អាជ្ញាធរជាតិអប្សរាកំពុងដំឡើងផ្ទាំងស្លាកឈ្មោះប្រាសាទចំនួន១១៨ផ្ទាំង ក្នុងរមនីយដ្ឋានអង្គរ
ផ្ទាំងស្លាកឈ្មោះប្រាសាទចំនួន១១៨ផ្ទាំង កំពុងតែត្រូវបានដំឡើងនៅតាមប្រាសាទនានា ក្នុងរមនីយដ្ឋានអង្គរ។ បើតាមគម្រោងរបស់អាជ្ញាធរជាតិអប្សរា ការដំឡើងផ្ទាំងស្លាកឈ្មោះប្រាសាទដែលបានចាប់ផ្ដើមតាំងពីថ្ងៃទី១១មេសានេះ នឹងត្រូវធ្វើឲ្យរួចរាល់ក្នុងរយៈពេល២ខែ។
ចុះផ្សាយនៅថ្ងៃ៖
ផ្ទាំងស្លាកឈ្មោះប្រាសាទ ដែលកំពុងត្រូវបានដំឡើងនៅក្នុងរមនីយដ្ឋានអង្គរនេះ មានព័ត៌មានសំខាន់ៗដូចជា ឈ្មោះប្រាសាទ អាយុកាលសាងសង់ប្រាសាទ ទិសច្រកចេញចូលប្រាសាទ ស្លាកអាជ្ញាធរជាតិអប្សរា ស្លាកអង្គការយូណេស្កូ ស្លាកបេតិកភណ្ឌពិភពលោក និងស្លាកអនុសញ្ញាក្រុងឡាអេឆ្នាំ១៩៥៤ សម្រាប់ការពារសម្បត្តិវប្បធម៌ក្នុងគ្រាមានជម្លោះប្រដាប់អាវុធ។
លោក សុខ សង្វារ អគ្គនាយករងទទួលបន្ទុកនាយកដ្ឋានអភិវឌ្ឍទេសចរណ៍អង្គរ បានគូសបញ្ជាក់ក្នុងឱកាសដំឡើងផ្ទាំងស្លាកសញ្ញានៅឯប្រាសាទអង្គរវត្ត នាថ្ងៃទី១១មេសាថា ផ្ទាំងស្លាកឈ្មោះប្រាសាទទាំង១១៨នេះ មិនត្រូវបានយកទៅដំឡើងនៅគ្រប់ប្រាសាទទាំងអស់នៅក្នុងតំបន់រមនីយដ្ឋានអង្គរទេ។ មិនដំឡើងនៅគ្រប់ប្រាសាទដោយហេតុថា ប្រាសាទខ្លះនៅជ្រៅក្នុងព្រៃ មិនមានទីតាំងដាក់ស្លាកឈ្មោះប្រាសាទបាន។ ចំណែកប្រាសាទខ្លះទៀត អាចដាក់ផ្ទាំងស្លាកឈ្មោះបានពីចំនួនមួយទៅដល់បួនផ្ទាំង ទៅតាមទំហំប្រាសាទ។ ភាគច្រើននៃផ្ទាំងស្លាកឈ្មោះប្រាសាទទាំងនេះ ត្រូវបានដំឡើងនៅក្បែរចក្រចូលទស្សនាប្រាសាទ ទីតាំងងាយមើលឃើញរបស់ភ្ញៀវទេសចរ និងទីតាំងដែលមិនប៉ះពាល់ដល់ទិដ្ឋភាពប្រាសាទទាំងមូល។
លោក សុខ សង្វារ សង្ឃឹមថា ផ្ទាំងស្លាកឈ្មោះប្រាសាទដែលកំពុងត្រូវបានដំឡើងនៅរមនីយដ្ឋានអង្គរនេះ នឹងជួយផ្ដល់ភាពងាយស្រួល ក៏ដូចជាបទពិសោធល្អសម្រាប់ភ្ញៀវទេសចរ ក្នុងការទស្សនាតំបន់អង្គរ បើទោះបីជាគ្មានមគ្គុទ្ទេសក៍ក៏ដោយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ