ភ្នំពេញ នៅតែរំលឹកខួប ៧ឆ្នាំនៃការរត់ជាន់គ្នាស្លាប់មនុស្សលើស្ពានពេជ្រ ទោះទីក្រុងកោះពេជ្រមិនដូចមុន!
ថ្ងៃទី ២២វិច្ឆិកា ២០១០ - ២២ វិច្ឆិកា ២០១៧ គឺជាខួប ៧ឆ្នាំ នៃមហាព្រឹត្តិការណ៍សោកនាដកម្ម សម្លាប់មនុស្សស្លូតត្រង់ ៣៥០នាក់ ដោយសារការរត់ជាន់គ្នា លើស្ពានកោះពេជ្រ នៅថ្ងៃបុណ្យអុំទូកទី ៣ ។ ទោះបីជាពេលនេះ ទីក្រុងកោះពេជ្រ បានប្រែមុខមាត់ថ្មី អមដោយសំណង់ហេដ្ឋារចនាសម្ព័ន្ធដ៏ខ្ពស់ៗ និងច្រើនស្អេកស្កះ ស្ទើរតែបាំងបាត់ស្តូបរំលឹកវិញ្ញាណក្ខន្ធក៏ដោយ ក៏សាលារាជធានីភ្នំពេញ នៅតែចងចាំ ហើយរំលឹកខួបនៃព្រឹត្តិការណ៍នេះ នៅព្រឹកថ្ងៃទី ២២វិច្ឆិកានេះ។
ចុះផ្សាយនៅថ្ងៃ៖
ស្តាប់ - ០២:១៩
ដូចការគ្រោងទុក សាលារាជធានីភ្នំពេញ នៅព្រឹកថ្ងៃទី ២២វិច្ឆិកានេះ បានរៀបចំពិធីសូត្រមន្ត បង្សុកូល និងរាប់បាត្រឧទ្ទិសកុស ជូនដល់វិញ្ញាណក្ខនជនរងគ្រោះ ដែលបានស្លាប់បាត់បង់ជីវិតក្នុងឧបទ្ទវហេតុ រត់ជាន់គ្នា លើអតីតស្ពានពេជ្រ នៃទីក្រុងកោះពេជ្រ។ ទោះបីជាស្ពានពេជ្រ ត្រូវបានរុះរើចោលក៏ដោយ ប៉ុន្តែសោកនាដកម្មនេះ នៅតែមិនអាចធ្វើឲ្យមហាជន បំភ្លេចបាននោះទេ ជាពិសេសគឺរាល់ពេលព្រះរាជពិធីបុណ្យអុំទូក រៀងរាល់ឆ្នាំ ក្នុងរយៈពេល ៧ឆ្នាំមកនេះ។
យ៉ាងណាមិញ នៅឆ្នាំនេះ វារាងខុសពីឆ្នាំមុនបន្តិច ត្រង់ថាតំណាងរាស្ត្រអតីតគណបក្សប្រឆាំងដ៏ធំជាងគេនៅកម្ពុជា មិនបានបង្ហាញសកម្មភាពរំលឹកខួបនេះ ជាមួយនឹងរដ្ឋាភិបាលកម្ពុជានោះទេ ត្បិតតែបក្សនេះ ទើបតែត្រូវបានរំលាយក្នុងពេលថ្មីៗ។ ប៉ុន្តែសាលារាជធានីភ្នំពេញ បានប្រារព្ធពិធីនេះ ដោយមានការរាប់បាត្រ និងប្រគេនទេយ្យវត្ថុ ដល់ព្រះសង្ឃ ចំនួន ១០៨អង្គ រួមនឹងពិធីសូត្រមន្តតាមបែបសាសនាផ្សេងៗទៀត។
គួររម្លឹកជូនថា នៅវេលាម៉ោងប្រមាណជា ៩យប់ ថ្ងៃទី ៣នៃព្រះរាជពិធីបុណ្យអុំទូក បណ្តែតប្រទីប កាលពីថ្ងៃទី ២២វិច្ឆិកា ឆ្នាំ ២០១០ មានមនុស្សជាច្រើននាក់ បានស្ទះជាប់គ្នា នៅលើស្ពានពេជ្រ រាប់ម៉ោង ទម្រាំមានការជួយទាញចេញបានមកវិញ។ ហើយជាលទ្ធផល មានមនុស្សប្រមាណ ៣៥០នាក់ ត្រូវបានប្រកាសថាស្លាប់ នាថ្ងៃនោះ និងប្រមាណ ៧០០នាក់ទៀត បានរងរបួស ទាំងធ្ងន់ ទាំងស្រាល ហើយត្រូវដឹកទៅសង្គ្រោះបន្ទាន់ តាមមន្ទីរពេទ្យនានា ក្នុងរាជធានីភ្នំពេញ។
ការស្លាប់មនុស្សដ៏ច្រើនសន្ធឹកសន្ធាប់ក្នុងពេលតែមួយ នាពេលនោះ បានធ្វើឲ្យកម្ពុជា មានភាពតក់ស្លុតជាខ្លាំង។ តក់ស្លុត ព្រោះតែហេតុការណ៍នេះ ជារឿងមួយដែលមិនគួរកើតឡើង នៅខណៈពេលដែលប្រជាជនកំពុងតែសប្បាយរីករាយ ក្នុងពិធីបុណ្យប្រពៃណីជាតិ និងស្របពេលដែលប្រទេសកម្ពុជា កំពុងតែប្រកាសថា ពោរពេញដោយសន្តិភាព សុវត្ថិភាព និងសណ្តាប់ធ្នាប់។ ហេតុផលផ្សេងៗ ត្រូវបានបកស្រាយក្រោយហេតុការណ៍នោះ មានដូចជា អ្នកខ្លះថាដោយសារតែការផ្អើលតាមគ្នា និងអ្នកខ្លះនៅតែមានភាពជឿជាក់ លើការឆក់ខ្សែភ្លើងជាដើម។
ក្រោយហេតុការណ៍ឧបទ្ទវហេតុនោះ រដ្ឋាភិបាលកម្ពុជា បានប្រកាសផ្តល់ជំនួយជាទឹកប្រាក់រាប់ពាន់ដុល្លារអាមេរិក ដល់គ្រួសារសព និងអ្នករងរបួសទាំងអស់។ ហើយពេលនោះ ក៏មានសកម្មភាពសប្បុរសធម៌ជាច្រើន ដើម្បីជួយរំលែកទុក្ខដល់ជនរងគ្រោះ។ ក្នុងនោះផងដែរ រដ្ឋាភិបាល ក៏បានរៀបចំធ្វើជាស្តូបរំលឹកវិញ្ញាណក្ខន នៅក្បែរស្ពានពេជ្រ ដោយរាយនាមឈ្មោះជនរងគ្រោះដែលបានបាត់បង់ជីវិតនៅទីនោះ ដើម្បីឲ្យក្រុមគ្រួសាររបស់ពួកគេ បានមករំលឹក ជារៀងរាល់ឆ្នាំ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ