ឃុំបឹងប្រាំនិងឃុំក្លែង៖លទ្ធផលចុងក្រោយ គឺគណបក្សសង្គ្រោះជាតិឈ្នះគណបក្សប្រជាជនកម្ពុជា
ការរាប់សន្លឹកឆ្នោតឡើងវិញរបស់ការិយាល័យចំនួន៩ ក្នុងឃុំបឹងប្រាំ ស្រុកបរវេល ខេត្តបាត់ដំបងនិង ការិយាល័យមួយទៀតនៅក្នុងឃុំក្លែង ខេត្តកំពង់ធំ បានបញ្ចប់ហើយកាលល្ងាចមិញដោយលទ្ធផលចុងក្រោយបង្ហាញថា គឺនៅឃុំបឹងប្រាំគណបក្សសង្គ្រោះជាតិទទួលបានសំឡេង៧៧៦ ឈ្នះគណបក្សប្រជាជនកម្ពុជា៦៩សំឡេងដោយគណបក្សកាន់អំណាចទទួលបាន៧០៧សំឡេង។ ចំណែកនៅឃុំក្លែងវិញ គឺគណបក្សសង្គ្រោះជាតិបានឈ្នះគណបក្សប្រជាជនកម្ពុជាដោយលទ្ធផល៣៣៧សំឡេងទល់៣៣៥សំឡេង។
ចុះផ្សាយនៅថ្ងៃ៖
ស្តាប់ - ០២:១៥
ខុសពីការរាប់សន្លឹកឆ្នោតឡើងវិញរបស់ឃុំដូងខេត្តស្វាយរៀង នៅពេលនេះការរាប់ឡើងវិញនៅឃុំបឹងប្រាំ ខេត្តបាត់ដំបង និងឃុំក្លែង ខេត្តកំពង់ធំដែលធ្វើឡើងនៅទីស្តីការគណៈកម្មាធិការជាតិរៀបចំការបោះឆ្នោត(គ.ជ.ប) គឺលទ្ធផលចុងក្រោយគណបក្សសង្គ្រោះជាតិបានឈ្នះគណបក្សប្រជាជនកម្ពុជាទាំងពីរឃុំតែម្តង។ ការិយាល័យចំនួន៩នៅក្នុងឃុំបឹងប្រាំ ត្រូវបានគ.ជ.បចាប់ផ្តើមរាប់ឡើងវិញតាំងពីព្រឹកព្រលឹម ខណៈការិយាល័យមួយរបស់ឃុំក្លែង ត្រូវបានរាប់ឡើងវិញនៅពេលរសៀលហើយលទ្ធផលចុងក្រោយបានប្រកាសរួមគ្នាតែម្តងនៅពេលល្ងាច។ ការរាប់សន្លឹកឆ្នោតឡើងវិញទាំងនេះ សុទ្ធតែមានការចូលរួមសង្កេតការណ៍ដោយផ្ទាល់ពីតំណាងគណបក្សនយោបាយ និងអង្គការសង្គមស៊ីវិលមួយចំនួនទៀត។
ចំពោះឃុំបឹងប្រាំ សូមជំរាបជូនថា ការសម្រេចរាប់សន្លឹកឆ្នោតឡើងវិញនេះ គឺធ្វើឡើងតាមបណ្តឹងជំទាស់របស់គណបក្សប្រជាជនកម្ពុជាដែលមិនសុខចិត្តនឹងការរាប់ឡើងវិញនៅថ្នាក់ខេត្តដែលធ្វើឲ្យគណបក្សកាន់អំណាចមួយនេះចាញ់ឆ្នោតគណបក្សប្រឆាំង។ ដើមឡើយលទ្ធផលបោះឆ្នោតបឋមដែលបានចេញផ្សាយដោយ គណៈកម្មាធិការជាតិរៀបចំការបោះឆ្នោត(គ.ជ.ប)បានបង្ហាញថា ឃុំបឹងប្រាំនេះ គឺគណបក្សប្រជាជនកម្ពុជាបានទទួលសំឡេងឆ្នោតចំនួន៦៣១សំឡេងគឺបានឈ្នះ២៣សំឡេងទៅលើគណបក្សសង្គ្រោះជាតិដែលទទួលបានសំឡេងឆ្នោតចំនួន ៦០៨សំឡេង។ គណបក្សសង្គ្រោះជាតិមិនសុខចិត្តក៏បានប្តឹងសុំឲ្យរាប់សន្លឹកឆ្នោតឡើងវិញ។ ក្រោយមក គណៈកម្មការរៀបចំការបោះឆ្នោតខេត្តបាត់ដំបងបានរាប់ឡើងវិញហើយលលទ្ធផលនោះ គណបក្សប្រជាជនកម្ពុជាបានចាញ់សំឡេងឆ្នោតគណបក្សសង្គ្រោះជាតិទៅវិញ។ នេះជាហេតុផលបណ្តាលគណបក្សប្រជាជនកម្ពុជាប្ដឹងសុំរាប់សន្លឹកឆ្នោតឡើងវិញម្តងទៀតនៅថ្នាក់ជាតិតែម្តង។
សូមបញ្ជាក់ដែរថា ការរាប់សន្លឹកឆ្នោតឡើងវិញរបស់ឃុំបឹងប្រាំនេះ គឺជាលើកទីពីរហើយដែលធ្វើឡើងដោយគណៈកម្មការធិការជាតិរៀបចំការបោះឆ្នោត ខណៈឃុំក្លែងគឺជាលើកទីបី។ កាលពីថ្ងៃទី១២ និង១៣ មិថុនា គ.ជ.បបានចំណាយពេលពីរថ្ងៃនេះ ដើម្បីធ្វើការរាប់សន្លឹកឆ្នោតឡើងវិញនូវការិយាល័យចំនួន២៣ នៅក្នុងឃុំដូង ស្រុករមាសហែក ខេត្តស្វាយរៀងដ៏ចម្រូងចម្រាស។ នៅទីបំផុត គណៈកម្មាធិការជាតិរៀបចំការបោះឆ្នោត បានបិទផ្លូវតវ៉ាដោយសម្រេចឲ្យគណបក្សប្រជាជនកម្ពុជាឈ្នះគណបក្សសង្គ្រោះជាតិចំនួន២សំឡេងប៉ុណ្ណោះ ដោយគណបក្សប្រជាជនកម្ពុជាទទួលបានសំឡេងចំនួន២ពាន់៦១១សំឡេង រីឯគណបក្សសង្គ្រោះជាតិទទួលបានសំឡេងចំនួន២ពាន់៦០៩សំឡេង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ