លោកខៀវ សុភ័គ៖ ៦ខែទៀត ជនភៀសខ្លួនអូស្ត្រាលីនឹងចេញរស់នៅដោយខ្លួនឯង
គិតមកដល់ពេលនេះ ជនភៀសខ្លួនអូស្ត្រាលីចំនួន៤ នាក់ បានរស់នៅក្នុងប្រទេសកម្ពុជាជាងពីរខែហើយ បន្ទាប់ពីបញ្ជូនមកដល់ទីក្រុងភ្នំពេញកាលថ្ងៃទី៤ មិថុនា។ ពួកគេ ត្រូវបានដាក់ឲ្យរស់នៅដាច់ដោយពីឡែកពីគេនៅក្នុងខណ្ឌច្បារអំពៅ។ លោកខៀវ សុភ័គ អ្នកនាំពាក្យក្រសួងមហាផ្ទៃ បានបញ្ជាក់នៅថ្ងៃព្រហស្បតិ៍នេះ ថា យ៉ាងយូរបំផុត ៦ ខែទៀត ជនភៀសអូស្ត្រាលីទាំង៤នាក់ នឹងចេញរស់នៅដោយខ្លួនឯងដូចប្រជាពលរដ្ឋខ្មែរទូទៅដែរ។
ចុះផ្សាយនៅថ្ងៃ៖
ស្តាប់ - ០១:៤១
នៅពេលនេះជនភៀសខ្លួនអូស្ត្រាលីទាំង៤នាក់ កំពុងបន្តរៀននិយាយភាសា និង វប្បធម៌ខ្មែរ។ នេះគឺជាការលើកឡើងរបស់លោកខៀវ សុភ័គ អ្នកនាំពាក្យក្រសួងមហាផ្ទៃកម្ពុជា។ ការលើកឡើងរបស់អ្នកនាំពាក្យរូបនេះ បានធ្វើឡើងស្របពេលដែលជនភៀសខ្លួនអូស្ត្រាលីទាំងនោះ កំពុងរស់នៅនៅកម្ពុជាប្រមាណជាង២ខែមកហើយ។
លោកខៀវ សុភ័គ បានបញ្ជាក់ថា ជនភៀសខ្លួនអូស្ត្រាលីទាំងនោះ នឹងរស់នៅដោយខ្លួនឯង បន្ទាប់ពីពួកគេរស់នៅក្រោមការរៀបចំដោយក្រសួងមហាផ្ទៃ យ៉ាងយូរ៦ ខែទៀត។ ប៉ុន្តែលោកមិនទាន់បញ្ជាក់ថា បន្ទាប់ពីនោះ ពួកគេនឹងត្រូវរៀបចំឲ្យរស់នៅក្នុងទីក្រុងភ្នំពេញ ឫ ត្រូវរស់នៅក្រៅក្រុងនៅឡើយទេ។ បើតាមអ្នកនាំពាក្យក្រសួងមហាផ្ទៃ ជនភៀសខ្លួនអូស្ត្រាលីទាំងនោះក៏ធ្លាប់បានចេញទៅដើរកម្សាន្តនៅតាមទីផ្សារមួយចំនួននៅក្នុងរាជធានីភ្នំពេញផងដែរ។
គួរជំរាបជូនថា ជនភៀសខ្លួនទាំង៤នាក់នោះ ត្រូវបានរដ្ឋាភិបាលអូស្ត្រាលីបញ្ជូនមករស់នៅក្នុងប្រទេសកម្ពុជាកាលថ្ងៃទី៤ មិថុនា ក្រោមកិច្ចព្រមព្រៀងទ្វេភាគីបញ្ជូន និង ទទួលភ្ជាប់ជាមួយជំនួយ៤៣លានដុល្លារ រវាងរដ្ឋាភិបាលកម្ពុជា និង អូស្ត្រាលីកាលពីខែកញ្ញា ឆ្នាំ២០១៤កន្លងទៅ។ ជនភៀសខ្លួនទាំង៤ នាក់រួមមាន ៣នាក់គឺជាជនជាតិ អ៊ីរ៉ង់ និងម្នាក់ទៀតជាជនជាតិរូហ៊ីនយ៉ា។ ពួកគេ ត្រូវបានរដ្ឋាភិបាលកម្ពុជា រៀបចំឲ្យរស់នៅដាច់ដោយឡែកពីគេនៅក្នុងផ្ទះវិឡាមួយក្នុងខណ្ឌច្បារអំពៅ រាជធានីភ្នំពេញ ក្រោមជំនួយឧបត្ថម្ភពីអង្គការអន្តរជាតិសម្រាប់ជនភៀសខ្លួន (IOM) និង ស្ថានទូតអូស្ត្រាលីប្រចាំនៅកម្ពុជា។
រដ្ឋាភិបាលអូស្ត្រាលី កាលពីពេលថ្មីៗកន្លងទៅនេះ ក៏បានស្នើឲ្យរដ្ឋាភិបាលកម្ពុជា បញ្ជូនក្រុមការងាររបស់ខ្លួនទៅកាន់កោះណៅរូ ដើម្បីសហការជាមួយអាជ្ញាធរអូស្ត្រាលីក្នុងការរៀបចំទទួលយកជនភៀសខ្លួនមករស់នៅកម្ពុជាបន្ថែមទៀត។ ក៏ប៉ុន្តែរដ្ឋាភិបាលកម្ពុជា បានបដិសេធ ដោយបានអះអាងថា រង់ចាំឲ្យជនភៀសខ្លួន៤នាក់នេះ ធ្វើសមាហរណកម្មជនជាមួយប្រជាពលរដ្ឋកម្ពុជាជាមុនសិន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ