ក្រសួងសាធារណការ នឹងដាក់ឲ្យដំណើរការផ្លូវរថភ្លើង បាត់ដំបង-ពោធិ៍សាត់ នៅថ្ងៃស្អែក
ក្រសួងសាធារណការនិងដឹកជញ្ជូន នៅថ្ងៃអង្គារ ទី២៩ឧសភាស្អែកនេះ នឹងដាក់ឲ្យប្រើប្រាស់ជាបណ្ដោះអាសន្ន គម្រោងផ្លូវរថភ្លើងដឹកអ្នកដំណើរពីខេត្តបាត់ដំបង ទៅកាន់ខេត្តពោធិ៏សាត់ និងត្រឡប់មកវិញ។ ផ្លូវរថភ្លើងពីស្ថានីយ៍បាត់ដំបង-ពោធិ៍សាត់ មានប្រវែងសរុប១០៧គីឡូម៉ែត្រ ដែលក្នុងនោះ ប្រវែង៧៥គីឡូម៉ែត្រស្ថិតនៅក្នុងខេត្តបាត់ដំបង និង៣២គីឡូម៉ែត្រទៀតស្ថិតនៅក្នុងខេត្តពោធិ៍សាត់។
ចុះផ្សាយនៅថ្ងៃ៖
ផ្លូវរថភ្លើងបាត់ដំបង-ពោធិ៍សាត់ ដែលមានប្រវែងសរុប១០៧គីឡូម៉ែត្រ ត្រូវធ្វើដំណើរឆ្លងកាត់ស្ថានីយរថភ្លើងចំនួន១៦ រួមមាន៖ បាត់ដំបង អូរដំបង អូរស្រឡៅ រាំងកេសី ស្វាយជាតិ ភ្នំធិបតី គោកត្រុំ កោះចារ មោងឬស្សី ព្រៃស្វាយ កាឡោមពុក ស្វាយដូនកែវ បឹងខ្នារ ត្រពាំងជង ស្នាមព្រះ និងពោធិ៍សាត់។ ក្នុងនោះ ស្ថានីយ៍នៅក្នុងខេត្តបាត់ដំបងមានចំនួន១១ស្ថានីយ៍ ខណៈស្ថានីយ៍នៅក្នុងខេត្តពោធិ៍សាត់មានចំនួន៥។
គួរជម្រាបថា ផ្លូវរថភ្លើងពីបាត់ដំបងទៅកាន់ពោធិ៍សាត់នេះ គឺជាផ្នែកមួយនៃកំណាត់ផ្លូវដែកពីប៉ោយប៉ែតមកភ្នំពេញ ដែលមានប្រវែងសរុប៣៨៦គីឡូម៉ែត្រ។ ផ្លូវដែកដែលសាងសង់ក្នុងសម័យអាណានិគមនិយមបារាំងនេះ ត្រូវបានបំផ្លិចបំផ្លាញនិងបោះបង់ចោលក្នុងអំឡុងពេលកម្ពុជាធ្លាក់ក្នុងភ្លើងសង្គ្រាម ទសវត្សរ៍ឆ្នាំ១៩៧០ មុននឹងរៀបចំស្ដារដាក់ឲ្យប្រើប្រាស់ឡើងវិញជាបន្តបន្ទាប់ ជាអាថិ៍៖ កំណាត់ផ្លូវដែកពីប៉ោយប៉ែតដល់ក្រុងសិរីសោភណ្ឌ ត្រូវបានបើកឲ្យដំណើរការនៅដើមខែមេសាឆ្នាំ២០១៨, កំណាត់ផ្លូវពីសិរីសោភណ្ឌដល់ក្រុងបាត់ដំបង ដំណើរការនៅចុងខែមេសា, ពីបាត់ដំបងដល់ពោធិ៍សាត់ បើកដំណើរការនៅថ្ងៃទី២៩ឧសភា, ពីពោធិ៍សាត់ដល់បាត់ដឹង កំពង់ស្ពឺ គ្រោងបើកដំណើរការនៅខែកក្កដា, ខណៈកំណាត់ផ្លូវពីបាត់ដឹង ដល់ភ្នំពេញ គ្រោងដាក់ឲ្យដំណើរការយ៉ាងយូរនៅចុងឆ្នាំ២០១៨នេះ។
សូមរំឭកដែរថា ការស្ដារផ្លូវដែកពីប៉ោយប៉ែតមកភ្នំពេញ ត្រូវចំណាយថវិកាប្រមាណ៧៧លានដុល្លារសហរដ្ឋអាមេរិក។ ក្នុងនោះ ទឹកប្រាក់ជាង១៣លានដុល្លារ គឺជាជំនួយរបស់ធនាគារអភិវឌ្ឍអាស៊ី ADB, ជាង៦៣លានដុល្លារ ជាទឹកប្រាក់របស់រដ្ឋាភិបាលកម្ពុជា, និងជំនួយជាដែកពីម៉ាឡេស៊ីខ្លះផង។
អ្នកជំនាញសេដ្ឋកិច្ចមើលឃើញថា ការស្ដារផ្លូវដែកភាគខាងជើងរបស់កម្ពុជា នឹងជួយសម្រួលការដឹកជញ្ជូនរវាងប្រទេសកម្ពុជា-ថៃ ព្រមទាំងអាចពង្រីកទំហំពាណិជ្ជកម្មរវាងប្រទេសទាំងពីរឲ្យបានកាន់តែធំធេងជាងមុន ខណៈទំនិញនាំចូលមកកម្ពុជាពីប្រទេសថៃ មាន៧០ភាគរយ ចូលតាមច្រកប៉ោយប៉ែត។
សម្រាប់ប្រទេសថៃ កម្ពុជាគឺជាដៃគូពាណិជ្ជកម្មដ៏សំខាន់មួយ នៅក្នុងចំណោមប្រទេសអាស៊ាន។ ពាណិជ្ជកម្មទ្វេភាគីរវាងប្រទេសទាំងពីរមានទំហំ៥,៥ប៊ីលានដុល្លារនៅឆ្នាំ២០១៧ ដែលចំនួននេះ កើនឡើងប្រមាណ១០ភាគរយ បើធៀបនឹងឆ្នាំ២០១៦។ កម្ពុជានិងថៃ ប្ដេជ្ញាពង្រីកទំហំពាណិជ្ជកម្មរួមគ្នាឲ្យបាន១៥ប៊ីលានដុល្លារ នៅឆ្នាំ២០២០ខាងមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ