កិច្ចប្រជុំអន្តររដ្ឋាភិបាលកម្ពុជា ចិនលើកទី២ ផ្តោតលើកិច្ចសហប្រតិបត្តិការសេដ្ឋកិច្ច
រដ្ឋាភិបាលកម្ពុជា និងរដ្ឋាភិបាលចិន នឹងបើកកិច្ចប្រជុំអន្តររដ្ឋាភិបាលជាលើកទី២ ចាប់ពីថ្ងៃទី២៩ដល់ថ្ងៃទី៣១ធ្នូឆ្នាំ២០១៤នេះ។ កិច្ចប្រជុំដែលធ្វើឡើងនៅភ្នំពេញនេះ គឺនឹងផ្តោតសំខាន់លើការពង្រឹងសេដ្ឋកិច្ច។ កិច្ចប្រជុំនេះ គឺដឹកនាំដោយហោ ណាំហុងរដ្ឋមន្ត្រីក្រសួងការបរទេសកម្ពុជា និងលោក យ៉ាងជាឈី ទីប្រឹក្សារដ្ឋនៃសាធារណរដ្ឋប្រជាមានិតចិន។
ចុះផ្សាយនៅថ្ងៃ៖
ស្តាប់ - ០២:០០
កិច្ចប្រជុំអន្តររដ្ឋាភិបាលកម្ពុជា-ចិនលើកទី២ គឺផ្តោតលើកិច្ចសប្រតិបត្តិការផ្នែកសេដ្ឋកិច្ចជាចំបង។ មានកិច្ចព្រមព្រៀង និងលិខិតប្តូរសារចំនួន៨ នឹងត្រូវចុះហត្ថលេខាក្នុងកិច្ចប្រជុំដែលតំណាងរដ្ឋទាំងពីរធ្វើជាសហប្រធាន។ ក្នុងនោះរួមមាន កិច្ចព្រមព្រៀងស្តីពីកិច្ចសហប្រតិបត្តិការសេដ្ឋកិច្ច និងបច្ចេកទេសដែលមានទឹកប្រាក់៩០០លានយ័ន ដែល៧០០លានយ័នជាជំនួយឥតសំណង និង២០០លានយ័នផ្សេងទៀត ជាកម្ចីឥតការប្រាក់។ លិខិតប្តូរសារស្តីពីគម្រោងរៀបចំផែនការបណ្តាញផ្លូវថ្នល់នៅកម្ពុជា លិខិតប្តូរសារស្តីពីការផ្តល់ម៉ាស៊ីនអេកូចំនួន ២០០គ្រឿង កិច្ចសហប្រតិបត្តិការលើវិស័យអប់រំរវាងកម្ពុជា ចិន និង លិខិតប្តូរសារស្តីពីកិច្ចសហប្រតិបត្តិការការពារជាតិរវាងកម្ពុជា ចិនជាដើម។
ក្រៅពីបើកកិច្ចប្រជុំអន្តររដ្ឋាភិបាលលើកទី២ ជាមួយលោកហោណាំហុងរដ្ឋមន្ត្រីក្រសួងការបរទេសកម្ពុជានៅថ្ងៃទី៣០ធ្នូ លោក យ៉ាង ជាឈីដែលជាតំណាងរដ្ឋាភិបាលចិននឹងចូលជួបជាមួយលោកនាយករដ្ឋមន្ត្រីហ៊ុនសែន នៅព្រឹកថ្ងៃទី៣១ ធ្នូ និងចុងក្រោយចូលគាល់ព្រះករុណាព្រះមហាក្សត្រសម្តេចព្រះបរមនាថនរោត្តមសីហមុនីនៅថ្ងៃដដែលនោះ។ នេះបើតាមការបញ្ជាក់ពីអ្នកនាំពាក្យក្រសួងការបរទេសកម្ពុជា លោក កុយ គួង។
អ្នកនាំពាក្យដដែលរូបនេះ បានបញ្ជាក់ថា កិច្ចប្រជុំលើកទី២រវាងរដ្ឋាភិបាលកម្ពុជា ចិននៅភ្នំពេញនេះគឺសំខាន់ដើម្បីពង្រឹងភាពជាដៃគូរយុទ្ធសាសគ្រប់ជ្រុងជ្រោយរវាងកម្ពុជាចិន។
សូមបញ្ជាក់ថា ចិនជាប្រទេសដែលផ្តល់កម្ចី វិនិយោគ និងជំនួយច្រើនបំផុតសម្រាប់កម្ពុជា។ រដ្ឋាភិបាល បានបង្ហាញរបាយការណ៍ថា គិតត្រឹមឆ្នាំ២០១២ ការវិនិយោគរបស់ប្រទេសចិននៅកម្ពុជា បានកើនដល់ប្រមាណ១,៤១ពាន់លានដុលារសហរដ្ឋអាមេរិក។ ចំណែកចំណែកឯជំនួយ និងកម្ចៃឥណទានគិតត្រឹមឆ្នាំ២០១២ដដែលមានប្រមាណជាង ២,៦ពាន់លានដុល្លារអាមេរិក។
គួរកត់សំគាល់ថា កិច្ចប្រជុំអន្តរដ្ឋាភិបាលរវាងកម្ពុជាចិន លើកទី២នៅទីក្រុងភ្នំពេញ បន្ទាប់ពីកិច្ចប្រជុំលើកទី១នៅទីក្រុងប៉េកាំងនោះ គឺជាជំហ៊ានពូនជ្រំ កិច្ចសហប្រត្តិបត្តការយុទ្ធសាស្ត្រគ្រប់ជ្រុងជ្រោយរវាងប្រទេសតំបន់អាស៊ីទាំងពីរនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ