រដ្ឋាភិបាល៖ ដំណើរការនីតិវិធីដក EBA គឺជារឿងអយុត្តិធម៌បំផុតសម្រាប់កម្ពុជា
ដំណើរការនីតិវិធីជាផ្លូវការដែលអាចដកជាបណ្តោះអាសន្នប្រព័ន្ធអនុគ្រោះពន្ធពីកម្ពុជា គឺជារឿងអយុត្តិធម៌បំផុត។ នេះគឺជាប្រតិកម្មរបស់រដ្ឋាភិបាលកម្ពុជាតាមរយៈក្រសួងការបរទេស កាលពីថ្ងៃម្សិលមិញ ឆ្លើយតបចំពោះសេចក្តីសម្រេចរបស់គណៈកម្មការអឺរ៉ុប។ សេចក្តីសម្រេចរបស់គណៈកម្មការអឺរ៉ុប ដែលកម្ពុជាមើលឃើញថានៅមានឱកាសសម្រាប់ពិគ្រោះយោបល់ ដោយសារនីតិវិធីនេះផ្តល់រយៈពេលលើសពីមួយឆ្នាំ មុនពេលសម្រេចថាដកEBA ឬក៏អត់។
ចុះផ្សាយនៅថ្ងៃ៖
ស្តាប់ - ០២:៤១
យោងតាមសេចក្តីថ្លែងការណ៍របស់ក្រសួងការបរទេសកម្ពុជា កាលពីថ្ងៃទី១២ ខែកុម្ភៈ រដ្ឋាភិបាលកម្ពុជាចាត់ទុកសេចក្តីសម្រេចចិត្តរបស់គណៈកម្មការអឺរ៉ុបថាជារឿងអយុត្តិធម៌បំផុត ខណៈដែលគណៈកម្មការនេះមិនអើពើចំពោះវិធានការជាក់ស្តែង និងវិឌ្ឍនភាពសំខាន់ៗ ជាច្រើន ដែលបានធ្វើឡើងដោយរដ្ឋាភិបាលកម្ពុជា និងការប្រកាន់ខ្ជាប់អនុសញ្ញាស្នូលរបស់អង្គការសហប្រជាជាតិ។
កាលពីថ្ងៃទី១២ ខែកុម្ភៈ សហភាពអឺរ៉ុបបានផ្តើមជាផ្លូវការនូវដំណើរការនីតិវិធី ដែលអាចព្យួរប្រព័ន្ធអនុគ្រោះពន្ធ (EBA) ពីកម្ពុជា ជាបណ្តោះអាសន្ន បន្ទាប់ពីប្រទេសនេះរងការចោទប្រកាន់ថាបានរំលោភបំពានសិទ្ធិមនុស្ស។ នីតិវិធីនៃការព្យូរប្រព័ន្ធអនុគ្រោះពន្ធ ដែលមានរយៈពេល ១៨ខែត្រូវរាប់ចាប់តាំងពីថ្ងៃទី១២ ខែកុម្ភៈនេះ ពោលគឺជាថ្ងៃដែលគណកម្មការអឺរ៉ុបចុះផ្សាយនូវសេចក្តីសម្រេចនៃនីតិវិធីនេះជាសាធារណៈ។
ក្រសួងការបរទេសកម្ពុជាក្នុងសេចក្តីថ្លែងការណ៍របស់ខ្លួនបានប្រើពាក្យធ្ងន់ៗថា គណៈកម្មការអឺរ៉ុបបានបិទភ្នែកនៅពេល ដែលប្រទេសជាច្រើន ដែលកំពុងតែទទួលនូវក្របខ័ណ្ឌអនុគ្រោះពន្ធរបស់សហភាពអឺរ៉ុបមិនបានអនុវត្តពេញលេញនូវអនុញ្ញាអន្តរជាតិ ប៉ុន្តែ ជាមួយនឹងរបៀបវារៈនយោបាយ គណៈកម្មការនេះបានដាក់បន្តុប និងរំពឹងនូវ ការអនុវត្តដ៏ល្អឥតខ្ចោះ នៃអនុសញ្ញាអន្តរជាតិពីកម្ពុជា។
សេចក្តីថ្លែងការណ៍កម្រាស់៣ទំព័ររបស់ក្រសួងការបរទេសបញ្ជាក់ថា គណៈកម្មការអឺរ៉ុបមិនបានបង្ហាញការគោរពចំពោះអធិបតេយ្យភាពរបស់កម្ពុជា នៅពេលដែលការទាមទារនានាទាក់ទងនឹង EBA គឺស្មើនឹងការជ្រៀតជ្រែកចូលទៅក្នុងការវិវត្តនយោបាយរបស់ប្រទេសមួយ។ ក្រសួងការបរទេសបន្តថា គណៈកម្មការអឺរ៉ុបមិនបានទទួលស្គាល់គុណសម្បត្តិរបស់រដ្ឋាភិបាលក្នុងការខិតខំប្រឹងប្រែង ដើម្បីបើកផ្លូវឲ្យថ្នាក់ដឹកនាំនៃអតីតគណបក្សសង្រ្គោះជាតិ១១៨រូប ចាប់ផ្តើមឡើងវិញដោយពេញលេញនូវជីវិតនយោបាយរបស់ពួកគេនោះទេ។
ចំណែកក្រសួងពាណិជ្ជកម្មវិញ កាលពីថ្ងៃទី១២ កុម្ភៈ ក៏បានចេញសេចក្តីប្រកាសព័ត៌មានដោយបញ្ជាក់ថា ការផ្តើមជាផ្លូវការនូវដំណើរការនីតិវិធី ដែលអាចព្យួរប្រព័ន្ធអនុគ្រោះពន្ធពីកម្ពុជា ជាបណ្តោះអាសន្ននេះ មិនមានន័យថាសហភាពអឺរ៉ុបចាប់ផ្តើមព្យូរប្រព័ន្ធអនុគ្រោះពន្ធភ្លាមៗ ឬជាស្វ័យប្រវត្តិនោះឡើយ តែជាពេលវលាដែលចាប់ផ្តើមបើកនីតិវិធីពិគ្រោះយោបាល់ជាផ្លូវការប៉ុណ្ណោះ។
ក្រសួងពាណិជ្ជកម្មបញ្ជាក់ថា រយៈពេលគិតចាប់ពីការចាប់ផ្តើមនៃនីតិវិធីនេះ រហូតដល់ការចូលជាធរមាននៃសេចក្តីសម្រេចចុងក្រោយណាមួយ មានចំនួន១៨ខែ គិតចាប់ពីថ្ងៃទី១២ ខែកុម្ភៈ ឆ្នាំ២០១៩។ យ៉ាងណាក៏ដោយក្រសួងពាណិជ្ជកម្មកម្ពុជាបានអះអាងថា ខ្លួននឹងរៀបចំកិច្ចពិភាក្សាតុមូល ជាមួយភាគីពាក់ព័ន្ធ ដើម្បីជជែកពីបញ្ហានេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ