អានតួអត្ថបទ
កម្ពុជា

ប្រមុខ​ការទូត​សិង្ហបុរី​៖ សារ​ហ្វេសប៊ុក​របស់​លោក លី សៀនឡុង ពុំ​មាន​ចេតនា​អាក្រក់​ណាមួយ​ទេ!

សំណុំ​រឿង​សារ​ហ្វេសប៊ុក​របស់​នាយករដ្ឋ​មន្ដ្រី​សិង្ហបុរី ស្ដី​ពី​វត្តមាន​កងទ័ព​វៀតណាម​នៅ​កម្ពុជា​ក្រោយ​របប​ខ្មែរ​ក្រហម ទំនង​ជា​ដើរ​ដល់​ទី​បញ្ចប់​ហើយ នៅ​ពេល​ប្រមុខ​ការទូត​សិង្ហបុរី លើក​ទូរសព្ទ​ហៅ​ត្រង់​មក​កាន់​សមភាគី​កម្ពុជា នៅរសៀល​​ថ្ងៃ​សុក្រ ទី​០៧ មិថុនា ម្សិលមិញ​។ តាម​រយៈ​កិច្ច​សន្ទនា​តាម​ទូរសព្ទ​នោះ រដ្ឋ​មន្ដ្រី​ក្រសួង​ការបរទេស​សិង្ហបុរី បាន​បំភ្លឺ​ប្រាប់​ភាគី​កម្ពុជា​ថា សារ​ហ្វេសប៊ុក​របស់​លោក លី សៀនឡុង គ្រាន់​តែ​ជា​ការ​រំឭក​ពី​ស្ថានភាព​និង​ការ​ប្រឈម​ក្នុង​សម័យ​កាល​នោះ ដោយ​គ្មាន​បង្កប់​នូវ​ចេតនា​អាក្រក់​ណាមួយ​ឡើយ​​។

Singapore Prime Minister Lee Hsien Loong delivers his opening address at the 32nd ASEAN (Association of Southeast Asian Nations) Summit in Singapore on April 28, 2018.
Singapore Prime Minister Lee Hsien Loong delivers his opening address at the 32nd ASEAN (Association of Southeast Asian Nations) Summit in Singapore on April 28, 2018. AFP
ផ្សាយពាណិជ្ជកម្ម

សិង្ហបុរី​ពុំ​មាន​បំណង​ណាមួយ​គាំទ្រ​ខ្មែរ​ក្រហម ហើយ​មិន​ចង់​ឃើញ​របប​នេះ​វិល​ត្រឡប់​មក​កម្ពុជា​វិញ​ឡើយ​។ នេះ​គឺ​ជា​សម្ដី​ដែល​ប្រមុខ​ការទូត​សិង្ហបុរី លោក Vivian Balarishnan ថ្លែង​ប្រាប់​លោក ប្រាក់ សុខុន តាម​ខ្សែ​ទូរសព្ទ​។ ​លោក Vivian អះអាង​ទៀត​ថា ​សិង្ហបុរី​ចង់​បានតែ​​សន្តិភាព​និង​វិបុលភាព​សម្រាប់​កម្ពុជា។ ហើយ​​សូម​កុំ​ឲ្យ​កម្ពុជា​មាន​ការ​សង្ស័យ​អ្វី​លើ​ភាព​ស្មោះ​ត្រង់​នេះ​។

សូម​ជម្រាប​ជូន​ថា ការ​គូស​បញ្ជាក់​របស់​លោក Vivian យ៉ាង​ដូច្នេះ ធ្វើ​ឡើង​ដើម្បី​បំភ្លឺ​អំពីខ្លឹមសារ​នៃ​សំណេរ​តាម​ហ្វេសប៊ុក​​របស់​លោក​នាយករដ្ឋ​មន្ដ្រី​សិង្ហបុរី លី សៀនឡុង ដែល​លើក​ឡើង​អំពី​​វត្តមាន​កងទ័ព​វៀតណាម​នៅ​កម្ពុជា​ក្រោយ​របប​ខ្មែរ​ក្រហម​។ ជា​សំណេរ​ដែល​​​ធ្វើ​ឲ្យ​កម្ពុជា​និង​វៀតណាមប្រតិកម្ម​បក​វិញ​ទាំង​ក្ដៅ​ស្លឹក​ត្រចៀក​។

វៀតណាម តាម​រយៈ​អ្នក​នាំ​ពាក្យ​ក្រសួង​ការបរទេស លោក​ស្រី Le Thi Thu hang បាន​សម្ដែង​ការ​សោក​ស្ដាយ និង​ចាត់​ទុក​ការ​លើកឡើងរបស់​នាយករដ្ឋ​មន្ដ្រី​សិង្ហបុរី​​នោះ ថា​មិន​បាន​ឆ្លុះ​បញ្ចាំង​ពី​ការពិត​។ ពី​ខាង​កម្ពុជា​វិញ លោក​​នាយករដ្ឋ​មន្ដ្រី​ ហ៊ុន សែន យល់​ឃើញ​ថា សារ​របស់​លោក លី បង្ហាញ​ពី​ការ​គាំទ្រ​របស់​សិង្ហបុរី ចំពោះ​របបប្រល័យ​ពូជសាសន៍៖ ចង់​ឲ្យ​របប​នេះ​ត្រឡប់​មក​​វិញ​និង​ប្រឆាំង​នឹង​ការ​រស់​ឡើង​វិញ​របស់​ប្រជាជន​កម្ពុជា។

យ៉ាង​ណា​ក៏​ដោយ រដ្ឋ​មន្ដ្រី​ក្រសួង​ការបរទេស​សិង្ហបុរី បាន​បំភ្លឺ​ប្រាប់​ភាគី​កម្ពុជា​​​ថា សារ​ហ្វេសប៊ុក​របស់​លោក លី សៀនឡុង គ្រាន់​តែ​ជា​ការ​រំឭក​ពី​ស្ថានភាព​និង​ការ​ប្រឈម​ក្នុង​សម័យ​កាល​នោះ ដោយ​គ្មាន​បង្កប់​នូវ​ចេតនា​អាក្រក់​ណាមួយ​ឡើយ​​។

ជា​ការ​កត់​សម្គាល់ បន្ទាប់​ពី​បាន​ស្ដាប់​ការ​ពន្យល់​បំភ្លឺ​ដូច្នេះ ភាគី​កម្ពុជា​ប្រកាន់​ជំហរ​មិន​ឆ្កឹះ​អតីតកាល ដើម្បី​បង្ក​អន្តរាយ​ដល់​បច្ចុប្បន្នកាល និង​អនាគត​កាល​។ និង​ថា កម្ពុជា​និង​សិង្ហបុរី នៅ​បន្ត​ជា​អ្នក​ជិត​ខាង​ល្អ ជា​មិត្ត​ដ៏​ល្អ​នឹង​គ្នា បន្ត​រក្សា​ការ​សន្ទនា និង​ទំនាក់​ទំនង​ល្អ​ជាមួយ​គ្នា​ត​ទៅ​ទៀត បើ​ទោះ​បី​ជា​ប្រទេស​ទាំង​ពីរ មាន​ទស្សនវិស័យ​ខុស​គ្នា​ស្ដី​ពី​ប្រវត្តិសាស្ត្រ​យ៉ាង​ណា​ក៏​ដោយ​៕

 

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

ចែករំលែក :
រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ