សៀវភៅអប់រំស្តីពីការប្រឆាំងអំពើពុករលួយត្រៀមសម្រាប់បញ្ចូលក្នុងកម្មវិធីសិក្សាឆ្នាំថ្មី
ក្រុមការងាររៀបចំសៀវភៅស្តីពីការប្រឆាំងអំពើពុករលួយកំពុងត្រៀមបញ្ចូលសៀវភៅនោះ ទៅក្នុងកម្មវិធីអប់រំចំណេះទូទៅកម្រិតមធ្យមសិក្សាបឋមភូមិ នៅទូទាំងប្រទេសកម្ពុជា សម្រាប់បវេសនកាលថ្មី។ ការអះអាងដូច្នេះរបស់អ្នកនាំពាក្យឱ្យក្រសួងអប់រំ យុវជន និងកីឡាកម្ពុជា ត្រូវបានធ្វើឡើងនៅព្រឹកថ្ងៃសៅរ៍នេះ បន្ទាប់អង្គភាពប្រឆាំងអំពើពុករលួយបានបង្រៀនសាកល្បងនូវមេរៀនស្តីពីការប្រឆាំងអំពើពុករលួយសម្រាប់ថ្នាក់ទី៧ ទី៨ និងទី៩ នៅសាកលវិទ្យាល័យភូមិន្ទភ្នំពេញ កាលពីដើមខែមីនានេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០០
ចាប់ពីឆ្នាំសិក្សាថ្មី២០១៥-២០១៦ទៅ សិស្សានុសិស្សចាប់ពីថ្នាក់ទី៧ដល់ថ្នាក់ទី៩ នឹងចាប់ផ្តើមរៀនមុខវិជ្ជាថ្មីមួយ៖ នោះគឺការប្រឆាំងអំពើពុករលួយនៅកម្ពុជា។ នេះបើយោងតាមលោក រស់ សាលីន អ្នកនាំពាក្យឱ្យក្រសួងអប់រំ យុវជន និងកីឡាកម្ពុជា។
សៀវភៅអប់រំស្តីពីការប្រឆាំងអំពើពុករលួយសម្រាប់កម្រិតមធ្យមសិក្សាបឋមភូមិ ស្ថិតក្នុងការរៀបចំបញ្ចប់ បន្ទាប់ពីក្រុមការងាររបស់អង្គភាពប្រឆាំងអំពើពុករលួយ បានបង្រៀនសាកល្បងនៅសាកលវិទ្យាល័យភូមិន្ទភ្នំពេញ កាលពីថ្ងៃទី០៣ និងទី០៤ ខែមីនា ឆ្នាំ២០១។
មេរៀនទាំង១២នៅក្នុងសៀវភៅពុម្ពថ្មីនោះ មានគោលបំណងជាអាទិ៍ ធ្វើឱ្យសិស្សស្មោះត្រង់ មានវិន័យខ្លួនឯង យល់និងគោរពច្បាប់ ចេះត្រិះរិះពិចារណា និងអាចជ្រើសរើសអ្វីដែលល្អសម្រាប់ខ្លួន គ្រួសារ និងសង្គមជាតិ។
ជាក់ស្តែង ក្នុងចំណោមមេរៀនទាំង១២នោះ សៀវភៅអប់រំស្តីពីការប្រឆាំងអំពើពុករលួយសម្រាប់ថ្នាក់ទី៧ ទី៨ និងទី៩ និយាយអំពី៖ ១) ការទទួលខុសត្រូវ ២) ស្វ័យគ្រប់គ្រង ៣) ការយកឈ្នះសម្ពាធពីមិត្តភក្តិ ៤) មានប្រាក់មានអ្វីគ្រប់យ៉ាងឬ? ៥) ជម្រើសត្រឹមត្រូវ ៦) ហ៊ាននិយាយថាទេ ៧) ស្របច្បាប់និងមិនស្របច្បាប់ យុត្តិធម៌និងអយុត្តិធម៌ ៨) ការចូលរួមបង្ការនិងទប់ស្កាត់អំពើពុករលួយ ៩) ទំនាស់ជាមួយខ្លួនឯង ១០) លក្ខណៈវិនិច្ឆ័យការងារ ១១) សុចរិតភាព និង១២) ការអប់រំស្តីពីការប្រឆាំងអំពើពុករលួយ។
ក្រសួងអប់រំ យុវជន និងកីឡា ត្រៀមគ្រូសម្រាប់ការអប់រំមុខវិជ្ជាថ្មីនេះ ក្រោយពីគ្រូបង្វឹករបស់អង្គភាពប្រឆាំងអំពើពុករលួយចុះបណ្ដុះបណ្តាលគ្រូបង្គោលនៅសាលាគរុកោសល្យភ្នំពេញនិងភូមិភាគទាំងអស់។ នេះបើយោងតាមលោក រស់ សាលីន ដែលបានបញ្ជាក់ដែរថា សាលារៀនមធ្យមសិក្សាបឋមភូមិទូទាំងប្រទេសមាន«មូលដ្ឋាន»សម្រាប់បង្រៀនអំពីការប្រឆាំងអំពើពុករលួយហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ