ក្រុមប្រឹក្សាធម្មនុញ្ញនឹងជំនុំជម្រះលើសំណុំរឿងយុទ្ធនាការម្រាមដៃស្អាត នៅពាក់កណ្តាលខែនេះ
តាមគម្រោងក្រុមប្រឹក្សាធម្មនុញ្ញនឹងបើកសវនាការជំនុំជម្រះលើសំណុំរឿងពលរដ្ឋ៣ នាក់ រស់នៅក្នុងខេត្តបាត់ដំបង ទាក់ទងយុទ្ធនាការម្រាមដៃស្អាត នៅថ្ងៃទី១៥សីហា។ ការជំនុំជម្រះធ្វើឡើងបន្ទាប់ពី ក្រុមប្រឹក្សាជំនុំជម្រះ របស់គ.ជ.ប កាលពីថ្ងៃពុធទី៨សីហា សម្រេចលើកលែង ការចោទប្រកាន់លើសកម្មជនបក្សប្រឆាំង២នាក់ ក្នុងចំណោម៥នាក់ ដែលតម្រូវឲ្យបង់ថ្លៃផាកពិន័យក្នុងម្នាក់១០លានរៀលទាក់ទងម្រាមដៃស្អាត។
ចុះផ្សាយនៅថ្ងៃ៖
លោក សំ សុគង់ មេធាវីតំណាងឲ្យពលរដ្ឋចំនួន៣នាក់បានអះអាងនៅថ្ងៃសៅរ៍នេះថា លោកមានក្ដីសង្ឃឹមចំនួនពីរ នៅពេលដែលសំណុំរឿងម្រាមដៃស្អាតនេះ ឡើងទៅដល់ដៃក្រុមប្រឹក្សាធម្មនុញ្ញ។ នោះគឺពលរដ្ឋម្នាក់នឹងទទួលបានការលើកលែង ការផាកពិន័យ១០លានរៀល និង២នាក់ទៀតក្នុងម្នាក់៥លានរៀល ប្រសិនបើការជំនុំជម្រះនផ្អែកតាមទិដ្ឋភាពច្បាប់។ តែបើការជំនុំជម្រះផ្អែកទៅលើ ទិដ្ឋភាពនយោបាយវិញសំណុំរឿងនេះ នឹងមានសង្ឃឹមស្ដួចស្ដើង ឬក៏មិនមានសង្ឃឹមសោះតែម្ដង។ នេះបើតាមលោកមេធាវី សំ សុគង់។
លោក ព្រហ្ម វិចិត្រអក្ខរា អគ្គលេខាធិការរងក្រុមប្រឹក្សាធម្មនុញ្ញ និងជាអ្នកនាំពាក្យក្រុមប្រឹក្សាធម្មនុញ្ញបានគូសបញ្ជាក់ថា ក្រុមប្រឹក្សាធម្មនុញ្ញ បានចាត់មន្ដ្រីជំនាញចុះធ្វើការស៊ើបសង្កេត និងស្រាវជ្រាវលើករណីនេះ បន្ទាប់ពីបានទទួលពាក្យបណ្ដឹង នៅថ្ងៃទី១០ ខែសីហា។ ហើយនៅពេលនេះស្ថាប័នកំពូលនេះ កំពុងពិនិត្យក្នុងក្របខ័ណ្ឌបច្ចេកទេស ដើម្បីដាក់ជូនក្រុមប្រឹក្សាធម្មនុញ្ញដែលជាអង្គជំនុំជម្រះ ដើម្បីពិនិត្យសម្រេចបន្ដទៀត។
អ្វីជាការកត់សម្គាល់ នៅក្នុងចំណោមពលរដ្ឋទាំង៥នាក់ ដែលត្រូវបានចោទប្រកាន់ថា មានជាប់ទាក់ទងនឹងយុទ្ធនាការម្រាមដៃស្អាតមុនការបោះឆ្នោតនេះគឺលោក ជា ជីវ ជា ប្រធានគណៈកម្មាការប្រតិបត្តិរបស់អតីតគណបក្សសង្គ្រោះជាតិប្រចាំខេត្តបាត់ដំបងនៅតែទទួលរងការផាកពិន័យចំនួន១០លានរៀនដដែល ខណៈបុគ្គល២នាក់ទៀតត្រូវបង់ថ្លៃផាកពិន័យក្នុងម្នាក់៥លានរៀល។
បើតាមលោក សំ សុគង់ នៅក្នុងសំណុំរឿងម្រាមដៃស្អាតនេះ ករណីខេត្តបាត់ដំបងធ្ងន់ធ្ងរជាងគេក្នុងចំណោមខេត្តឯទៀតដូចជាៈ សៀមរាប ព្រះសីហនុ ស្វាយរៀង និងកំពត ដោយខេត្តទាំងនេះបញ្ចប់ត្រឹម គ.ខ.ប ថ្នាក់ខេត្ត។ ប៉ុន្តែយ៉ាងណាក៏ដោយសម្រាប់ខេត្តកំពតក្រុមប្រឹក្សាជំនុំជម្រះ គ.ជ.ប នៅថ្ងៃសុក្រម្សិលមិញ បានសម្រេចលើកលែងការផាកពិន័យលើមនុស្ស៥នាក់ ដែលពាក់ព័ន្ធនឹងយុទ្ធនាការម្រាមដៃស្អាតនេះដែរ។ បើតាម គ.ជ.ប ការសម្រេចនេះ ធ្វើឡើងក្រោយពី គ.ជ.ប រកឃើញថា អ្នកទាំង៥ មិនបានបង្ហោះផ្សព្វ ផ្សាយពីយុទ្ធនាការម្រាមដៃស្អាតដោយខ្លួនឯងឡើយ។
គួររំឮកថា ជុំវិញសំណុំរឿងយុទ្ធនាការម្រាមដៃស្អាតនេះ ត្រូវបានអាជ្ញាធរទាញភ្ជាប់នឹងសកម្មភាពនៅក្រៅស្រុកដឹកនាំដោយលោក សម រង្ស៊ី ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ