ក្រសួងការពារជាតិ៖ ការចុះផ្សាយពីមូលដ្ឋានយោធារបស់បរទេសនៅកម្ពុជា គឺជាដំណឹងក្លែងក្លាយ
អ្នកនាំពាក្យនៃក្រសួងការពារជាតិកម្ពុជា នៅថ្ងៃទី១៧វិច្ឆិកានេះ បានគួសបញ្ជាក់តាមរយៈសេចក្ដីថ្លែងការណ៍ថា កម្ពុជាមិនបានអនុញ្ញាតឲ្យបរទេសណាមួយ ប្រើប្រាស់ទឹកដីរបស់ខ្លួនធ្វើជាមូលដ្ឋានយោធា ដូចការចុះផ្សាយរបស់សារព័ត៌មានបរទេសមួយចំនួនទេ។ ក្រសួងការពារជាតិកម្ពុជា ចាត់ទុកការផ្សាយរបស់សារព័ត៌មាននោះ ថាជាដំណឹងក្លែងក្លាយ។
ចុះផ្សាយនៅថ្ងៃ៖
ស្តាប់ - ០២:០៥
សេចក្ដីថ្លែងការណ៍របស់ក្រសួងការពារជាតិ ធ្វើឡើងបន្ទាប់ពីសារព័ត៌មាន Asia Times បានចុះផ្សាយអត្ថបទមួយកាលពីថ្ងៃទី១៥វិច្ឆិកា។ ជាអត្ថបទដែលមានខ្លឹមសារលើកឡើងថា កម្ពុជាកំពុងស្ថិតនៅចំណុចកណ្ដាលនៃសង្គ្រាមត្រជាក់ថ្មីមួយ រវាងចិន និង អាមេរិក។ នៅក្នុងអត្ថបទនេះ សារព័ត៌មាន Asia Times បានស្រង់ប្រភពអនាមិកដែលថា នៅក្នុងពេលដ៏ឆាប់ខាងមុខនេះ លើទឹកដីកម្ពុជា ផែសំចតទឹកជ្រៅវិនិយោគដោយចិន នឹងលេចខ្លួនឡើងប្របមាត់សមុទ្រនៃខេត្តកោះកុង។ ប្រភពអនាមិកដដែល ប្រាប់ Asia Times ទៀតថា កំពង់ផែទឹកជ្រៅនេះ នឹងក្លាយជាមូលដ្ឋានយោធា ដែលចិនប្រើប្រាស់សម្រាប់សំចតនាវាចម្បាំង។
ព័ត៌មានដែលចុះផ្សាយដូច្នេះ ត្រូវបានក្រសួងការពារជាតិកម្ពុជាច្រានចោលទាំងស្រុង និងស្នើឲ្យបញ្ឈប់ការផ្សាយដោយគ្មានប្រភពច្បាស់លាស់នេះតទៅទៀត។ តាមរយៈសេចក្ដីថ្លែងការណ៍ ចុះថ្ងៃទី១៧វិច្ឆិកា អ្នកនាំពាក្យក្រសួងការពារជាតិកម្ពុជា គូសបញ្ជាក់ថា កម្ពុជាមិនអនុញ្ញាតឲ្យបរទេសណាមួយ ប្រើប្រាស់ទឹកដីរបស់ខ្លួនធ្វើជាមូលដ្ឋានយោធាទេ។ និងថា អត្ថបទផ្សាយដោយកាសែត Asia Times គឺជាព័ត៌មានក្លែងក្លាយ មានលក្ខណៈលាបពណ៌ ញុះញង់ ធ្វើឲ្យប៉ះពាល់កិត្យានុភាពវិស័យយោធា និងអព្យាក្រឹតអចិន្ត្រៃយ៍របស់កម្ពុជា។
ជាថ្មីម្ដងទៀត ក្រសួងការពារជាតិកម្ពុជា បានសរសេរសង្កត់ធ្ងន់ថា កម្ពុជាជារដ្ឋឯករាជ្យ អព្យាក្រឹតអចិន្ត្រៃយ៍ មិនចូលបក្សសម្ព័ន្ធ ដូចមានចែងក្នុងមាត្រា៥៣ថ្មីនៃរដ្ឋធម្មនុញ្ញ។ បន្ថែមពីលើនេះ បើតាមសេចក្ដីថ្លែងការណ៍ដដែល ក្រសួងអះអាងថា រដ្ឋាភិបាលកម្ពុជាកំពុងថែរក្សាសុខសន្តិភាព ទប់ស្កាត់ការប៉ុនប៉ងទាំងឡាយដែលអូសទាញប្រទេសឲ្យធ្លាក់ទៅក្នុងសង្គ្រាមជាថ្មី។ កម្ពុជា មិនបានចូលរួមជាមួយសង្គ្រាមត្រជាក់ណាមួយទេ។ នេះបើតាមក្រសួងការពារជាតិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ