស់បុគ្គលដែលមានសន្ទទស្សន៍ម៉ាសរាងកាយធម្មតា ហើយមនុស្សមួយចំនួន ក៏មិនបានដឹងអំពីផលប៉ះពាល់នៃក្បាលពោះចំពោះសុខភាពដែរ។
សំណួរចម្លើយរបស់លោកស្រី វេជ្ជបណ្ឌិត Corinne Chicheportiche-Ayache ៖
ហេតុអ្វីខ្លាញ់នៅក្បាលពោះសោះបែរជាប៉ះពាល់នាំឱ្យខូចសុខភាពបេះដូងទៅវិញ ?
“ចាស ខ្លាញ់ពោះ ឬខ្លាញ់នៃគ្រឿងក្នុង Graisses Viscérales ពុលខ្លាំងណាស់ សម្រាប់ប្រព័ន្ធសរសៃឈាមបេះដូង។ ខ្លាញ់នេះពុលខ្លាំងសម្រាប់បេះដូង ព្រោះវាកត្តានាំឱ្យមានភាពស៊ាំនឹងជាតិអាំងស៊ុយលីន។ មានន័យថាអាំងស៊ុយលីន អ័រមូនបញ្ចេញដោយលំពែង ដែលមានភារៈចាត់ចែងកំរិតជាតិស្ករនៅក្នុងឈាម យកជាតិស្ករពីឈាមទៅចិញ្ចឹមកោសិកា លែងមានដំណើរល្អ និងត្រឹមត្រូវ។ ភាពស៊ាំនឹងអាំងស៊ុយលីនបែបនេះ នឹងជំរុញឱ្យយើងឆាប់មានបញ្ហាទឹកនោមផ្អែម ក្នុងរយៈពេលខ្លីមធ្យម ហើយយូរបន្តិចក្រោយមកទៀត បើលំពែងលែងអាចផលិតអាំងស៊ុយលីនបានតាមតួនាទី នោះនឹងមានផលវិបាកយ៉ាងច្រើនពាក់ព័ន្ធនឹងជំងឺសរសៃឈាមបេះដូង។”
ក្រៅអំពីជំងឺទឹកនោមផ្អែម តើអ្នកមានក្បាលពោះធំជ្រុល មានគ្រោះកើតជំងឺអ្វីខ្លះទៀតទេ ?
“ជាទូទៅ គឺពពួកជំងឺមេតាបូលិក និងបណ្តុំសហសញ្ញារោគ ដូចជាមានរោគសញ្ញាបញ្ជាក់ពីភាពមិនប្រក្រតីជាច្រើនប្រចាំកាយ មានអត្រាជាតិខ្លាញ់ក្នុងឈាម HDL ដែលជាកូឡេស្តេរ៉ូលល្អ ទាប- មានសម្ពាធឈាមខ្ពស់ខ្លាំង (មានរោគលើសឈាម)។ អាការៈទាំងនេះជាកត្តានាំមុខឆ្ពោះទៅរកគ្រោះកើតជំងឺទឹកនោមផ្អែម ជំងឺពាក់ព័ន្ធនឹងសរសៃឈាមបេះដូងដូចជា ដាច់សរសៃឈាមក្នុងខួរក្បាល ឬស្ទះសរសៃឈាម ស្លោកបេះដូងជាដើម។
តើក្បាលពោះទំហំប៉ុណ្ណា ដែលគេចាត់ទុកជាជំងឺ ?
ដើម្បីបានដឹងថាអ្នកមានជំងឺដុះពោះធំជ្រុលឬអត់ គេមិនចាំបាច់ទៅណាត់ជួបពេទ្យ ឬរកអ្នកជំនាញអ្វីទេ យកតែខ្សែម៉ែត្រជាងដេរមកវាស់ ទំហំពោះ ត្រឹមផ្សិត គឺជាការស្រេច ! គេចាត់ទុកពោះដុះធំជ្រុល នៅពេលទំហំពោះឡើងលើសពី ៨០សង់ទីម៉ែត្រសម្រាប់ស្ត្រី និងលើសពី ៩៤សង់ទីម៉ែត្រសម្រាប់បុរស។
បច្ចុប្បន្ននេះ ដើម្បីការពារគ្រោះកើតជំងឺសរសៃឈាមបេះដូង ក្រុមគ្រូពេទ្យបានផ្តល់អនុសាសន៍ឱ្យតាមដានសន្ទទស្សន៍ម៉ាសរាងកាយ IMC ឱ្យប្រយ័ត្ននឹងការឡើងទម្ងន់ និងមិនដែលលើកឡើងអំពីបញ្ហាទំហំក្បាលពោះទេ។ តើយើងត្រូវស្តាប់អនុសាសន៍មួយណាទៅ ? ហើយមួយណាត្រូវជាងមួយណា?
ទាំងពីរ ! ការគិតគូរសន្ទទស្សន៍ម៉ាសរាងកាយ និងទំហំក្បាលពោះ សុទ្ធតែមានតម្លៃ និងយកជាការបានទាំងពីរ។ ប៉ុន្តែនេះជាចំណោទទាក់ទងនឹងទម្លាប់សង្គមមួយ នៅពេលទៅជួបពិគ្រោះជាមួយគ្រូពេទ្យ អ្នកជំងឺងប់ចង់ដឹងខ្លាំងតែលើទម្ងន់ ខ្លាចធាត់ជ្រុល និងមិនសូវខ្វល់សួរពីបញ្ហារង្វាស់ចង្កេះទេ ជាពិសេសចំពោះបុរសនិងស្ត្រីវ័យចំណាស់។ ព្រោះសម្រាប់ស្ត្រី ជាធម្មតា នៅពេលណាដែលគាត់ចាប់អស់រដូវ គាត់លែងសូវមានអ័រមូន អេស្ត្រូហ្សែន គាត់ចាប់ផ្តើមដុះពោះហើយ។ ហេតុដូច្នេះហើយជាពួកគាត់មិនសូវចាប់អារម្មណ៍ខ្លាំងនឹងទំហំចង្កេះនោះទេ។ ប៉ុន្តែការងាររបស់ពួកយើងដែលជាគ្រូពេទ្យ យើងមានតួនាទីត្រូវរំលឹកអ្នកជំងឺថា ទម្ងន់ (សន្ទទស្សន៍ម៉ាសរាងកាយ វាស់វែងពីទម្ងន់ឱ្យស៊ីនិងកម្ពស់) ជារង្វាស់សំខាន់មែនហើយ តែមិនគ្រប់គ្រាន់ទាំងស្រុងទេ។ មនុស្សម្នាក់អាចមានរង្វាស់សន្ទទស្សន៍ម៉ាសរាងកាយល្អធម្មតា មានទម្ងន់ត្រូវតាមក្បួនខ្នាតសុខភាព ប៉ុន្តែរង្វង់ចង្កេះធំជ្រុល។ នៅពេលជួបករណីបែបនេះ ក្រុមគ្រូពេទ្យ ត្រូវតែទាមទារធ្វើការត្រួតពិនិត្យសុខភាពពួកគាត់បន្ថែម ដូចជាតាមដានមើលសម្ពាធឈាម កំរិតជាតិខ្លាញ់ ដើម្បីកំរិតហានិភ័យនៃគ្រោះនាំទៅកើតជំងឺសរសៃឈាមបេះដូង។
តើអ្នកគ្រូពេទ្យមានដំបូន្មានពិសេសអ្វីសម្រាប់ជួយសម្រកក្បាលពោះដែរឬទេ ?
គ្មានដំបូន្មានអ្វីជាពិសេស សម្រាប់សម្រកក្បាលពោះទេ ! គឺមានតែប្រាប់ឱ្យប្រឹងធ្វើលំហាត់ប្រាណ ធ្វើកីឡាឱ្យបានជាប្រចាំ។ ការធ្វើកីឡា បញ្ចេញថាមពលរាងកាយ បានជួយបញ្ចុះភាពស៊ាំអាំងស៊ុយលីន ! ខ្ញុំដឹងថាសេចក្តីណែនាំឱ្យធ្វើកីឡា ហាត់ប្រាណ បញ្ចេញសកម្មភាពផ្លូវកាយ ជាដំបូន្មានដ៏ទូលំទូលាយពេកណាស់ តែការធ្វើលំហាត់ប្រាណ មានតម្លៃពិតសម្រាប់សុខភាពទូទៅ។ អ្វីដែលក្រុមគ្រូពេទ្យ អាចអះអាងដោយច្បាស់ៗបាន គឺប្រសិនបើអ្នកសម្រកទម្ងន់បាន១០% នោះអ្នកនឹងអាចបញ្ចុះក្បាលពោះបានប្រមាណជិត៣០%។ ដូច្នេះការសម្រកទម្ងន់ ជាវិធីល្អដែលប្រសើរជាងគេ។ លោកអ្នកអាចជ្រើសរើស ការធ្វើរបបអាហារ ក៏បាន ដោយត្រូវទទួលទាននូវចំណីអាហារណាដែលពុំសូវមានថាមពល។ រក្សារបបអាហារឱ្យមានលំនឹង និងចៀសវាងកុំទទួលអាហារផ្អែម មានជាតិស្ករច្រើន ចំណីចំណុកនំបែបឧស្សាហកម្មដែលមានបង្កប់ជាតិស្ករបំផ្លែង និងដែលជ្រាបចូលក្នុងខ្លួនលឿនជ្រុល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ