បក្សជាប់ឆ្នោតទាំងពីរបញ្ចប់ភាពជាប់គាំងនៃកំណែទម្រង់ច្បាប់បោះឆ្នោត
គណបក្សប្រជាជនកម្ពុជា និងគណបក្សសង្គ្រោះជាតិ បានដោះស្រាយបញ្ចប់នូវរាល់បញ្ហាដែលនៅសេសសល់ទាំងអស់នៃសេចក្តីព្រាងសេចក្តីស្នើវិសោធនកម្មច្បាប់ស្តីពីការបោះឆ្នោតជ្រើសតាំងតំណាងរាស្ត្រ។ ការដោះស្រាយបញ្ចប់បានធ្វើឡើងនៅក្នុងកិច្ចប្រជុំលើកទីពីររបស់ថ្នាក់ដឹកនាំតំណាងរាស្ត្រនៃគណបក្សប្រជាជនកម្ពុជា ដឹកនាំដោយលោកស ខេង និង ខាងគណបក្សសង្គ្រោះជាតិដឹកនាំដោយ លោកសម រង្ស៊ី កាលពីល្ងាចថ្ងៃសៅរ៍ម្សិលមិញនៅវិមានរដ្ឋសភា។
ចុះផ្សាយនៅថ្ងៃ៖
ស្តាប់ - ០៣:០៧
បន្ទាប់ពីជួបពិភាក្សាគ្នាអស់រយៈពេលប្រមាណ៤ម៉ោង ថ្នាក់ដឹកនាំតំណាងរាស្ត្រនៃគណបក្សប្រជាជនកម្ពុជា និងគណបក្សសង្គ្រោះជាតិ បានបិទបញ្ចប់ទាំងស្រុងនូវបញ្ហាដែលនៅសេសសល់នៃសេចក្តីព្រាងសេចក្តីស្នើវិសោធនកម្មច្បាប់ស្តីពីការបោះឆ្នោតជ្រើសតាំងតំណាងរាស្ត្រ។ សេចក្តីព្រាងសេចក្តីស្នើវិសោធនកម្មច្បាប់នេះ ត្រូវក្រុមការងារចរចានៃគណបក្សទាំងពីរ បានជួបពិភាក្សាគ្នាជាបន្តបន្ទាប់អស់រយៈពេលជិត៣ខែមកហើយ។
លោកសម រង្ស៊ី ប្រធានថ្នាក់ដឹកនាំតំណាងរាស្ត្រនៃគណបក្សសង្គ្រោះជាតិបានមានប្រសាសន៍ថា “ យើងបានបញ្ចប់ការងារយើងទាំងអស់ហើយ ចំណុចដែលនៅសេសសល់យើងបានដោះស្រាយទាំងអស់ដោយស្មារតីលើកតម្កើងថា ជាស្មារតីរួបរួមជាតិយោងវប្បធម៌សន្ទនាដែលគណបក្សទាំងពីរបានផ្តួចផ្តើមបង្ហាញឲ្យឃើញថា វប្បធម៌សន្ទនានេះបាននាំមកនូវផ្លែផ្កាជាវិជ្ជមានហើយថ្ងៃទី២៨ ខែកុម្ភៈនេះ គឺជាថ្ងៃមួយដែលអាចកត់ត្រាក្នុងប្រវត្តិសាស្ត្រថា ខ្មែរយើងគ្រប់និន្នាការនយោបាយអាចធ្វើការជាមួយគ្នា ដើម្បីឧត្តមប្រយោជន៍របស់ជាតិមាតុភូមិនៃយើងទាំងអស់គ្នា បាទ ! “។
ជាមួយគ្នានោះ លោកស ខេង ប្រធានថ្នាក់ដឹកនាំតំណាងរាស្ត្រនៃគណបក្សប្រជាជនកម្ពុជា បានបន្ថែមថា “ ខ្ញុំគិតថា នីតិវិធីបន្តនោះ គឺយើងនឹងខិតខំ ដើម្បីធ្វើយ៉ាងម៉េចឲ្យច្បាប់នេះចូលទៅជាច្បាប់ដែលមានជាធរមានអាចប្រើប្រាស់បានក្នុងពេលឆាប់ៗខាងមុខនេះ។
សូមបញ្ជាក់ថា ជំនួបថ្នាក់ដឹកនាំតំណាងរាស្ត្រនៃគណបក្សទាំងពីរនេះ គឺបានធ្វើឡើងតែប៉ុន្មានថ្ងៃប៉ុណ្ណោះ បន្ទាប់ពីលោកនាយករដ្ឋមន្ត្រីហ៊ុន សែន បានព្រមានខ្លាំងៗចំពោះគណបក្សសង្គ្រោះជាតិកាលពីថ្ងៃទី២៥ កុម្ភៈថា ប្រសិនបើក្រុមការងារចរចាកែច្បាប់បោះឆ្នោតនៃគណបក្សទាំងពីរនៅតែបន្តខ្វែងគំនិតគ្នាទៀតនោះ គឺគួរតែបន្តប្រើប្រាស់ច្បាប់បោះឆ្នោតចាស់។
គួររំលឹកជូនផងដែរថា ក្រុមការងារចរចាកែច្បាប់បោះឆ្នោតនៃគណបក្សទាំងពីរ បានបន្សល់ទុកនូវចំណុចខ្វែងគំនិតគ្នាចំនួន១៥ចំណុចស្មើនឹង១៥មាត្រា។ ចំណុចខ្វែងគំនិតទាំងនោះរួមមានដូចជា ការកំណត់អត្តសញ្ញាណអ្នកបោះឆ្នោត ការចេញឯកសារឲ្យអ្នកមានឈ្មោះក្នុងបញ្ជីបោះឆ្នោត ការបន្ថែមអាសនៈរដ្ឋសភា ការកំណត់សកម្មភាព រយៈពេល និងទីតាំងនៃការឃោសនាបោះឆ្នោត ការចែងពីអព្យាក្រឹតឥតលំអៀងរបស់អង្គការសង្គមស៊ីវិល និងការចូលរួមរបស់មន្ត្រីកងកម្លាំងប្រដាប់អាវុធ និងមន្ត្រីតុលាការក្នុងសកម្មភាពឃោសនាបោះឆ្នោតជាដើម។ ចំណុចទាំងនេះ ត្រូវបានថ្នាក់ដឹកនាំតំណាងរាស្ត្រនៃគណបក្សទាំងពីរ បានដោះស្រាយបញ្ចប់ទាំងស្រុង។ ក៏ប៉ុន្តែទាក់ទងនឹងការធានានិរន្តរភាព និងប្រក្រតីភាពនៃស្ថាប័នជាតិ ដើម្បីបង្ការភាពជាប់គាំងក្រោយពីការបោះឆ្នោត ថ្នាក់ដឹកនាំតំណាងរាស្ត្រនៃគណបក្សទាំងពីរ បានព្រមព្រៀងគ្នាជាគោលការណ៍ ដើម្បីសិក្សាបញ្ហានេះ ហើយនឹងរៀបចំដាក់បញ្ចូលទៅក្នុងអត្ថបទច្បាប់សមស្របណាមួយ។ នេះ បើតាមសេចក្តីប្រកាសរួមនៃជំនួបថ្នាក់ដឹកនាំតំណាងរាស្ត្រនៃគណបក្សទាំងពីរ។
ទន្ទឹមគ្នានេះដែរ គណបក្សទាំងពីរក៏បានឯកភាពគ្នាថា នឹងរៀបចំសិក្ខាសាលាពិគ្រោះយោបល់លើសេចក្តីព្រាងសេចក្តីស្នើវិសោធនកម្មច្បាប់ស្តីពីការបោះឆ្នោតជ្រើសតាំងតំណាងរាស្ត្រ និងសេចក្តីព្រាងសេចក្តីស្នើច្បាប់ស្តីពីការរៀបចំនិងការប្រព្រឹត្តទៅនៃគណៈកម្មាធិការជាតិរៀបចំការបោះឆ្នោតនាពេលដ៏ខ្លីខាងមុខនេះផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ