កម្ពុជារៀបចំព្រឹត្តិការណ៍កីឡាអបអរខួប២០ឆ្នាំនៃសមាហរណកម្មនៅស្រុកអន្លង់វែង
ដើម្បីអបអរខួប២០ឆ្នាំនៃសមាហរណកម្មនៅស្រុកអន្លង់វែង ក្នុងឆ្នាំ១៩៩៨, ព្រឹត្តិការណ៍កីឡាមួយ នឹងត្រូវរៀបចំធ្វើនៅដើមឆ្នាំក្រោយ នៅស្រុកអន្លង់វែង។ បើតាមអ្នករៀបចំកម្មវិធី ព្រឹត្តិការណ៍កីឡា «ថ្មើរជើងប្រវត្តិសាស្ត្រ» គឺជាឱកាសឲ្យសាធារណជនស្វែងយល់ពីសារៈសំខាន់ផ្នែកប្រវត្តិសាស្ត្ររបស់ស្រុកអន្លង់វែង ដែលជាតំបន់តស៊ូចុងក្រោយរបស់ខ្មែរក្រហម ហើយត្រូវបានធ្វើសមាហរណកម្មចុងក្រោយ នៅឆ្នាំ១៩៩៨។
ចុះផ្សាយនៅថ្ងៃ៖
ស្តាប់ - ០១:៤១
«ថ្មើរជើងប្រវត្តិសាស្ត្រ» គ្រោងរៀបចំធ្វើនៅថ្ងៃទី០៥ ខែមករា ដើមឆ្នាំ២០១៩ខាងមុខ នៅលើភ្នំដងរែក ក្នុងភូមិសាស្ត្រស្រុកអន្លង់វែង ខេត្តឧត្តរមានជ័យ ដើម្បីអបអរខួប២០ឆ្នាំនៃសមាហរណកម្មនៅស្រុកអន្លង់វែង ក្នុងឆ្នាំ១៩៩៨។ បើតាមលោក វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា ព្រឹត្តិការណ៍ «ថ្មើរជើងប្រវត្តិសាស្ត្រ» នឹងត្រូវចាប់ផ្ដើមនៅវេលាម៉ោង៦ព្រឹក នៅចំណុចសារមន្ទីរប្រវត្តិសាស្ត្រអន្លង់វែង ឬសារមន្ទីរអតីតផ្ទះតាម៉ុក។
អ្នកចូលរួមត្រូវធ្វើដំណើរដោយថ្មើរជើង កាត់ទីតាំងនិងអគារប្រវត្តិសាស្ត្រ រួមមានទីបញ្ជាការនិងកន្លែងស្នាក់សំខាន់ៗរបស់មេដឹកនាំខ្មែរក្រហម។ ទន្ទឹមគ្នានេះ អ្នកចូលរួមក៏នឹងអាចមើលឃើញជ្រលងដងអូរតូចៗដូចម្រាមដៃ វាលស្រែស្រូវដ៏លន្លង់លន្លោច ត្រពាំងបឹងបួរ និងទឹកជ្រោះដ៏អាថិ៍កំបាំង ព្រមទាំងអាចក្រឡេកភ្នែកទៅឃើញប្រទេសថៃ ពីច្រាកភ្នំថែមទៀត។
ជាការកត់សម្គាល់ អន្លង់វែង ជាតំបន់តស៊ូចុងក្រោយរបស់ខ្មែរក្រហម មុនពេលធ្វើសមាហរណកម្មជាមួយរដ្ឋាភិបាលកម្ពុជាក្នុងឆ្នាំ១៩៩៨។ អន្លង់វែង ធ្លាប់ជាចំណុចជួរមុខដ៏ក្ដៅគគុកនៃជម្លោះព្រំដែនជាមួយប្រទេសថៃ។ សព្វថ្ងៃនេះ អន្លង់វែងនៅតែជាតំបន់ដែលបង្កប់ដោយភាពអាថិ៍កំបាំង សក្តិសមសម្រាប់ការធ្វើដំណើរផ្សងព្រេង គយគន់សម្រស់ធម្មជាតិ និងរៀនសូត្រពីប្រវត្តិសាស្ត្រ។
សូមជម្រាបជូនថា ព្រឹត្តិការណ៍កីឡា «ថ្មើរជើងប្រវត្តិសាស្ត្រ» រៀបចំដោយក្រសួងទេសចរណ៍ សហការជាមួយគណៈកម្មាធិការជាតិអូឡាំពិកកម្ពុជា រដ្ឋបាលខេត្តឧត្តរមានជ័យ សាលាស្រុកអន្លង់វែង និងមជ្ឈមណ្ឌលសន្តិភាពអន្លង់វែងនៃមជ្ឈមណ្ឌលឯកសារកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ