ខោក្នុងមានឥទ្ធិពលលើសុខភាពបន្តពូជបុរសមែនឬ ?
ចុះផ្សាយនៅថ្ងៃ៖
ស្តាប់ - ០៨:៣០
ជ្រើសរើសខោក្នុង មិនមែនគ្រាន់តែជាការគិតអំពីសម្រស់រាងកាយទេ ! សម្រាប់មនុស្សប្រុស ជម្រើសខោក្នុងអាចមានពាក់ព័ន្ធដល់បញ្ហាសុខភាពបន្តពូជ។ អស់លោកគួរតែជ្រើសរើសស្លៀកខោក្នុងណាដែលរលុងៗ ដើម្បីសម្រួលការផលិតស្ពែម៉ាតូហ្សូអ៊ីត ឬមេជីវិតឈ្មោល។ នេះគឺបើតាមលទ្ធផលនៃការសិក្សាស្រាវជ្រាវអាមេរិកដែលទើបចេញផ្សាយ នៅថ្ងៃទី ៩ សីហា ២០១៨។
គ្មានមេជីវិតគ្រប់គ្រាន់ អាចជាមូលហេតុដ៏សំខាន់មួយ ដែលគូស្វាមីភរិយាពិបាកមានកូន។នេះជាប្រសាសន៍របស់លោកវេជ្ជបណ្ឌិតប៉ិចសុធី។ បន្ថែមពីលើសេចក្តីពន្យល់របស់លោកវេជ្ជបណ្ឌិត ការសិក្សាថ្មីមួយរបស់អាមេរិក ទើបចេញផ្សាយកាលពី នៅថ្ងៃទី ៩ សីហា ក្នុងទំព័រទស្សនាវដ្តី Human Reproduction បានបញ្ជាក់ យ៉ាងហ្មត់ចត់បន្ថែមពីលើការសិក្សាមុនៗថា បុរសទាំងឡាយដែលចង់ក្លាយខ្លួនជាឪពុក គួរតែស្លៀកខោក្នុងរលុងៗ ដើម្បីបង្កើនសមត្ថភាពផលិតស្ពែម៉ាតូហ្ស៊ូអ៊ីត ជាមេជីវិតឈ្មោល។ ព្រោះបើតាមលទ្ធផលនៃការសិក្សា បុរសស្លៀកខោក្នុងរលុងៗ មានកំហាប់ស្ពែម៉ាតូហ្សូអ៊ីតខ្ពស់ជាងបុរសស្លៀកខោក្នុងរឹប។
ជាការសិក្សា រយៈពេល១៧ឆ្នាំ (ពីឆ្នាំ២០០០-២០១៧) នៅក្នុងមន្ទីរពេទ្យMassachusetts General Hospital សហរដ្ឋអាមេរិក ផ្នែកជំនួយការបង្កកំណើត វិភាគជាលើកទីមួយ លើសពីទម្លាប់សិក្សាមុនៗដែលគិតគូលើតែគុណភាពនៃមេជីវិតបុរស និងអំពីដំណើរការរបស់ពងស្វាស អ័រមូន អាដេអិនរបស់ស្ពែម។
នៅក្នុងចំណោមបុរសដែលស្ម័គ្រចិត្តចូលរួមសិក្សា ៥៣% មានទម្លាប់ស្លៀកខោក្នុងរលុងៗ ឯ៤៧%ទៀតចូលចិត្តស្លៀកខោក្នុងរឹបតឹង ជាស្លីប ឬជាខោខ្លីរឹបរួត។ ការវិភាគមានបូកផ្សំនឹងកត្តាក្រៅខ្លួនផ្សេងទៀត ដែលអាចមានឥទ្ធិពលលើស្ពែម៉ាតូហ្សូអ៊ីត ដូចជាស្ថានភាពសុខភាពទូទៅ កំរិតធ្វើសកម្មភាពកាយសម្បទា កីឡា ជក់បារី ផឹកសុរ៉ា ... ជាលទ្ធផល ក្រុមបុរសចូលចិត្តស្លៀកខោក្នុងរលុងៗ មានចំនួនស្ពែម៉ាតូហ្ស៊ូអ៊ីត លើសអ្នកស្លៀកខោរឹប ដល់ទៅ៣៣%។
ក្រុមអ្នកវិទ្យាសាស្ត្រ បានសង្ស័យ យូរមកហើយអំពី ឥទ្ធិពលរបស់ខោក្នុងចំពោះសុខភាពបន្តពូជបុរស ព្រោះគេបានដឹងថា ពងស្វាសមានដំណើរការកាន់ល្អ នៅពេលពងស្វាសត្រូវខ្យល់។ ដូច្នេះ ប្រសិនបើគេស្លៀកខោរិបខ្លាំង នោះពងស្វាសនឹងត្រូវឡើងកម្តៅខ្លាំង ហើយបើសីតុណ្ហភាពនៅពងស្វាងឡើងខ្ពស់ សកម្មភាពផលិតបស្ពែម៉ាតូហ្ស៊ូអ៊ីត ត្រូវចុះថយ។ ដើម្បីអាចផលិតមេជីវិតឈ្មោល (ស្ពែម) បានល្អទាំងបរិមាណនិងគុណភាព ចាំបាច់ត្រូវឱ្យពងស្វាសមានសីតុណ្ហភាពទាបកម្តៅនៃខ្លួនប្រាណប្រមាណ ៣ទៅ៤អង្សារ។ ហេតុដូច្នេះហើយបានជាអ្នកស្រាវជ្រាវខ្លះ បានក្លែបពាក្យថា ធម្មជាតិបង្កើតមនុស្សមក ដាក់ប្រដាប់បន្តពូជបុរសនៅឱ្យក្តៅខ្លួន ប្រដាប់បន្តពូជស្ត្រីនៅខាងក្នុង មិនមែនជាការចៃដន្យទេ។
ឥលូវនេះយើងបានដឹងហើយថា ការស្លៀកពាក់រឹតរិបតឹង ជាកត្តាមួយអាចធ្វើឱ្យបរិមាណនិងគុណភាពនៃមេជីវិតបុរសចុះថយ និងចុះខ្សោយ។
ចុះតើជាការពិតទេដែលថាបុរសសម័យថ្មី មានស្ពែម៉ាតូហ្សូអ៊ីតតិច/ខ្សោយជាង មនុស្សប្រុស កាលពីពីរបីទសវត្សរ៍មុន ?
Dr Jean-Marie Kunstmann គ្រូពេទ្យជំនាញជីវសាស្ត្របន្តពូជនៅមន្ទីរពេទ្យកូហ្សាំងCochin ក្រុងប៉ារីស៖ ជាការពិត ! នេះជាសំណួរដែលគេតែងចោទសួរជាញឹកញយក្នុងរយៈពេលប៉ុន្មានឆ្នាំចុងក្រោយនេះ ដោយចង់ដឹងថាតើសមត្ថភាពបន្តពូជរបស់បុរសធ្លាក់ចុះ បណ្តាលមកពីកំហាប់ (បរិមាណ) ឬមកពីគុណភាពនៃស្ពែម៉ាតូហ្ស៊ូអ៊ីត ?! នៅពេលគេក៏បកទៅវិភាគលើទិន្នន័យទឹកកាមរបស់អ្នកផ្តល់អំណោយ កាលពីសម័យមុន គេសង្កេតឃើញថា ក្នុងរយៈពេលតែ២០ឆ្នាំ ទឹកកាមបុរសធ្លាក់ចុះ គួរឱ្យកត់សម្គាល់មែន ក្នុងកំរិតប្រមាណ២%ក្នុងមួយឆ្នាំៗ។ មូលហេតុគឺដោយសារកត្តាពូជ កត្តាចំណីអាហារ រៀបរស់នៅ ហើយពិសេសពេលនេះ អ្នកវិទ្យាសាស្ត្រ ផ្តោតចំណាប់អារម្មណ៍ទៅលើបញ្ហាបរិស្ថាន មួយទៀត ដើម្បីពន្យល់អំពីមូលហេតុនាំឱ្យទឹកកាមបុរសធ្លាក់ចុះ។
ប៉ុន្តែការចុះថយនេះ មិនមែនជាបញ្ហាធ្ងន់ធ្ងរអីទេ គេត្រូវតែប្រៀបធៀបទៅនឹងបរិមាណកំហាប់នៃស្ពែម៉ាតូហ្សូអ៊ីត កាលពីដំបូងនៅ ក្មេង ព្រោះបើតាមបទដ្ឋានឥលូវ មនុស្សប្រុសម្នាក់ៗ មានមេជីវិត ពី ២០ទៅ ១០០លាន ក្នុងមួយមីល្លីលីត្រនៃទឹកស្ពែម។ ហើយបុរសម្នាក់អាចបញ្ចេញទឹកកាមបានជាមធ្យម ពី ៣ទៅ៤ មីល្លីលីត្រ ពោលគឺ៤០០ទៅ៦០០លានមេជីវិត ពេលរួមរក្សម្តងៗ។ ដូច្នេះបើគេបាត់បង់២%ក្នុងមួយឆ្នាំ វាមិនថ្វីទេ ប៉ុន្តែសម្រាប់បុរសដែលមានកំហាប់ទាបស្រាប់ មានត្រឹមតែប្រមាណពី ៥ទៅ១០លាន ស្ថានភាពបែបនេះអាចនឹងក្លាយទៅបញ្ហា។
តើមានវិធីអ្វីជួយអ្នកមានស្ពែមាតូហ្សូអ៊ីតខ្សោយដែរឬទេ? តើមានវិធីសាស្ត្រព្យាបាល ឬមធ្យោបាយអ្វីស្រាប់ជួយបង្កើនបរិមាណស្ពែម៉ាតូហ្ស៊ីតដែរឬទេ ?
Dr Jean-Marie Kunstmann ៖ នេះជាសំណួរដែលអ្នកវេជ្ជសាស្ត្រចាប់អារម្មណ៍តាំងពីយូរយារមកហើយ។ គេបានសាកល្បងរកវិធីច្រើនយ៉ាងណាស់ ដូចជាការព្យាបាលដោយប្រើថ្នាំលេប ជួនកាលដោយសារធាតុចិញ្ចឹមក្នុងកែវ ដើម្បីភ្ញោច បង្កើនកម្លាំង ស្ពែម៉ាតូហ្សូអ៊ីត។ ប៉ុន្តែមកទល់បច្ចុប្បន្ននេះ គ្មានអ្វីមានប្រសិទ្ធិភាពទេ។ ថ្នាំប៉ូវ ស្រា គ្រឿងញៀន ...
គ្មានវិធីសាស្ត្រណាមានប្រសិទ្ធភាពដែលបញ្ជាក់បានតាមបែបវិទ្យាសាស្ត្រ ក្រៅអំពីការថែរក្សាជីវិតឱ្យមានអនាម័យត្រឹមត្រូវក្នុងការរស់នៅទេ។ អនាម័យជីវិតត្រឹមត្រូវ (គឺទទួលទានត្រឹមត្រូវមានបន្លែសាច់ផ្លែឈើ មិនប្រព្រឹត្តគ្រឿងស្រវឹង មិនជក់បារី បញ្ចេញកម្លាំងកាយសម្បទា មិនស្ពឹកស្រពន់រកតែភាពស្រណុកស្រួល) ទំនងជាមានឥទ្ធិលខ្លាំងលើគុណភាពនៃការផលិតស្ពែម៉ាតូហ្ស៊ីអ៊ីត។
សព្វថ្ងៃនេះ ក្រុមគ្រូពេទ្យនិងអ្នកស្រាវជ្រាវវិទ្យាសាស្ត្របន្ទោសបរិស្ថានបរិយាកាសនៅជុំវិញខ្លួន ថាជាដើមហេតុធ្វើខូចគុណភាពផលិតមេជីវិត និងសុខភាពជាទូទៅ។ ព្រោះសារធាតុខ្លះ ដូចយ៉ាងថ្នាំសម្លាប់សត្វល្អិត ឬប្រើប្រាស់វត្ថុផ្លាស្ទិកជ័រច្រើន ដែលអាចបង្កឱ្យមានជាតិពុលដល់សរីរាង្គមនុស្ស ឬលក្ខខណ្ឌការងារមិនអំណោយផល ដែលងាយបង្កើនកំដៅ ដល់តំបន់បន្តពូជ។ លក្ខខណ្ឌបរិស្ថាននេះ មានឥទ្ធិពលប៉ះពាល់ខ្លះណាស់ដល់ជីវិតមនុស្ស ជាពិសេសក្នុងដំណាក់កាលនៃការចាប់ផ្តើមកំណើតដំបូង ពោលគឺពេលនៅក្នុងផ្ទៃម្តាយ និងក្រោយពេលកើតចេញពីផ្ទៃម្តាយ ប៉ុន្មានឆ្នាំដំបូងដែលក្មេងចាប់មានការលូតលាស់រាងកាយ ប្រដាប់បន្តពូជព្រមទាំងដំណើរការទាំងមូលនៃជីវិតបន្តពូជ។
តើមនុស្សប្រុសម្នាក់ៗ ផលិតស្ពែម៉ាតូហ្ស៊ីតបានប៉ុណ្ណាក្នុងមួយថ្ងៃ ?
មនុស្សប្រុសអាចផលិតស្ពែម៉ាតូហ្ស៊ីតបានច្រើនលានណាស់។ គេអាចវាស់វែងកំរិតបទដ្ឋាននៃសមត្ថភាពបន្តពូជរបស់បុរសដោយការរាប់មេជីវិតនេះឯង។ មធ្យមភាគទូទៅនៃមេជីវិតប្រែប្រួលទៅតាមពេលវេលា។ ប៉ុន្តែ បើក្នុងមួយមីល្លីលីត្រទឹកកាម មានមេជីវិតតែ៥លាន នោះបុរសអាចជួបនឹងបញ្ហាបន្តពូជហើយ។ នៅក្នុងការបង្កកំណើត មានមេជីវិតតែមួយប៉ុណ្ណោះ ដែលអាចទៅជួបមេជីវិតញី ប៉ុន្តែគេត្រូវការមានស្ពែមាតូហ្ស៊ីតច្រើនលានជូនដំណើរមេជីវិតដែលខ្លាំងជាងគេទៅជួបមេជីវិតញី ទើបមានសំណាងច្រើននឹងបង្កកំណើតបាន។
ដូច្នេះ ដើម្បីរក្សាសមត្ថភាពបន្តពូជ សមត្ថភាពផលិតស្ពែម៉ាតូហ្សូអ៊ីត ទាំងអ្នកស្រាវជ្រាវអាមេរិក ក៏ដូចជាវេជ្ជបណ្ឌិតជំនាញដទៃផ្សេងទៀតដែរ បានផ្តល់អនុសាសន៍បន្ថែមទៀត ឱ្យ កុំអង្គុយយូរពេក ដែលអាចផ្សំប្រដាប់បន្តពូជឱ្យឡើងថប់ក្តៅ និង កុំមុជទឹកត្រាំទឹក ដែលមានកម្តៅសីតុណ្ហភាពខ្ពស់/ក្តៅពេកឱ្យសោះ។ និងជាចុងក្រោយ សូមសុភាពបុរសទាំងឡាយចៀងរវាងការប្រើពាក់ខោតឹង រឹប ប្រសិនបើចង់បានក្លាយជាឪពុក ដូចដែលការសិក្សាអាមេរិកទើបបង្ហាញលទ្ធផល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ