ដំឡូងស្ងោ ដំឡូងឆឹង ដំឡូងចំហុយ ដំឡូងជ្វា ដំឡូងឈើ ដំឡូងដៃខ្លា ... ដំឡូងលែងសូវឃើញមានលក់ និងបរិភោគនៅក្នុងប្រទេសកម្ពុជា តែដំឡូងកំពុងក្លាយជាអាហារដ៏ពេញនិយមនៅអឺរ៉ុប នាពេលបច្ចុប្បន្ននេះ។ ផ្ទុកពេញទៅដោយគុណប្រយោជន៍ផ្នែកអាហារូបត្ថម្ភ ជាប្រភពផ្តល់ថាមពល វីតាមីន ជាតិសរសៃ ដំឡូងមានឈ្មោះក្នុងបញ្ជីម្ហូបកាន់តែច្រើនឡើង។ អ្នកជំនាញផ្នែកចំណីអាហារបារាំងបានថែមទាំងណែនាំអ្នកចង់ធ្វើរបបអាហារឱ្យជ្រើសរើសទទួលទានដំឡូងមួយមុខទៀតផង។
ដុះតែក្នុងប្រទេសក្តៅ
ដំឡូងជ្វា ឬដំឡូង ដែលមានដុះលូតលាស់យ៉ាងសម្បូរបែបនៅក្នុងប្រទេសកម្ពុជា
ដំឡូងដែលជាអាហាររបស់ជនក្រីក្រ កសិករនៅតាមជនបទ
ដំឡូងដែលមានច្រើនពណ៌ ស ក្រហម លឿង ស្វាយ
ឃើញពណ៌ធ្វើឱ្យគេគិតដល់បន្លែការ៉ុត មានឈ្មោះនិងមានសាច់ដូចដំឡូងបារាំង តែដំឡូងខ្មែរ ដំឡូងជ្វា មិនស្ថិតនៅក្នុងចង្កោមគ្រួសារតែមួយជាមួយនឹងដំឡូងបារាំងឡើយ។
មិនត្រឹមតែមានរសជាតិឆ្ងាញ់ ដំឡូងដែលជាមើមរុក្ខជាតិ ជួនត្រូវបានគេចាត់ទុកថាជាពពួកម្សៅ ដូចជាក្រុមសណ្តែក ឬជួនជាបន្លែ ព្រោះសម្បូរជាតិអាមីដុង និងសរសៃ មានអត្ថប្រយោជន៍ចំពោះសុខភាពច្រើន។ គុណប្រយោជន៍នេះត្រូវបានបញ្ជាក់ដោយការសិក្សាបែបវិទ្យាសាស្ត្រ មិនមែនគ្រាន់តែជាជំនឿ ឬដោយមានការចំណាំតៗគ្នាទេ។
ខាងក្រោមនេះជាមូលហេតុ ដែលលោកអ្នកគួរជ្រើសរើសបរិភោគដំឡូង ៖
ជាបឋម ប្រសិនបើគេវិភាគលម្អិតមើលកំរិតនៃសារធាតុចិញ្ចឹមរបស់ដំឡូង គេសង្កេតឃើញថា ដំឡូងសម្បូរទៅដោយវីតាមីនអា ខ្ពស់ណាស់។ វីតាមីនសេ និងបេ៦ បេ២ បេ៥ ក៏មានច្រើន តែមិនច្រើនដូចវីតាមីនអា។ បើមានវីតាមីនអាច្រើន មានន័យថាដំឡូងអាចជួយការពារលើកតម្កើងសុខភាពភ្នែក និងការសមត្ថភាពមើលរបស់ចក្ខុ។ វាមិនមែនជាការកម្រទេ មនុស្សជាច្រើនមានជំងឺភ្នែក មើលមិនឃើញដោយហេតុតែខ្វះវីតាមីនអានោះ។
ដំឡូងជាប្រភពផ្តល់សារធាតុរ៉ែ ស្ពាន់ធ័រ មង់ហ្កាណែស កាល់ស្យូម ដែក អ៊ីយ៉ូត ម៉ាញេស្យូម ផូស្វ័រ ... ពោលគឺដំឡូងជាបណ្តុំនៃសារធាតុអង់ទីអុកស៊ីដង់ ដែលមានសន្ទស្សន៍ជាតិស្ករ ទាបមធ្យម។ ដំឡូងផ្តល់ជាតិប្រូតេអ៊ីនទាបជាងមធ្យមភាគនៃគ្រប់បន្លែទាំងអស់។ ក្នុង១០០ក្រាម ដំឡូងផ្តល់ថាមពល ៨៦កាឡូរី ហើយជាងនេះទៅទៀត សមាសធាតុបន្សំនៃដំឡូង មាន៧៧%ជាជាតិទឹក។
នៅចំពោះមុខសមាសធាតុដ៏គួរឱ្យចាប់អារម្មណ៍យ៉ាងដូច្នេះ ទើបអ្នកវិទ្យាសាស្ត្រផ្តោតការសិក្សាដើម្បីស្វែងយល់អំពីអត្ថប្រយោជន៍នៃដំឡូងចំពោះសុខភាព។
ប្រឆាំងនឹងជំងឺមហារីក
មានការសិក្សាជាច្រើនបានភ្ជាប់ចំណងរវាងការទទួលទានរបបអាហារសម្បូរទៅដោយបន្លែ និងដំឡូងជ្វារទៅនឹងការកាត់បន្ថយគ្រោះកើតជំងឺមហារីកប្រូស្តាត ថង់ប្រមាត់ តម្រងនោម ព្រមមហារីកសុដន់របស់ស្ត្រី មុនពេលរៀបអស់រដូវ។ ឯស្លឹកដំឡូងទំនងជាអាចជួយការពារកុំឱ្យមានគ្រោះកើតជំងឺមហារីកសួត។ ជាទូទៅ និងមួយភាគធំនៃគ្រោះថ្នាក់កើតជំងឺមហារីកមកពីកោសិកាយើងរងប្រតិកម្ម (ចាស់ច្រេះ) ហេតុដូច្នេះហើយបានគ្រូពេទ្យជំនាញតែងណែនាំឱ្យជនគ្រប់រូបបរិភោគអាហារជាបន្លែនិងផ្លែឈើដែលមានសារធាតុអង់ទីអុកស៊ីដង់ខ្ពស់ ក្នុងនោះមានដំឡូងមួយដែរ។ ជាងនេះទៅទៀត ដំឡូងមានសមត្ថភាពមួយជួយពន្យឺតភាពចាស់ជរានៃកោសិកា ដូច្នេះវាក៏អាចជួយកាត់បន្ថយហានិភ័យ (នាំឱ្យកើតជំងឺមហារីក) បង្កឡើងដោយភាពចាស់ទ្រុឌទ្រោមកោសិកា។
ការពារបេះដូង និងជួយថ្លើម
តើដំឡូងជួយការពារបេះដូងយ៉ាងដូចម្តេច ? ដោយសារសមាសធាតុ ជាធម្មជាតិក្នុងមើមដំឡូង ដែលកំរិតប្រតិកម្មអុកស៊ីត មានន័យថាដំឡូងអាចមានសមត្ថភាពកាត់បន្ថយគ្រោះកើតជំងឺសរសៃឈាមបេះដូង។ ដំឡូងពណ៌ស្វាយទំនងជាមានសមត្ថភាពខ្ពស់ជាពិសេសជាងគេ ក្នុងទប់កុំឱ្យមានការកកដុំឈាមនៅលើផ្ទាំងសរសៃឈាម ហើយស្លឹកដំឡូង មានប្រសិទ្ធភាពខាងការពារផ្ទៃនៃសរសៃឈាមតូចៗទៀត។
ការសិក្សាលើសត្វ បានបង្ហាញអំពីសមត្ថភាពការពារថ្លើមរបស់ដំឡូង។ តែចំពោះមនុស្ស ដំឡូងទំនងអាចត្រឹមកាត់បន្ថយគ្រោះរលាកថ្លើម និងកាត់បន្ថយអត្រាអង់ហ្ស៊ីមថ្លើម ដែលជាភ្នាក់ងារបង្កជំងឺនៅថ្លើម។
គុណប្រយោជន៍ដែលវិទ្យាសាស្ត្រមិនទាន់បញ្ជាក់
បើតាមការសិក្សាផ្សេងទៀត ដំឡូងទំនងជាអាចជួយចាត់ចែងអត្រាជាតិស្ករក្នុងឈាមរបស់អ្នកជំងឺទឹកនោមផ្អែម ដោយសារថាដំឡូងមានជាតិសរសៃច្រើន និងសន្ទស្សជាតិស្ករទាប (ការបញ្ជ្រៀបជាតិស្ករមានកំរិតយឺតៗ) និងទំនងជាអាចជួយពន្យឺតភាពចាស់ជរានៃខួរក្បាល។ បើតាមអ្នកស្រាវជ្រាវក្រុមនេះ ដំឡូងអាចទៅជួយខួរក្បាលមនុស្ស ដោយទៅភ្ញោចកោសិកាផ្នែកយល់ដឹង និងការចងចាំ។ ប៉ុន្តែគុណប្រយោជន៍នេះ នៅមិនទាន់មានការបញ្ជាក់នៅឡើយនៅលើរូបមនុស្ស និងជាពិសេសលើអ្នកជំងឺទឹកនោមផ្អែមនៅឡើយទេ។
ការចម្អិន
ដំឡូងជាអាហារដ៏ល្អ ជាប្រភពផ្តល់ថាមពល ផ្តល់វីតាមីន ផ្តល់ជាតិរ៉ែ ជាអាហារដែលមានកំរិតសារធាតុចិញ្ចឹមខ្ពស់ ជួយការពារគ្រោះមានបញ្ហាសរសៃឈាមបេះដូង កាត់បន្ថយការរលាកបង្ករោគ ជំនួយភ្នែកឱ្យភ្លឺមើលស្រួលនៅពេលយប់ ឬជួយខួរក្បាល ប៉ុន្តែត្រូវចេះជ្រើសរើសប្រភេទដំឡូង។ សូមចងចាំថា ដំឡូង មានពណ៌កាន់តែដុត កាន់តែមានគុណភាពខ្ពស់។ ក្នុងចំណោមដំឡូងសាច់ពណ៌ស ពណ៌ទឹកក្រូវ ពណ៌ក្រហមព្រឿងៗ គឺ ពណ៌ស្វាយដែលមានផ្ទុកអាហារូបត្ថម្ភខ្ពស់ជាងគេ។ ហើយកាន់តែប្រសើរទៀត គួរទទួលទានទាំងសម្បក។
ដំឡូងត្រូវបានគេចាត់ទុកជាអាហារដ៏ប្រពៃសម្រាប់អ្នកចង់ធ្វើរបបអាហារ មិនចង់ឡើងទម្ងន់។ លោកអ្នកអាចទទួលទានជាម្ហូបប្រៃ ជាបង្អែម ជាអាហារសម្រន់ ឬជាក្នុងទម្រង់ជំនួសដំឡូងបារាំងបាន ប៉ុន្តែដើម្បីអាចទាញប្រយោជន៍ផ្នែកសុខភាពឱ្យបានកាន់តែពេញលេញ គួរប្រុងប្រយ័ត្នមួយបន្ថែមទៀត គឺវិធីចម្អិន។ សូមជ្រើសរើស ការចម្អិតដំឡូងដោយ ចំហុយ ដោយស្ងោរ ដោយដុត ឬវិធីចម្អិនផ្សេងណាទៀតក៏បាន លើកលែងតែការចៀនឬបន្តោរក្នុងខ្លាញ់ ទើបអាចរក្សាគុណភាពផ្នែកអាហារូបត្ថម្ភរបស់ដំឡូងបាន។ សូមប្រុងប្រយ័ត្ន កុំចម្អិនដំឡូងឱ្យឆ្អិនខ្លាំងពេក ព្រោះដូចបន្លែ គ្រាប់ធញ្ជជាតិ អាហារធ្វើម្សៅអង្ករ ម្សៅពោត ការចម្អិនយូរ អាចធ្វើឱ្យបាត់បង់សារធាតុចិញ្ចឹម និងឡើងជាតិស្ករខ្ពស់។ ការចម្អិនឆ្អិនជ្រុល អាចបង្កើនបរិមាណជាតិស្ករក្លុយស៊ីត តែលោកអ្នកអាចស្តារកែខៃបាន ដោយយកវាទៅទុកក្នុងទូរទឹកកកឱ្យត្រជាក់សិន សឹមបរិភោគ។ ដើម្បីឱ្យវីតាមីន ដូចយ៉ាងវីតាមីនអានៅក្នុងដំឡូងនេះ អាចស្រូបចូលក្នុងសរីរាង្គកាយបានកាន់ល្អ សូមទទួលទានដោយលាយជាមួយប្រេង ប្រេងល្ង ប្រេងអូលីវ ឬផ្លែប័រ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ