សំណាកឈាមអ្នកភូមិរការត្រូវបានបញ្ជូនទៅអាមេរិក និងកូរ៉េ ដើម្បីផ្ទៀងផ្ទាត់
ក្រោយមានការខ្វែងគំនិតគ្នាស្តីពីករណីផ្ទុះអ្នកផ្ទុកមេរោគអេដស៍នៅខេត្តបាត់ដំបងជាច្រើនរយនាក់នោះ សំណាកឈាមពលរដ្ឋក្នុងភូមិរការត្រូវបញ្ជូនទៅកាន់មន្ទីរពិសោធន៍របស់អាមេរិក និងកូរ៉េខាងត្បូង កាលពីថ្ងៃទី២៤ធ្នូក្នុងសប្តាហ៍នេះ ។ ការបញ្ជូននេះគឺដើម្បីផ្ទៀងផ្ទាត់បញ្ជាក់បន្ថែមបន្ទាប់ពីមន្ទីពេទ្យក្នុងស្រុកបញ្ជាក់ថា មានមេរោគអេដស៍រួចមក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៧
សំណាកឈាមរបស់ពលរដ្ឋនៅភូមិរការដែលត្រូវមន្ទីពេទ្យក្នុងស្រុកបញ្ជាក់ថា មានផ្ទុកមេរោគអេដស៍នោះ ឥឡូវនេះកំពុងត្រូវបានពិនិត្យដោយមន្ទីពិសោធន៍អាត្លង់តា របស់អាមេរិក និងមន្ទីរពិសោធន៍របស់កូរ៉េខាងត្បូង។ នេះបើតាមការបញ្ជាក់ពីលោក មាន ឈីវុន ប្រធានមជ្ឈមណ្ឌលជាតិប្រយុទ្ធនឹងមេរោគអេដស៍ ជំងឺអេដស៍ សើស្បែក និងជំងឺកាមរោគ ដែលបានប្រាប់វិទ្យុបារាំងអន្តរជាតិនៅថ្ងៃសុក្រទី២៦ធ្នូនេះ។ លោកបានបន្តថា សំណាកឈាមគំរូនេះត្រូវបានបញ្ជូនទៅកាន់ប្រទេសទាំងពីរនោះ តាំងពីថ្ងៃពុធ ទី២៤ធ្នូមកម្ល៉េះ។
អាជ្ញាធរសុខាភិបាលនៅមិនទាន់អាចសន្និដ្ឋានពីករណីផ្ទុះមេរោគអេដស៍បាននៅឡើយនៅពេលនេះ ប៉ុន្តែលោក មាន ឈីវុន បានលើកឡើងថា អាជ្ញាធរកំពុងរង់ចាំសំណាកឈាមពីមន្ទីពិសោធន៍បរទេសទាំងពីរ និងលទ្ធផលនៃការសិក្សាស្រាវជ្រាវពីករណីនៅតាមមូលដ្ឋានដែលអាជ្ញាធរសុខាភិបាលទើបបានបិទបញ្ចប់ការសិក្សារបស់ខ្លួន។
សូមរំលឹកថា ប្រជាពលរដ្ឋច្រើនជាង១០០នាក់នៅក្នុងភូមិរការ ខេត្តបាត់ដំបង ត្រូវបានមន្ទីពេទ្យក្នុងស្រុកវិនិច្ឆ័យថាមានផ្ទុកមេរោគអេដស៍។ ហើយទាក់ទងនឹងករណីឆ្លងមេរោគអេដស៍នេះ តុលាការខេត្តបានបានសម្រេចចោទប្រកាន់គ្រូពេទ្យមានប្រជាប្រិយភាពក្នុងភូមិ គឺលោក យ៉ែម ជ្រិម ក្រោមបទចោទចំនួនបី គឺ អំពើឃាតកម្មដោយឃោរឃៅ ចេតនាចម្លងជំងឺអេដស៍ និងបើកកន្លែងពិគ្រោះជំងឺដោយគ្មានការអនុញ្ញាតពីក្រសួងសុខាភិបាល។
ទន្ទឹមនឹងការផ្ទុះមេរោគអេដស៍ដែលប្រជាពលរដ្ឋចោទលោកគ្រូពេទ្យដែលមានប្រជាប្រិយភាពនោះ លោក ជេត វណ្ណី ស្នងការរងនគរបាលខេត្តបាត់ដំបង បានបញ្ជាក់ថា មិនមានករណីប្តឹងផ្តល់របស់ប្រជាពលរដ្ឋដើម្បី ទាមទារជំងឺចិត្តពីលោកគ្រូពេទ្យនោះទេ។ រហូតមកដល់ពេលនេះ មានប្រជាពលរដ្ឋប្រមាណជាង១ពាន់៦នាក់ហើយមកពីភូមិចំនួន៤ ក្នុងឃុំរការ បានមកពិនិត្យឈាមរកមេរោគអេដស៍ជាបន្តបន្ទាប់។
លោកមាន ឈីវុន ប្រធានមជ្ឈមណ្ឌលជាតិប្រយុទ្ធនឹងមេរោគអេដស៍ ជំងឺអេដស៍ សើស្បែក និងជំងឺកាមរោគ បានលើកថា ការបញ្ជូនទៅកាន់មន្ទីរពិសោធន៍នៅអាមេរិក និងកូរ៉េខាងត្បូងនេះ គឺដើម្បីបញ្ជាក់ឱ្យកាន់តែច្បាស់ដើម្បីជៀសវាងការវាយតម្លៃខុស។ យ៉ាងណាក៏ដោយ អ្នកជំនាញសុខាភិបាលបានបញ្ជាក់ថា ការពិនិត្យឈាមរកមេរោគអេដស៍នៅបរទេស និងកម្ពុជា គឺដូចគ្នាតែប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ