ស្តាប់ ថតទុក Podcast
  • 00h00 - 01h00 GMT
    កម្មវិធីព័ត៌មាន 10/12 00h00 GMT
  • 06h00 - 07h00 GMT
    កម្មវិធីព័ត៌មាន 10/12 06h00 GMT
  • 12h00 - 13h00 GMT
    កម្មវិធីព័ត៌មាន 10/12 12h00 GMT

តើអ្វីជា​កីឡា​ដ៏​ប្រពៃ​ជាង​គេ​សម្រាប់​អ្នក​ជំងឺ​ទឹកនោម​ផ្អែម ?

តើអ្វីជា​កីឡា​ដ៏​ប្រពៃ​ជាង​គេ​សម្រាប់​អ្នក​ជំងឺ​ទឹកនោម​ផ្អែម ?
 
តើអ្វីជាកីឡាដ៏ប្រពៃជាងគេសម្រាប់អ្នកជំងឺទឹកនោមផ្អែម ? pixabay

នៅ​ថ្ងៃ​ទី​១៤ វិច្ឆិកា ២០១៩​ ជា​​ទិវា​ពិភពលោក​ប្រឆាំង​នឹងជំងឺ​ទឹកនោម​ផ្អែម។ ចំនួន​អ្នក​កើត​ទឹកនោម​ផ្អែម​ កើន​ឡើង​ជា​លំដាប់។ ៩០%​ជា​ជំងឺ​ទឹក​នោម​ផ្អែម​ប្រភេទ​ទីពីរ ដែល​លេច​ឡើង​លើ​មនុស្ស​ពេញ​វ័យ គ្មាន​របប​អាហារ​ត្រឹមត្រូវ គ្មាន​បញ្ចេញ​សកម្មភាព​ហាត់ប្រាណធ្វើ​កីឡា។ ​កង្វះ​សកម្មភាព​ហាត់​ប្រាណ​ធ្វើ​កីឡា​ ​អាច​​បង្កើន​ហានិភ័យ​កើត​ជំងឺ​ទឹកនោម​ផ្អែម។ ចុះ​បើ​មាន​ជំងឺ​ទឹកនោម​ផ្អែម​ តើ​សកម្មភាព​កីឡា​ប្រភេទ​ណា​អាច​ជួយ​កាត់​បន្ថយ​ជំងឺ ?​

ទឹក​នោម​ផ្អែម​ជា​ជំងឺរ៉ាំរ៉ៃ ដែល​មាន​ចំនួន​អ្នក​ជំងឺ​កើន​ឡើង​ជា​លំដាប់។ មិនមែន​មក​ពី​ប្រជាពលរដ្ឋ​កាន់​តែ​ចាស់​ ទើប​មាន​ចំនួនអ្នក​ជំងឺ​មាន​ច្រើន​ទេ ! អ្នក​ជំងឺ​ទឹក​នោម​ផ្អែម​ថ្មី ច្រើន​ជា​មនុស្ស​វ័យ​ក្មេង​ និង​មិន​ធាត់​ជ្រុល​ផង។​ ទឹក​នោម​ផ្អែម មាន​ពី​រ​ប្រភេទ​ធំៗ គឺ​ទឹកនោម​ផ្អែម​ប្រភេទ​១ ដែល​លេច​ឡើង​នៅ​ពេល​លំពែង​លែង​ផលិត​សារធាតុ​អាំងស៊ុយលីន សម្រាប់ឆ្លើយ​តប​នឹង​​តម្រូវ​ការ​របស់​សរីរាង្គ​កាយ បាន​គ្រប់គ្រាន់ អ្នក​ជំងឺដែល​ភាគ​ច្រើន​ជា​ក្មេង​​ចាំ​បាច់​ត្រូវ​ចាក់​ថ្នាំ​អាំងស៊ុយលីន។ ចំណែក​ ​ទឹកនោម​ផ្អែម​ប្រភេទ​២វិញ លំលែង​ផលិត​សារធាតុ​អាំងស៊ុយ​លីន ប៉ុន្តែ​សរីរាង្គ មិន​អាច​​ប្រើប្រាស់​អាំងស៊ុយលីន​បាន​ដោយ​ត្រឹម​ត្រូវ។ អ្នក​ជំងឺនេះ​ច្រើន​តែ​លេច​ឡើង​នៅ​លើ​មនុស្ស​ពេញ​វ័យ​។

ជំងឺ​​​ទឹកនោម​ផ្អែម​ ​មាន​ពីរ​ដំណាក់កាល ៖ ទីមួយ​គឺ​ដំណាក់កាល​ដែល​មាន​កំរិត​ជាតិ​ស្ករ​ក្នុង​ឈាម​ឡើង​ខ្ពស់ (កំរិត​ជាតិស្ករក្នុង​ឈាម ឡើង​ដល់​១,១ក្រាម នៅ​ពេលពោះ​ទទេ) និង ​ដំណាក់កាលជំងឺ (នៅ​ពេល​កំរិត​ជាតិ​ស្ករក្នុង​ឈាម​ឡើង​ដល់​១,២៦​ក្រាម​ នៅ​ពេល​ពោះ​ទទេ) ឬ​ជា​ដំណាក់កាល ​ស្មុគស្មាញ អាច​​បង្ក​ជា​ផលវិបាក​ផ្សេងៗ។

​យើង​អាចការពារ​បាន​នូវ​ផលវិបាក​ផ្សេងៗនិងអាច​ថែរក្សា​សុខភាព​មិន​ឱ្យ​ជំងឺក្លាយ​​ជា​ធ្ងន់​ធ្ងរ​បាន ដោយ​ស្វែង​រក​ការព្យាបាល​ឱ្យ​បាន​ត្រឹម​ត្រូវ និង​ព្យាយាម​ប្រតិបត្តិការ​រស់​នៅ​ស្អាត ទទួល​ទាន​អាហារ​ឱ្យ​បាន​សម​ល្មម​នឹង​ការ​បញ្ចេញ​កម្លាំង និង​ ហាត់​ប្រាណធ្វើ​កីឡា។ កីឡា​ត្រូវ​បាន​គេ​រាប់​បញ្ចូល​ជា​​វិធីព្យាបាល​ជំងឺ​ទឹកនោម​ផ្អែម​ប្រភេទ​ទីពីរ​។ នៅ​ប្រទេស​បារាំង​លទ្ធភាព​នៃ​ការ​ចេញ​វេជ្ជបញ្ជា​ឱ្យ​អ្នក​ជំងឺ​ហាត់​ប្រាណ​ធ្វើ​កីឡា​ ដើម្បី​ព្យាបាល​ជំងឺរ៉ាំរ៉ៃ ដូច​យ៉ាង​ជំងឺ​ទឹក​នោម​ផ្អែម ទើប​ត្រូវ​បាន​ចែង​នៅក្នុង​ច្បាប់។ ប៉ុន្តែសួរ​ថា​ តើ​ត្រូវ​ហាត់​ប្រាណ​និង​ធ្វើ​កីឡា​អ្វី ដើម្បី​បាន​ទទួល​ផលប្រយោជន៍​ដល់​សុខភាព ?! តើ​ឱ្យ​អ្នក​ជំងឺ​ទឹក​នោម​ធ្វើ​កីឡា​យ៉ាង​ដូចម្តេច ?

​បញ្ចុះ​ជាតិ​ស្ករ បញ្ចេញ​កម្លាំង ជា​អ្វី​ដែល​អ្នក​ជំងឺ​ទឹកនោម​ផ្អែមខ្លាច​រអារ​បំផុត ​! ប៉ុន្តែ​គ្រប់​ការ​សិក្សា​សុទ្ធ​តែ​បញ្ជាក់​ហើយ​បញ្ជាក់​ទៀត អំពី​ឥទ្ធិពល​ដ៏​ល្អ​ប្រពៃ​នៃ​ការ​ធ្វើ​កីឡា​ក្នុង​ការ​ចាត់​ចែង​ជាតិ​ស្ករ​ក្នុង​ឈាម។ អ្នក​ស្រាវជ្រាវ​កំពុង​សិក្សា​​ថា​តើ​ការ​ធ្វើ​កីឡា​កំរិត​ខ្ពស់​អាច​បញ្ចៀស​អ្នក​ជំងឺ​ទឹកនោម​ផ្អែម​មិន​ឱ្យ​​ធ្លាក់​ខ្លួន​មាន​បញ្ហា​ខ្សោយ​តម្រងនោម​ផង។ សិក្សានេះ​នឹងផ្តល់​​លទ្ធផលនៅ​ឆ្នាំ​២០២០។

ក្នុង​ពេល​រង់ចាំ​ អង្គការ​សុខភាព​ពិភពលោក ព្រមទាំង​ ការសិក្សា​របស់​ក្រុម​អ្នក​ស្រាវជ្រាវ​ជា​ច្រើន​ផ្សេង​បាន​ផ្តល់​អនុសាសន៍​​ប្រហាក់​ប្រហែល​គ្នា ឱ្យ​អ្នក​មាន​បញ្ហា​ទឹក​នោម​ផ្អែម និង​អ្នក​មាន​ជំងឺ​ទឹកនោម​ផ្អែម ប្រភេទ​ទីពីរ អាច​ចាប់​ផ្តើម​អនុវត្ត​ជា​ប្រចាំ​នូវ​កីឡា​បែប​ ៖

  • ធ្វើ​កីឡា​បែប​ធន់ រយៈ​ពេល​៣០​នាទី​ក្នុង​មួយ​ថ្ងៃ ៥ដង​ក្នុង​មួយ​សប្តាហ៍ (ដើរ​លឿន ជិះកង់​ ហែល​ទឹក ដែល​យើង​អាច​បង្កើន​ល្បឿន​បន្តិច​ម្តងៗ​​ជា​រៀង​រាល់​ថ្ងៃ)
  • ឬ /និង ធ្វើ​កីឡាបែប ស៊ូ​ ប្រឹង​ល្មម ​ ខ្លីៗ(៥-១០​នាទី) តែ​ច្រើន​ដង​ក្នុង​មួយ​ថ្ងៃ ដើម្បី​ពង្រឹង​សាច់​ដុំ​ជើង​ភ្លៅ និង​កំប៉េះគូថ ​ស្មា និង​ទ្រូង)

សម្រាប់​អ្នក​ស្រាវជ្រាវ អាមេរិក អូស្ត្រាលី​ និង​កាណាដា អ្នក​ជំងឺ​ទឹក​នោម​ផ្អែម គួរ​តែ​ហាត់​ប្រាណ​ធ្វើ​កីឡា​ពង្រឹង​សាច់​ដុំ​ លំហាត់​ស្រួលៗ បែបប្រឹង​​ល្មមៗ​ឱ្យ​សម​នឹង​កម្លាំង​ មិនមែន​ដើម្បី​បាន​ឡើង​សាច់​ដុំ​ទេ។ ខាង​ក្រោម​នេះ​ជា​លំហាត់​ងាយៗ អាច​ធ្វើ​នៅ​ផ្ទះ​ដោយ​ខ្លួន​ឯង​បាន​ ៖

អង្គុយ​លើ​ជើង ៖ ជា​លំហាត់ដែល​ធ្វើ​ឱ្យ​ដាច់​​សាច់​ដុំ​ភ្លៅ​និងកំប៉េះ​គូថប្រឹង​ខ្លាំង។ ពពួក​សាច់​ដុំ​ក្រុម​ធំ​នេះ ត្រូវ​ការ​ជាតិ​ស្ករ​Glucose​ខ្លាំង​ណាស់​ដើម្បី​ដំណើរការ ដូច្នេះ​វា​ជា​លំហាត់​ដ៏​ល្អ សម្រាប់​អ្នក​មាន​បញ្ហា​ ឬ​ជំងឺ​ទឹកនោម​ផ្អែម។

ដើម្បី​ធ្វើ​លំហាត់​នេះ​ អ្នក​ត្រូវការ​តែ​កាបូប​មួយ ទឹក​បីបួន​ដប និង​កៅអី​ដ៏​មាំ​មួយ​ប៉ុណ្ណោះ ! ឈរ​នៅមុខ​កៅអី បើ​មាន​ការ​អី​អ្នកអាច​អង្គុយ​បាន​ភ្លាម។ គន្ធែក​ជើងបន្តិច (ដូច​ទ្រនិច​នាឡិកា​ម៉ោង​១០​និង​១០នាទី) និង​រក្សា​ដង​ខ្លួន​ឱ្យ​នៅ​ត្រង់​ល្អ លាដៃ​ឱ្យ​ត្រង់ទៅ​មុខ រួច​បន្ទន់​ជង្គង់​ ឱ្យគូថ​ប៉ះ​កៅ​អី (ធ្វើ​ដូច​​អង្គុយកៅអី)។​ ងើបអង្គុយៗ​​បួន​ប្រាំ​ដង និង​រហូត​ដល់​១០​ដង ហើយ​​សម្រាកបន្តិច រួច​សិម​ចាប់​ផ្តើម​សាកល្បង​​ជា​ថ្មី​ទៀត​ ពីរ​ទៅ​បីលើក។ ប្រសិន​បើ​អ្នក​ចាំផ្តើម​គ្រប់គ្រង​លំហាត់​នេះ​បាន​ និង​យល់​ថា​ស្រួល​បន្តិច​ហើយ សូម​ចាប់​ផ្តើម​បន្ថែម​ភាព​លំបាក ដោយ​កាន់​ដបទឹក​មួយ​លីត្រ​ដៃ​ម្ខាង​មួយ​ផ្អឹម​នឹង​ទ្រូង ឬលា​ដៃ​ត្រង់​ទៅ​មុខ ដោយ​កាន់​កាបូបដែល​មាន​​ដាក់​ដប​ទឹកមួយ​ដប​-ពីរដប-បីដប​​ ហើយ​ចាប់​ធ្វើ​លំហាត់​​​ដូច​រៀប​រាប់​ខាង​លើ។ បង្កើន​ចំនួន បង្កើន​បរិមាណ​ បង្កើន​ទម្ងន់​កាបូប ...

លំហាត់ទីពីរ ជាការពង្រឹង​ក្រុមសាច់​ដុំ​ស្មា ដៃ​ ទ្រូង។ សាច់ដុំក្រុមនេះ​ក៏​ស្រូប​ជាតិ​Glucose ច្រើន​ដែរ ដូច្នេះ​អ្នក​មាន​បញ្ហា​ទឹកនោម​ផ្អែម​គួរ​ប្រឹង​ហាត់​បើ​អាច​ធ្វើ​បាន។

ដើម្បី​ធ្វើ​លំហាត់​នេះ អ្នក​ត្រូវការ​ខ្នើយកល់​បី ឬ​កម្រាល សម្រាប់​ទ្រាប់​ជង្គង់​និង​ដៃ​ទាំង​ពីរ​ប៉ុណ្ណោះ។ ដូច​ដើរ​ជើង​បួន អ្នក​លត់​ជង្គង់​ និងដាក់​ដៃ​ទាំងពីរ​ច្រត់​ដី ឱ្យ​ត្រង់​កាត់កែង​នឹង​ស្មា និង​ចង្កេះ លា​បាត​ដៃ ប្រឹងផត​ពោះ ងើប​ក្បាល​ឱ្យ​ផុត​​ និងរក្សា​ឱ្យ​ត្រង់​ជាមួយ​ដង​ខ្លួន រួច​បន្ទន់​កែងដៃ​ ប្រមាណ​១០​សង់ទីម៉ែត្រ ហើយ​ងើប​ឡើង​វិញ ដូច​​ធ្វើ​អាវ៉ង់។ ធ្វើ​បែប​នេះ​៥​ដង រួច​សម្រាក​បន្តិច ទើប​ចាប់​ផ្តើម​ធ្វើ​ម្តង​ទៀត ចំនួនពីរឬ​បី​ដង​។

​បង្កើន​ចំនួន​ និង​បន្ទាបខ្លួន​កាន់​តែ​ទាប​ជាង​មុន ... បើ​អ្នក​ទម្លាប់​បាន​ហើយ អ្នក​អាចបង្កើន​ភាព​លំបាក ដោយ​លា​ជើង​ឱ្យ​ត្រង់ ជា​របៀប​​ធ្វើ​អាវ៉ង់​មែនទែន ដដែល​តែ​ក្នុង​បរិមាណកើន​​ជាលំដាប់​ឡើង។

ដើម្បី​ជា​កិច្ច​ប្រុងប្រយ័ត្ន និង​ដើម្បី​សុវត្ថិភាព សូម​ទទួល​ទាន​ទឹក​នៅ​ពេល​មុន ក្រោយ និង​កំពុង ​ធ្វើ​កីឡា និង​ហាត់ប្រាណ​។ សូម​ជ្រើសរើស​ប្រភេទ​កីឡា​និង​ហាត់​ប្រាណ​ណា​ដែល​អ្នក​ចូល​ចិត្ត​ និង​ជាពិសេស​ សូម​ជួប​សួរ​យោបល់​គ្រូពេទ្យ​ជំនាញ​ជា​មុន​ មុន​នឹង​ជ្រើសរើសអនុវត្ត​​កីឡា​ដែល​អ្នក​ចូលចិត្ត។ នេះ​ជា​ដំបូន្មាន​របស់​គ្រូពេទ្យ​ជំនាញ​បារាំង ព្រោះ​កីឡា​ប្រភេទ​ខ្លះ​អាច​នឹង​ធ្វើ​ឱ្យ​អត្រា​ជាតិ​ស្ករ​ក្នុង​ឈាម​កើន​ឡើង​ទៅវិញ ដូចយ៉ាង​កីឡា​បែប​ប្រកួត​ប្រជែង បែប​បង្កើន​ស្ត្រេស វាយសី វាយទែនីស ...


ទាក់ទង​នឹង​ប្រធានបទ​នេះ

  • នាទីសុខភាពនិងអនាម័យ

    ទម្លាប់​ល្អក្នុងគ្រួសារ​កាត់បន្ថយ​គ្រោះ​កើត​ជំងឺ​ទឹកនោម​ផ្អែម​បាន​ដល់​៨០%

    ស្វែងយល់បន្ថែម

  • នាទីសុខភាពនិងអនាម័យ

    ជំងឺទឹកនោមផ្អែម ៖ បញ្ចុះទម្ងន់ ជាមធ្យោបាយ​បញ្ចុះ​ជាតិ​ស្ករ​ក្នុង​ឈាម ?

    ស្វែងយល់បន្ថែម

  • នាទីសុខភាពនិងអនាម័យ

    យល់​ដឹង​អំពី​ជំងឺ​ទឹក​នោម​ផ្អែម

    ស្វែងយល់បន្ថែម

  • នាទីសុខភាពនិងអនាម័យ

    ​ជំងឺ​ទឹក​នោម​ផ្អែម​ ៖ តើ​គួរ​តម​អាហារ​បែប​ណា ?

    ស្វែងយល់បន្ថែម

  • នាទីសុខភាពនិងអនាម័យ

    តែបៃតង ជួយ​ទប់​ស្កាត់​ជំងឺ​ទឹកនោម​ផ្អែម ?

    ស្វែងយល់បន្ថែម

  1. 1
  2. 2
  3. 3
  4. ...
  5. បន្ទាប់ >
  6. ចុងក្រោយ >
កម្មវិធីផ្សាយផ្សេងទៀត
 
សូមអភ័យទោស យើងមិនអាច​ភ្ជាប់​ទៅ​ទំព័រ​ដែល​លោកអ្នក​ស្នើសុំ​បានទេ