ក្រសួងបរិស្ថានអះអាងពីវត្តមានសត្វកម្រច្រើនប្រភេទនៅឧទ្យានជាតិវីរៈជ័យ ក្នុងខេត្តរតនគិរី
សត្វកម្រច្រើនប្រភេទកំពុងតែរស់នៅក្នុងឧទ្យានជាតិវីរៈជ័យ ក្នុងខេត្តរតនគិរី។ នេះគឺជាការបញ្ជាក់ឲ្យដឹងពីលោក នេត្រ ភក្ត្រា រដ្ឋលេខាធិការ និងជាមន្ដ្រីនាំពាក្យក្រសួងបរិស្ថាន។ ការអះអាងរបស់លោក នេត្រ ភក្ត្រា យ៉ាងដូច្នេះ ធ្វើឡើងដោយសម្អាងលើរូបភាពជាច្រើនសន្លឹក ដែលថតបានដោយម៉ាស៊ីនថតស្វ័យប្រវត្តិ ចាប់ពីថ្ងៃទី២៦កញ្ញា រហូតដល់ថ្ងៃទី០៤តុលា។
ចុះផ្សាយនៅថ្ងៃ៖
ស្តាប់ - ០១:៥២
សត្វព្រៃកម្រដែលត្រូវម៉ាស៊ីនថតស្វ័យប្រវត្តិថតបាននៅឧទ្យានជាតិវីរៈជ័យ មានជាអាថិ៍៖ សត្វខ្លាឃ្មុំ ខ្លាពពក ខ្ទីង និងសត្វដំរីជាដើម។ ក្រៅពីសត្វកម្រទាំងនេះ ម៉ាស៊ីនថតដែលដាក់ពង្រាយនៅទីតាំងមួយចំនួនក្នុងឧទ្យានជាតិវីរៈជ័យ ក៏ថតបានរូបសត្វស្វាក្រវ៉ាត់ សត្វសំពោចភ្នំ ឈ្លូស ប្រើស ជ្រូកព្រៃ មាន់ព្រៃ និងសត្វដទៃទៀតជាច្រើន។
លោក នេត្រ ភក្ត្រា រដ្ឋលេខាធិការ និងជាមន្ដ្រីនាំពាក្យក្រសួងបរិស្ថាន បានគូសបញ្ជាក់ថា ឧទ្យានជាតិវីរៈជ័យ គឺជាតំបន់ដែលសម្បូរទៅដោយធនធានធម្មជាតិនិងជីវៈចម្រុះ។ លក្ខណៈជីវសាស្ត្រដ៏សម្បូរបែបដូច្នេះ មានសារៈសំខាន់ណាស់សម្រាប់ការងារអភិរក្សអន្ដរជាតិ។ លោក នេត្រ ភក្ត្រា បានអំពាវនាវដល់គ្រប់ភាគីពាក់ព័ន្ធទាំងអស់ ចូលរួមការពារនិងអភិរក្សធនធានធម្មជាតិនេះ ទាំងអស់គ្នា។
បង្កើតឡើងនៅក្នុងឆ្នាំ១៩៩៣ ឧទ្យានជាតិវីរៈជ័យ មានផ្ទៃក្រឡាសរុប ៣ ៣២៥ គីឡូម៉ែត្រក្រឡា លាតសន្ធឹងគ្របដណ្ដប់ខេត្តពីរ គឺស្ទឹងត្រែង និងរតនគិរី។ ក្រៅពីឧទ្យានជាតិវីរៈជ័យ កម្ពុជាមានឧទ្យានជាតិចំនួន៦ផ្សេងទៀត ដូចជា ឧទ្យានជាតិព្រះសុរាម្រិតកុសុមៈគីរីរម្យ ឧទ្យានជាតិបុទុមសាគរ ឧទ្យានជាតិមុនីវង្សបូកគោ ឧទ្យានជាតិកែប ឧទ្យានជាតិព្រះសីហនុរាម និងឧទ្យានជាតិភ្នំគូលែន។
ក្រសួងបរិស្ថានបញ្ជាក់ថា សព្វថ្ងៃនេះ ក្រសួងគ្រប់គ្រងតំបន់ការពារធម្មជាតិ និងរបៀងអភិរក្សជីវៈចម្រុះទំហំជាង ៧,៥លានហិកតា។ និងថា ក្រសួងបានដាក់មន្ដ្រីឧទ្យានុរក្សចំនួន ១ ២៦០នាក់ ដើម្បីដើរល្បាត ការពារធនធានធម្មជាតិ និងអភិរក្សជីវៈចម្រុះ សម្បត្តិធម្មជាតិនិងវប្បធម៌ នៅក្នុងផ្ទៃដីទាំង ៧,៥លានហិកតានោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ