សមាគម GMAC ស្នើដល់គណៈកម្មការអឺរ៉ុបពិចារណាចំពោះដំណើរការព្យួរ EBA ពីកម្ពុជា
សមាគមរោងចក្រកាត់ដេរនៅកម្ពុជាហៅកាត់(GMAC)ដែលតំណាងរោងចក្រកាត់ដេរសម្លៀកបំពាក់និងស្បែកជើងនាំចេញទាំងអស់ក្នុងប្រទេសកម្ពុជា កាលពីថ្ងៃទី២០ខែតុលាបានសរសេរ លិខិតមួយច្បាប់ ទៅកាន់លោកស្រី Cecilia Malmström ស្នងការពាណិជ្ជកម្ម នៃគណៈកម្មការអឺរ៉ុប ដោយរៀបរាប់ថាពីកិច្ចប្រឹងប្រែងរបស់ GMAC ក្នុងការផ្តល់បរិយាកាសវិនិយោគល្អរបស់ខ្លួននៅប្រទេសកម្ពុជា។ ការសរសេរលិខិតផ្លូវការនេះ ធ្វើឡើងខណៈដែលគណៈកម្មការអឺរ៉ុប បានសម្រេចដំណើរការព្យួរ EBA មកលើប្រទេសកម្ពុជា។
ចុះផ្សាយនៅថ្ងៃ៖
ស្តាប់ - ០២:១៦
សមាគម GMAC បានអំពាវនាវឲ្យលោកស្រី Cecilia Malmström មានចំណាត់ការយកចិត្តទុកដាក់ និងការសម្រេចប្រកបដោយការពិចារណា ហើយ GMAC ត្រៀមខ្លួនរួចជាស្រេចដើម្បីផ្តល់ការពិតបន្ថែមទៀតដល់លោកស្រី នៅពេលតម្រូវ ក្នុងអំឡុងដំណើរការតាមដានរបស់លោកស្រី។
នៅក្នុងលិខិត ដែលមានចុះហត្ថលេខាដោយ ខេន លូ អគ្គលេខាធិការសមាគមរោងចក្រកាត់ដេរនៅកម្ពុជា GMAC បានរៀបរាប់ថា ខ្លួនបានផ្តល់ការងារដោយផ្ទាល់ដល់ប្រជាពលរដ្ឋខ្មែរប្រមាណ ៧សែននាក់ ក្នុងនោះ៨៥ភាគរយជាស្ត្រីមេផ្ទះមកពីបណ្តាខេត្តជនបទ។ ប្រជាពលរដ្ឋ ២លាននាក់ ផ្សេងទៀត ក្នុងចំណោមប្រជាពលរដ្ឋ១៦លាននាក់ គឺពឹងផ្អែកលើវិស័យកាត់ដេរ និងដេរស្បែកជើងនេះ ហើយប្រាក់ខែជាង១៥០លានដុល្លារ ត្រូវបានចំណាយជារៀងរាល់ខែទៅលើកម្មករនៃវិស័យនេះ។
GMAC បានលើកឡើងនៅក្នុងលិខិតបន្ថែមទៀត អំពីការចូលរួមរបស់វិស័យកាត់ដេរ នៅក្នុងការជម្រុញសេដ្ឋកិច្ចជាតិកម្ពុជា ឲ្យមានការរីកចំរើន កាត់បន្ថយភាពក្រីក្រ និងលើកកម្ពស់សេដ្ឋកិច្ចគ្រួសាររបស់កម្មករ។
ជាងនេះទៅទៀត GMAC បានចាត់ទុកថាសហភាពអឺរ៉ុប ជាដៃគូពាណិជ្ជកម្មដ៏សំខាន់របស់កម្ពុជា ដោយជាង៤៦ភាគរយ នៃសម្លៀកបំពាក់ និងស្បែកជើងកម្ពុជាត្រូវបាននាំចេញទៅកាន់សហភាពអឺរ៉ុប។ ខណៈដែលមានការប្រកាសនាពេលថ្មីៗនេះ ដែលធ្វើឡើងដោយសហភាពអឺរ៉ុប ដែលបង្ហាញអំពីលទ្ធភាពក្នុងការព្យួរបណ្តោះអាសន្ននៃគម្រោងនាំចូលទំនិញគ្រប់ប្រភេទលើកលែងតែអាវុធ(EBA) សម្រាប់កម្ពុជា តែសមាគម GMAC នៅតែមានសុទិដ្ឋិនិយមថាវិស័យកាត់ដេរនឹងមិនស្ថិតនៅក្នុងការដាក់ទណ្ឌកម្មណាមួយ ឬមិនស្ថិតនៅក្នុងគោលដៅដាក់ទណ្ឌកម្មឡើយ។ នេះបើតាមការសរសេររបស់ GMAC។
បន្ថែមពីនេះ សមាគម GMAC ឲ្យដឹងទៀតថា ការព្យួរបណ្តោះអាសន្ននៃគម្រោង EBA ឬទណ្ឌកម្មឯកតោភាគីរយៈពេលខ្លីណាមួយអាចមានផលប៉ះពាល់អវិជ្ជមានរយៈពេលវែង ដល់ជីវិតរបស់កម្មករ និងគ្រួសាររបស់ពួកគេ។ ភាពរីកចម្រើនទាំងអស់ដែលកម្ពុជាសម្រេចបានក្នុងរយៈកាល២ ទសវត្សរ៍កន្លងមកនេះតាមរយៈកិច្ចខិតខំប្រឹងប្រែងពីភាគីពាក់ព័ន្ធទាំងអស់រួមទាំងដៃគូអភិវឌ្ឍន៍ដូចជា សហភាពអឺរ៉ុប អាចត្រូវបានបំផ្លាញយ៉ាងលឿន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ