ភ្លៀងមួយមេនៅសៀមរាប បណ្តាលឲ្យរលំផ្ទះនិងបាក់ដើមត្នោតដែលមានអាយុរាប់សិបឆ្នាំនៅតំបន់អង្គរ
ភ្លៀងលាយខ្យល់មួយមេធំ នៅក្នុងខេត្តសៀមរាបកាលពីល្ងាចថ្ងៃទី១៣ឧសភាម្សិលម៉ិញ បានបណ្តាលឲ្យលំនៅស្ថានរបស់ប្រជាពលរដ្ឋរាប់សិបខ្នងបានដួលរលំ។ មិនតែប៉ុណ្ណោះ ភ្លៀងលាយខ្យល់កន្ត្រាក់នេះ ក៏បានបណ្តាលឲ្យរលំបាក់ដើមឈើធំតូចជាច្រើនដើមនៅក្នុងតំបន់អង្គរ ក្នុងនោះក៏មានដើមត្នោតដែលមានអាយុរាប់សិបឆ្នាំដែលដុះក្បែរប្រាសាទអង្គរជាយូមកហើយនោះដែរ។ តែហេតុការណ៍នេះ មិនបណ្តាលឲ្យប៉ះពាល់ដល់ប្រាសាទនោះទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៩
ក្នុងចំណោមដើមឈើធំតូច ដែលបានដួលរលំដោយសារបាតុភូតខ្យល់កន្ត្រាក់កាលពីល្ងាចថ្ងៃទី១៣ឧសភានៅខេត្តសៀមរាប ក៏មានដើមត្នោតដែលមានអាយុរាប់សិបឆ្នាំ ដែលដុះអែបនឹងប្រាសាទអង្គរវត្តដ៏ល្បីល្បាញរបស់ប្រទេសកម្ពុជាជាយូមកហើយនោះដែរ។ នេះបើយោងតាមសេចក្ដីប្រកាសព័ត៌មាន របស់អាជ្ញាធរជាតិអប្សរា កាលពីល្ងាចថ្ងៃទី១៣ ខែឧសភាឆ្នាំ២០១៦នេះ។ បើតាមសេចក្តីប្រកាស ហេតុការណ៍ភ្លៀងលាយខ្យល់កន្ត្រាក់ដ៏អាក្រក់នេះ បានកើតឡើងនៅប្រមាណជាម៉ោង ៣និង៤៥នាទី ដែលបានបោកបក់យ៉ាងខ្លាំងនៅម្ដុំបរិវេណក្រុងអង្គរធំមកកាន់ប្រាសាទអង្គរវត្ត។ ថ្វីត្បិតតែហេតុការណ៍នេះ មិនបណ្ដាលឲ្យមានមនុស្សរងរបួសក្តី ក៏ប៉ុន្តែដើមឈើធំតូចជាច្រើនដើម នៅបរិវេណប្រាសាទអង្គរវត្តខ្លះបាក់មែក ខ្លះបាក់ដើមរលំមកលើដងផ្លូវនៅតាមទីតាំងតំបន់ប្រាសាទមួយចំនួនក្នុងនោះក៏មានដើមត្នោតមួយដើមដែលមានអាយុរាប់សិបឆ្នាំ ស្តិតនៅជ្រុងខាងត្បូងឆៀងខាងលិចនៃខឿនប្រាសាទអង្គរវត្តក៏បានរលំបាក់ផងដែរ។
យ៉ាងណាក៏ដោយ ភ្លាមៗនៃហេតុការណ៍ដ៏អាក្រក់នេះបានស្ងប់ស្ងាត់បន្តិច ភ្នាក់ងារអភិរក្សព្រៃឈើរបស់អាជ្ញាធរជាតិអប្សរាក៏បានចេញធ្វើអន្តរាគមន៍ភ្លាមៗ ដោយក្នុងនោះ ពួកគេបានកាប់លះយកចេញនូវដើមឈើដែលរលំកាត់ផ្លូវ ហើយដើមឈើដែលរលំសង្កត់លើប្រាសាទមួយចំនួនទៀត ក៏ត្រូវបានកាប់លះមែកដើម្បីសម្រាលទម្ងន់កុំឲ្យប៉ះពាល់ដល់ប្រាង្គប្រាសាទផងដែរ។ បើតាមសេចក្តីប្រកាសរបស់អាជ្ញាធរជាតិអប្សរា ហេតុការណ៍នេះ មិនបានបណ្តាលឲ្យប៉ះពាល់ដល់ប្រាសាទអង្គរវត្តនោះទេ។
សូមបញ្ជាក់ថា ភ្លៀងលាយខ្យល់កន្ត្រាក់នៅខេត្តសៀមរាប កាលពីល្ងាចថ្ងៃទី១៣ឧសភាម្សិលម៉ិញ បានប៉ះពាល់ដល់ស្រុកចំនួន៣ គឺស្រុកជីក្រែង បណ្ដាលអោយរលំនិងប៉ើងដំបូលផ្ទះ២២ខ្នង រន្ទះបាញ់គោងាប់០១ក្បាល និងខូចខាតសម្ភារៈមួយចំនួន។ ស្រុកប្រាសាទបាគង បណ្ដាលឲ្យរលំផ្ទះ និងប៉ើងដំបូលផ្ទះ០៣ខ្នង និងប៉ើងដំបូលក្បឿងសាលារៀន០១កន្លែង។ ចំណែកនៅស្រុកពួក បណ្ដាលអោយរលំផ្ទះចំនួន៥៦ខ្នង, ប៉ើងដំបូលផ្ទះ៣៣ខ្នង និងបានបណ្ដាលឲ្យមនុស្ស០៦នាក់ បានរងរបួស និងខូចខាតរបស់របរជាច្រើនទៀត។
យ៉ាងណាក៏ដោយ ហេតុការណ៍ភ្លៀងលាយខ្យល់កន្ត្រាក់ដែលខេត្តសៀមរាបមិនធ្លាប់ជួបប្រទះនេះ កំពុងធ្វើឲ្យអ្នកជំនាញមានការព្រួយបារម្ភថា នឹងធ្វើឲ្យប៉ះពាល់ដល់ប្រាង្គប្រាសាទដែលមានអាយុរាប់រយឆ្នាំរបស់ប្រទេសកម្ពុជា ព្រោះថា ស្ទើតែគ្រប់ប្រាសាទទាំងអស់ នៅខេត្តសៀមរាប សុទ្ធសឹងតែហ៊ុំព័ទ្ធទៅដោយដើមឈើធំៗដុះប្រជ្រៀតគ្នានឹងថ្មប្រាសាទ។
សូមបញ្ជាក់ដែរថា ក្នុងរយៈពេល៥ខែឆ្នាំ២០១៦នេះ យ៉ាងហោចណាស់ មនុស្ស២៦នាក់បានស្លាប់ ដោយសារតែរន្ទះបាញ់និងខ្យល់កន្ត្រាក់ ក្នុងនោះ លំនៅស្ថានរបស់ប្រជាពលរដ្ឋប្រមាណជា៣០០០ខ្នងបានដួលរលំ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ