សហព័ន្ធសិទ្ធិមនុស្សអន្ដរជាតិ៖ ការបោះឆ្នោតនៅកម្ពុជាធ្វើដើម្បីបន្តអំណាចឲ្យរបបលោក ហ៊ុន សែន
ការបោះឆ្នោតនៅកម្ពុជាធ្វើឡើងដើម្បីបន្តអំណាចឲ្យរបបលោក ហ៊ុន សែន តែប៉ុណ្ណោះ។ នេះគឺជាការលើកឡើងរបស់សហព័ន្ធសិទ្ធិមនុស្សអន្ដរជាតិ ហៅកាត់ថា FIDH ក្នុងសេចក្ដីថ្លែងការណ៍មួយ ចេញផ្សាយនាថ្ងៃព្រហស្បតិ៍ ទី២៦កក្កដានេះ។ ពោលគឺតែ៣ថ្ងៃប៉ុណ្ណោះ មុនពេលការបោះឆ្នោតនៅកម្ពុជាត្រូវរៀបចំធ្វើនៅថ្ងៃអាទិត្យ ទី២៩កក្កដាខាងមុខ។ អង្គការ FIDH បានទទូចឲ្យសហគមន៍អន្ដរជាតិបដិសេធលទ្ធផលនេះការបោះឆ្នោតនេះ និងរៀបចំការបោះឆ្នោតថ្មីមួយស្របតាមបទដ្ឋានអន្ដរជាតិ។
ចុះផ្សាយនៅថ្ងៃ៖
ស្តាប់ - ០២:០១
លោកស្រី Debbie Stothard អគ្គលេខាធិការនៃសហព័ន្ធសិទ្ធិមនុស្សអន្ដរជាតិ បានលើកឡើងនៅក្នុងសេចក្ដីថ្លែងការណ៍ថា ការបោះឆ្នោតជាតិនៅថ្ងៃទី២៩កក្កដាខាងមុខនេះ មិនគួរឲ្យទុកចិត្តបានទេ នៅពេលដែលរបបដឹកនាំរបស់លោក ហ៊ុន សែន បានបើកយុទ្ធនាការបង្ក្រាបប្រព័ន្ធផ្សព្វផ្សាយនិងការរិះគន់ដោយសន្តិវិធី ក៏ដូចជារំលាយគណបក្សប្រឆាំង។ អគ្គលេខាធិការនៃអង្គការ FIDH ដដែល ចាត់ទុកការបោះឆ្នោតនៅកម្ពុជាថាជាដំណើរការក្លែងបន្លំដ៏គួរឲ្យអាម៉ាស ដែលត្រូវបានរៀបចំឡើងដើម្បីបន្តអំណាចឲ្យរបបលោក ហ៊ុន សែន។ ការបោះឆ្នោតនេះ នឹងធ្វើឲ្យកម្ពុជារងការឈឺចាប់និងការបង្ក្រាបបន្ថែមទៀត។ នេះបើតាមលោកស្រី Debbie Stothard។
ជាការកត់សម្គាល់ សេចក្ដីថ្លែងការណ៍របស់អង្គការ FIDH ដែលមានទីស្នាក់ការនៅប្រទេសបារាំងនេះ បានធ្លាក់មកតែ៣ថ្ងៃប៉ុណ្ណោះ មុនពេលកម្ពុជាត្រូវរៀបចំការបោះឆ្នោតជ្រើសតាំងតំណាងរាស្ត្រអាណត្តិទី៦ នៅថ្ងៃទី២៩កក្កដាខាងមុខ។ ក្រៅពីបរិហារការបោះឆ្នោតនៅកម្ពុជា អង្គការ FIDH បានទទូចឲ្យសហគមន៍អន្ដរជាតិបដិសេធលទ្ធផលនៃការបោះឆ្នោតនេះ និងរៀបចំការបោះឆ្នោតថ្មីមួយស្របតាមបទដ្ឋានអន្ដរជាតិ។ FIDH ក៏ទាមទារឲ្យអាជ្ញាធរអនុញ្ញាតឲ្យគណបក្សសង្គ្រោះជាតិដំណើរការឡើងវិញ ក៏ដូចជាដោះលែងថ្នាក់ដឹកនាំនៃគណបក្សនេះ គឺលោក កឹម សុខា ព្រមទាំងសមាជិកដទៃទៀត។
គួរជម្រាបថា មិនមែនមានតែអង្គការ FIDH តែឯងទេ ដែលរិះគន់ការបោះឆ្នោតនៅកម្ពុជានាអាណត្តិនេះ។ កាលពីពេលកន្លងទៅ សហគមន៍អន្តរជាតិចំនួន៤៥ប្រទេស បានចេញសេចក្តីថ្លែងការណ៍រួមគ្នាថ្កោលទោស និងជំរុញឲ្យរដ្ឋាភិបាលកម្ពុជា ធានាថា ដំណើរការបោះឆ្នោតថ្នាក់ជាតិនឹងត្រូវរៀបចំធ្វើដោយសេរីនិងយុត្តិធម៌ពិតប្រាកដ។ ចំណែកអ្នករាយការណ៍ពិសេសទទួលបន្ទុកសិទ្ធិមនុស្សអង្គការសហប្រជាជាតិប្រចាំកម្ពុជា លោកស្រី រ៉ូណា ស្មីត ចាត់ទុកការបោះឆ្នោតជាតិនាពេលខាងមុខនេះ ថាជាការបោះឆ្នោតមិនពិតប្រាកដ។ សម្រាប់លោកស្រី រ៉ូណា ស្មីត ការបោះឆ្នោតត្រឹមត្រូវពិតប្រាកដ គឺទាល់តែមានការចូលរួមពីគណបក្សប្រឆាំងដ៏ធំជាងគេ គឺអតីតគណបក្សសង្គ្រោះជាតិ។ សង្គ្រោះជាតិ ដែលត្រូវបានតុលាការកំពូលរំលាយចោលរួចហើយកាលពីចុងឆ្នាំ២០១៧៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ