បញ្ហានយោបាយកម្ពុជា៖ សាខាអតីតគណបក្សសង្គ្រោះជាតិប្រចាំនៅបារាំងស្នើសុំអន្តរាគមន៍ពីសហភាពអឺរ៉ុប
ការចាប់ខ្លួននិងការចោទប្រកាន់ជាបន្តបន្ទាប់ លើសកម្មជនអតីតគណបក្សសង្គ្រោះជាតិ នារយៈពេលចុងក្រោយនេះ ត្រូវបានសាខាអតីតគណបក្សសង្រ្គោះជាតិប្រទេសបារាំង ដាក់លិខិតពីរច្បាប់ទៅកាន់សហភាពអឺរ៉ុបឲ្យជួយអន្តរាគមន៍។ សូមជំរាបជូនថា គិតត្រឹមថ្ងៃទី ១១ តុលានេះ មានសកម្មជនអតីតគណបក្សសង្គ្រោះជាតិប្រមាណជិត៤០នាក់ត្រូវបានអាជ្ញាធរកម្ពុជាចាប់ខ្លួនពីបទ «រួមគំនិតក្បត់»។
ចុះផ្សាយនៅថ្ងៃ៖
ស្តាប់ - ០២:០២
លិខិតទាំងពីរនេះ មួយច្បាប់ត្រូវបានផ្ញើទៅកាន់លោកស្រី Cécilia Malström ស្នងការពាណិជ្ជកម្មសហភាពអឺរ៉ុប និងមួយច្បាប់ទៀតផ្ញើទៅកាន់ស្ថាប័ណ្ណ European External Action Service។ យោងតាមលិខិតសុំអន្តរាគមន៍ទាំងពីរនេះ ពួកគេបានរំលឹកដល់លោកស្រី Cécilia Malström ស្នងការពាណិជ្ជកម្មសហភាពអឺរ៉ុបពីស្ថានភាពនយោបាយនៅកម្ពុជាថា កាន់តែធ្លាក់ចុះដុនដាប និងគួរឱ្យព្រួយបារម្មណ៍ជាខ្លាំង បន្ទាប់ពីព្រឹត្តិការណ៍ចុងក្រោយនេះ អាជ្ញាធររដ្ឋាភិបាលកម្ពុជា បានចាប់ខ្លួនសកម្មជនអតីតគណបក្សប្រឆាំងជាបន្តបន្ទាប់។
គួរជំរាបជូនថា គិតមកទល់នឹងនៅពេលនេះ មនុស្សប្រមាណជា៣៩នាក់ហើយ ដែលត្រូវបានអាជ្ញាធរកម្ពុជាចាប់ខ្លួន និងជាង២០០នាក់ត្រូវបានចោទប្រកាន់ពីបទ «រួមគំនិតក្បត់» និងកំពុងរត់គេចខ្លួន បន្ទាប់ពីពួកគេបានប្រកាសគាំទ្រដំណើរមាតុភូមិនិវត្តន៍របស់លោក សម រង្ស៊ី ហើយជាអ្វីដែលរដ្ឋាភិបាលកម្ពុជាចាត់ទុកថា ជាផែនការធ្វើរដ្ឋប្រហារដើម្បីផ្តួលរំលំរដ្ឋាភិបាល។ នេះបើតាមលិខិតរបស់សាខាអតីតគណបក្សសង្គ្រោះជាតិប្រចាំប្រទេសបារាំង CNRP-Fr កាលពីថ្ងៃទី ១០ តុលា។ បន្ថែមលើនេះ លិខិតក៏បានស្នើសុំឲ្យសហភាពអឺរ៉ុបប្រើឥទ្ធិពលរបស់ខ្លួន និងប្រើគ្រប់មធ្យោបាយទាំងអស់ដែលខ្លួនមាន ដើម្បីធានាការពារនូវសុវត្ថិភាពរបស់លោក សម រង្ស៊ី រួមទាំងថ្នាក់ដឹកនាំអតីតគណបក្សសង្រ្គោះជាតិ ដែលគ្រោងធ្វើមាតុភូមិនិវត្តន៍មកប្រទេសកម្ពុជាវិញ នៅថ្ងៃទី ០៩ វិច្ឆិកា ខាងមុខ។ ជាអ្វីដែលពួកគេបានអះអាងថា គឺដើម្បីស្តារលទ្ធិប្រជាធិបតេយ្យ និងជួយសង្គ្រោះប្រព័ន្ធអនុគ្រោះពន្ធ EBA ឡើងវិញ និងដើម្បីនាំមកនូវសេរីភាព និងប្រជាធិបតេយ្យដល់ប្រជាពលរដ្ឋរបស់ខ្មែរ។
យ៉ាងណាក៏ដោយ គេនៅមិនទាន់ឃើញមានការឆ្លើយតបពីលោកស្រី Cécilia Malström ស្នងការពាណិជ្ជកម្មសហភាពអឺរ៉ុបទៅនឹងលិខិតនេះនៅឡើយទេ។ ក៏ប៉ុន្តែចាប់តាំងពីខែកុម្ភៈ ឆ្នាំ ២០១៩ មក សហភាពអឺរ៉ុបបានចាប់ផ្តើមអនុវត្តដំណើរការនីតិវិធីមួយរបស់ខ្លួន ដែលអាចនាំទៅដល់ការដកប្រព័ន្ធអនុគ្រោះពន្ធ EBA ពីកម្ពុជា នៅឆ្នាំ២០២០ខាងមុខនេះ ដើម្បីឆ្លើយតបទៅនឹងចំណាត់ការរបស់រដ្ឋាភិបាលកម្ពុជា លើអតីតគណបក្សប្រឆាំង នារយៈពេលពីរឆ្នាំចុងក្រោយនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ