លោកហ៊ុន សែន ប្រាប់វេទិកាសេដ្ឋកិច្ចពិភពលោកថា អាស៊ានដើរយឺតតែរឹងមាំ
លោកនាយករដ្ឋមន្ដ្រី ហ៊ុន សែន បានគូសបញ្ជាក់ប្រាប់វេទិកាសេដ្ឋកិច្ចពិភពលោក នៅថ្ងៃសុក្រម្សិលមិញ ដែលជាថ្ងៃបិទបញ្ចប់កម្មវិធីថា អាស៊ានដើរយឺតតែរឹងមាំ។ ប្រមុខរដ្ឋាភិបាលកម្ពុជាបានថ្លែងយ៉ាងដូច្នេះ នៅក្នុងកិច្ចពិភាក្សាស្ដីពីអាស៊ាន ដែលលោកចូលរួមជាវាគ្មិន រួមជាមួយនាយរដ្ឋមន្ដ្រីវៀតណាម ព្រមទាំងអ្នកជំនាញផ្នែកសេដ្ឋកិច្ចមួយចំនួនទៀត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤១
«តើអាស៊ានក្លាយជាសហគមន៍មួយហើយឬនៅ?» នេះគឺជាប្រធានបទនៃកិច្ចពិភាក្សាស្ដីពីអាស៊ាន ដែលលោកនាយករដ្ឋមន្ដ្រី ហ៊ុន សែន ចូលរួមជាវាគ្មិន នៅក្នុងថ្ងៃបិទបញ្ចប់វេទិកាសេដ្ឋកិច្ចពិភពលោក នៅទីក្រុងដាវ៉ូស ប្រទេសស្វីស។
ប្រធានបទនេះត្រូវបានលើកឡើងដោយសារតែអ្នកសេដ្ឋកិច្ចមើលឃើញថា អាស៊ាន ដែលបានប្រកាសពីការធ្វើសមាហរណកម្មសេដ្ឋកិច្ចតាំងពីឆ្នាំ២០១៥ ធ្វើដំណើរទៅមុខយឺតយ៉ាវណាស់។ កិច្ចពិភាក្សានេះ ក៏មានបំណងស្វែងរកផ្លូវដើរសម្រាប់អាស៊ានផងដែរ ធ្វើយ៉ាងណាឲ្យសមាគមនេះ ដំណើរការទៅមុខរួមគ្នាប្រកបដោយផលិតភាពខ្ពស់។
លោក ហ៊ុន សែន នាយករដ្ឋមន្ដ្រីកម្ពុជា បានឆក់យកឱកាសនេះ ពន្យល់អ្នកចូលរួមពីបញ្ហាប្រឈមដែលធ្វើឲ្យអាស៊ានដើរទៅមុខយឺត៖ ទី១ គឺគម្លាតជីវភាពរបស់ប្រទេសដែលជាសមាជិកអាស៊ាន។ និងទី២គឺហេដ្ឋារចនាសម្ព័ន្ធតភ្ជាប់សហគមន៍អាស៊ាន។ ប៉ុន្តែបើទោះបីជាយ៉ាងដូច្នេះក៏ដោយ លោក ហ៊ុន សែន គូសបញ្ជាក់ថា ប្រទេសជាសមាជិកអាស៊ានធ្វើការដោយម៉ឺងម៉ាត់ និងគោរពគ្នាទៅវិញទៅមក។ ទាំងនេះគឺជាហេតុធ្វើឲ្យអាស៊ានមានសាមគ្គីភាពនិងរឹងមាំ។
នាយករដ្ឋមន្ដ្រីកម្ពុជា មានសុទិដ្ឋិនិយមចំពោះអនាគតអាស៊ាន តែលោកមិនចង់ឲ្យអាស៊ានដើរទៅមុខលឿនពេកនោះទេ។ មិនចង់ឲ្យដើរលឿន ព្រោះមិនចង់ឃើញអាស៊ានដើរជាន់ដានអឺរ៉ុប ដែលកាលពីចុងឆ្នាំ២០១៦កន្លងទៅនេះ អង់គ្លេសបានធ្វើប្រជាមតិចាកចេញពីអឺរ៉ុប។ ចង់ឲ្យអាស៊ានជោគជ័យ លោក ហ៊ុន សែន ពន្យល់ថា គេត្រូវការពេលវេលាមួយសមស្របដើម្បីដោះស្រាយបញ្ហាប្រឈមនៅក្នុងតំបន់ និងដើម្បីអប់រំឲ្យប្រជាជនអាស៊ានជាង៦០០លាននាក់យល់ដឹងពីការធ្វើសមាហរណកម្ម។ ហើយពេលវេលានោះ មិនអាចលឿនពេកទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ