ជនជាតិម៉ុងតាញ៉ា៥០នាក់កំពុងលាក់ខ្លួនក្នុងព្រៃរង់ចាំការជួយសង្គ្រោះ
ជនជាតិចារ៉ាយ-វៀតណាម ឫម៉ុងតាញ៉ាចំនួនប្រមាណ៥០នាក់ កំពុងលាក់ខ្លួនពួនក្នុងព្រៃនៅក្នុងខេត្តរតនគិរី។ នេះបើតាមលោកឆាយ ធី អ្នកសម្របសម្រួលសមាគមការពារសិទ្ធិមនុស្សអាដហុកប្រចាំខេត្តរតនគិរីដែលបានថ្លែងប្រាប់វិទ្យុបារាំងអន្តរជាតិនៅព្រឹកថ្ងៃព្រហស្បតិ៍នេះ។ ជនជាតិម៉ុងតាញ៉ាទាំងនោះ កំពុងរង់ចាំការជួយអន្តរាគមន៍ពីរដ្ឋាភិបាលកម្ពុជា និង ការិយាល័យឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្ស ដើម្បីជួយសង្គ្រោះពួកគេ។
ចុះផ្សាយនៅថ្ងៃ៖
ស្តាប់ - ០២:១២
គិតចាប់តាំងដើមឆ្នាំ២០១៥ រហូតដល់ពេលនេះ ជនជាតិចារ៉ាយ-វៀតណាម ឫម៉ុងតាញ៉ាចំនួនប្រមាណ៥០ នាក់ កំពុងលាក់ខ្លួនក្នុងព្រៃនៅក្នុងខេត្តរតនគិរី។
លោកឆាយ ធី អ្នកសម្របសម្រួលសមាគមការពារសិទ្ធិមនុស្សអាដហុកប្រចាំខេត្តរតនគិរី បានថ្លែងប្រាប់វិទ្យុបារាំងអន្តរជាតិថា ជនជាតិម៉ុងតាញ៉ាទាំងនោះ បានកំពុងលាក់ខ្លួនពួនអាត្មានៅក្នុងព្រៃដោយទទួលបានជំនួយស្បៀងអាហារពីសំណាក់ជនជាតិចារ៉ាយ-កម្ពុជា។ មន្ត្រីសម្របសម្រួលសិទ្ធិមនុស្សរូបនេះ បានកត់សម្គាល់ថា ចំនួនជនជាតិម៉ុងតាញ៉ា បានកើនឡើងជាបន្តបន្ទាប់ដែលបានភៀសខ្លូនចូលមកទឹកដីកម្ពុជា ដើម្បីគេចពីការធ្វើទុក្ខបុកម្នាញពីសំណាក់អាជ្ញាធរវៀតណាម។
យ៉ាងណាក៏ដោយ អាជ្ញាធរខេត្តរតនគិរី បានបដិសេធនូវចំនួនជនជាតិម៉ុងតាញ៉ាទាំងនោះ។ លោកមឹង ស៊ីនាត អ្នកនាំពាក្យសាលាខេត្តរតនគិរី បានបញ្ជាក់ថា មានជនជាតិម៉ុងតាញ៉ាប្រមាណជាង២០នាក់ប៉ុណ្ណោះដែលកំពុងលាក់ខ្លួនក្នុងព្រៃនៅក្នុងខេត្តរតនគិរី។ អ្នកនាំពាក្យរូបនេះបានបញ្ជាក់បន្ថែមថា នៅពេលនេះអាជ្ញាធរខេត្តកំពុងស្វែងរកជនជាតិម៉ុងតាញ៉ាទាំងនោះ ដើម្បីការពារសុវត្ថិភាព និងសុខភាពជូនពួកគេ។ មកដល់ពេលនេះ អាជ្ញាធររតនគិរី បានស្វែងរកចាប់ខ្លួនជនជាតិម៉ុងតាញ៉ាចំនួន៤ហើយ ប៉ុន្តែលោកមឹង ស៊ីនាត មិនបានបញ្ជាក់ទេថា ជនជាតិម៉ុងតាញ៉ាទាំងនោះ ត្រូវបញ្ជូនទៅឲ្យអាជ្ញាធរវៀតណាមវិញឫយ៉ាងណានៅឡើយទេ។
លោកឆាយ ធី បានឲ្យដឹងថា ជនជាតិម៉ុងតាញ៉ាទាំងនោះកំពុងលាក់ខ្លួនគេចពីការតាមរកចាប់ខ្លួនរបស់អាជ្ញាធរខេត្ត ព្រោះពួកគេខ្លាចថា អាជ្ញាធរនឹងចាប់បញ្ជូនពួកគេទៅកាន់ប្រទេសវៀតណាមវិញ។ ហើយនៅពេលនេះ ពួកគេកំពុងរង់ចាំការជួយសង្គ្រោះពីសំណាក់រដ្ឋាភិបាល និងការិយាល័យឧត្តមស្នងការសហប្រជាជាតិទទួលបន្ទុកសិទ្ធិមនុស្ស។ កាលពីសប្តាហ៍មុន មន្ត្រីការិយាល័យឧត្តមស្នងការសហប្រជាជាតិទទួលបន្ទុកសិទ្ធិមនុស្សនៅកម្ពុជា បានចុះទៅកាន់ខេត្តរតនគិរី ដើម្បីស្វែងរកជនជាតិម៉ុងតាញ៉ាទាំងនោះ ។ ប៉ុន្តែបានរងបរាជ័យ ដោយសារអាជ្ញាធរខេត្តមិនសហការជាមួយ ព្រោះមិនមានលិខិតបញ្ជាក់ពីក្រសួងមហាផ្ទៃ។
លោកខៀវ សុភ័គ អ្នកនាំពាក្យក្រសួងមហាផ្ទៃ បានបញ្ជាក់ថា នៅពេលនេះអាជ្ញាធរកំពុងស្វែងរកជនជាតិម៉ុងតាញ៉ាទាំងនោះ ដើម្បីបញ្ជាក់ឲ្យបានច្បាស់ថា ពួកគេភៀសខ្លួន ព្រោះរងការគៀបសង្កតពិតប្រាកដមែនឫក៏ភៀសខ្លួនចូលកម្ពុជាដោយខុសច្បាប់ ។ ហើយ បើរកឃើញថា ពួកគេពិតជារងការគៀបសង្កត់មែននោះ អាជ្ញាធរនឹងការពារ និងផ្គត់ផ្គង់ពួកគេ ដើម្បីរង់ចាំការទទួលយកទៅរស់នៅក្នុងប្រទេសទីបី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ