កូដកម្មទារឡើងប្រាក់ខែរបស់បុគ្គលិកក្រុមហ៊ុនសម្អាតសំរាម ស៊ីនទ្រី មិនទាន់មានដំណោះស្រាយ
រហូតដល់ថ្ងៃទី១៦ធ្នូនេះ កូដកម្មទាមទារឡើងប្រាក់ខែរបស់បុគ្គលិកក្រុមហ៊ុនសម្អាតសំរាម ស៊ីនទ្រី នៅភ្នំពេញ មិនទាន់មានដំណោះស្រាយនៅឡើយទេ។ ក្រុមបុគ្គលិកប្រមាណជាង ១០០០ នាក់ បានបន្តទារឡើងប្រាក់ខែមួយជាពីរ ខណៈដែលខាងក្រុមហ៊ុន ស៊ីនទ្រី អះអាងថា ពុំមានលទ្ធភាព។ រីឯអាជ្ញាធររាជធានីភ្នំពេញ បានជំរុញឲ្យមានដំណោះស្រាយឲ្យបានឆាប់ ហើយកុំឲ្យក្រុមហ៊ុន និងបុគ្គលិកក្រុមហ៊ុនស៊ីនទ្រី យកបញ្ហាសំរាម ធ្វើជាចំណាប់ខ្មាំង។
ចុះផ្សាយនៅថ្ងៃ៖
ចាប់តាំងពីល្ងាចថ្ងៃអាទិត្យ ទី១៤ធ្នូ រហូតដល់ថ្ងៃទី១៦ធ្នូ បុគ្គលិកក្រុមហ៊ុនសំអាតសំរាម ស៊ីនទ្រី ប្រមាណជាង ១០០០ នាក់ នៅរាជធានីភ្នំពេញ បានធ្វើកូដកម្ម ទាមទារឡើងប្រាក់ខែជាថ្មី ចាប់ពី ២០០ ដុល្លារ រហូតដល់ ៣០០ ដុល្លារ។ ពោលគឺទារឡើង មួយជាពីរ។ ពីមុនបុគ្គលិកអ្នកបោសសំអាត ទទួលបានប្រាក់ខែ ៩០ ដុល្លារ ទៅ ១១៥ ដុល្លារ រីឯអ្នកបើកបរឡានដឹកសំរាម ទទួលបានប្រាក់ខែពី ១២០ ដុល្លារ ទៅ ១៥០ ដុល្លារ។
កូដកម្មរបស់បុគ្គលិកក្រុមហ៊ុនស៊ីនទ្រី ជាថ្មីនៅពេលនេះ បានកើតឡើង បន្ទាប់ពីក្រុមហ៊ុន មិនឲ្យអ្នកបើកបរ បូមប្រេងសាំង ដែលនៅសល់ពីឡានប្រមូលសំរាម ប្រមាណពី ៥ ទៅ ៦ លីត្រ ក្នុងមួយថ្ងៃ។
រហូតដល់ថ្ងៃទី១៦ធ្នូនេះ កម្មករផ្នែកបោសសំអាត អះអាងថា បុគ្គលិកក្រុមហ៊ុនស៊ីនទ្រីទាំងអស់ គ្រប់ផ្នែក បន្តមិនទៅធ្វើការ បន្ទាប់ពីក្រុមអ្នកបើកបរឡានដឹកសំរាម ផ្តើមធ្វើកូដកម្មមុនគេ។ រីឯការចរចារកដំណោះស្រាយ រវាងតំណាងកម្មករ និងថៅកែក្រុមហ៊ុន ស៊ីនទ្រី ក៏មិនទាន់ត្រូវរូវគ្នា នៅឡើយទេ។
លោក សេង សាវី អគ្គនាយកក្រុមហ៊ុនស៊ីនទ្រី មិនអាចទាក់ទងបានទេ នៅថ្ងៃទី១៦ធ្នូ។ ប៉ុន្តែតំណាងក្រុមហ៊ុនស៊ីនទ្រី បានប្រាប់អ្នកកាសែតថា ក្រុមហ៊ុន បានយល់ព្រមជាបណ្តោះអាសន្ន ឲ្យអ្នកបើកបរឡាន អាចបូមប្រេងនៅសល់ ដូចពេលមុន។ ប៉ុន្តែការទាមទារឡើងប្រាក់ខែពី ២០០ ដុល្លារ ទៅ ៣០០ ដុល្លារ ជាការទាមទារហួសពីលទ្ធភាពរបស់ក្រុមហ៊ុន។
យ៉ាងណាក៏ដោយ អាជ្ញាធររាជធានីភ្នំពេញ តាមរយៈលោក ឡុង ឌីម៉ង់ អ្នកនាំពាក្យ បានជំរុញឲ្យមានដំណោះស្រាយឲ្យបានឆាប់រហ័ស ព្រោះសំរាមតាមផ្លូវ ជាបញ្ហាមួយ កាន់តែកើនឡើង។ ក្នុងនោះ អាជ្ញាធរ មិនលូកដៃក្នុងជម្លោះផ្ទៃក្នុងក្រុមហ៊ុនស៊ីនទ្រីទេ តែទាំងក្រុមហ៊ុន និងទាំងបុគ្គលិកក្រុមហ៊ុនស៊ីនទ្រី កុំយកបញ្ហាសំរាម មកធ្វើជាចំណាប់ខ្មាំង។
វិធានការចំពោះមុខគំនរសំរាម ដោយសារតែបុគ្គលិកក្រុមហ៊ុនស៊ីនទ្រីធ្វើកូដកម្ម ត្រូវបានលោក ឡុង ឌីម៉ង់ បញ្ជាក់ថា អាជ្ញាធរបានប្រើប្រាស់រថយន្ត និងចាត់កម្លាំងសន្តិសុខតាមខណ្ឌនិមួយៗ ដើម្បីកើប ប្រមូល និងដឹកជញ្ជូនសំរាម យកទៅចាក់នៅទីលានចាក់សម្រាមដង្កោ។
កាលពីខែកុម្ភៈ និងខែកក្កដា ឆ្នាំ២០១៤ បុគ្គលិកក្រុមហ៊ុន ស៊ីនទ្រី បានធ្វើកូដកម្ម ទាមទារដំឡើងប្រាក់ខែ និងលក្ខខណ្ឌការងារមួយចំនួន។ កូដកម្មកាលណោះ នាំឲ្យសំរាមគរស្អុយរលួយ តាមផ្លូវ ក្នុងរាជធានីភ្នំពេញ ទំរាំតែថៅកែ និងបុគ្គលិកក្រុមហ៊ុនស៊ីនទ្រី ចរចាត្រូវរូវគ្នា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ