មន្រ្តីជំនាញ៖ អគ្គិភ័យនៅដើមឆ្នាំ២០១៨កើតឡើងច្រើនជាងឆ្នាំកន្លងទៅ
យ៉ាងហោចណាស់មានក្មេងប្រុស២នាក់បានរងរបួសធ្ងន់ដោយការរលាកភ្លើងដែលបណ្ដាមកពីគ្រោះអគ្គិភ័យកើតឡើង នៅភ្នំពេញកាលពីប៉ុន្មានថ្ងៃមុននេះ។ករណីនេះត្រូវបានមន្ត្រីជំនាញសន្និដ្ឋានថានៅដើមឆ្នាំ២០១៨នេះ គ្រោះអគ្គិភ័យមានការកើនឡើងជាងដើមឆ្នាំ២០១៧ខណៈដែលឆ្នាំ២០១៧ អគ្គិភ័យកើតឡើងជាង៥០០ករណីនិងសម្លាប់មនុស្ស២២នាក់។
ចុះផ្សាយនៅថ្ងៃ៖ កែប្រែថ្ងៃទី៖
លោក នេត វត្ថា ប្រធាននាយកដ្ឋានគ្រប់គ្រងអគ្គិភ័យនៃក្រសួងមហាផ្ទៃបានកត់សម្គាល់ថា ទំហំអគ្គិភ័យកើតឡើងនៅខែមករាឆ្នាំ២០១៨នេះ កើនឡើងច្រើនបើធៀបនឹងដើមខែដូចគ្នាក្នុងឆ្នាំ២០១៧។ ជាក់ស្ដែងក្នុងរាជធានីភ្នំពេញ មួយថ្ងៃយ៉ាងហោចណាស់ក៏មានគ្រោះអគ្គិភ័យកើតឡើងជាមធ្យម ២ឬ៣ដងដែរ។ ក្នុងនោះនៅថ្ងៃទី១៥ខែមករា អគ្គិភ័យ បានឆាបឆេះផ្ទះប្រជាពលរដ្ឋ ចំនួន១៥ខ្នង ដែលជាប្រភេទសំណង់តូចៗ នាខណ្ឌសែនសុខ។ នៅក្នុងថ្ងៃដដែលនោះអគ្គិភ័យក៏បានឆេះផ្ទះពលរដ្ឋនៅជាន់ទី៣ នាខណ្ឌដូនពេញ បណ្តាលឲ្យក្មេង២នាក់រងរបួសធ្ងន់ត្រូវបានកម្លាំងសន្តិសុខខណ្ឌជួយសង្គ្រោះចេញពីភ្លើង និងបានបញ្ជូនទៅមន្ទីរពេទ្យ។
លោក នេត វត្ថា ចាត់ទុកករណីអគ្គិភ័យបណ្ដាលឲ្យក្មេងប្រុស២នាក់របួសធ្ងន់នេះ គឺជាករណីមួយកើតឡើងធ្ងន់ធ្ងរសម្រាប់ដើមឆ្នាំ២០១៨នេះ។ កុំថាឡើយនៅភ្នំពេញ តាមបណ្ដាលខេត្តក៏ដូចគ្នាដែរ ប៉ុន្តែកើតឡើងមិនសូវជាផ្ទូនៗ ដូចនៅភ្នំពេញពេកនោះទេ។ នេះបើតាមការបញ្ជាក់របស់លោក នេត វណ្ណថា ។
ដោយឡែកទាក់ទងគ្រោះអគ្គិភ័យកើតឡើងនៅឆ្នាំ២០១៧វិញ កើតឡើងជាង៥០០ករណី និងបានសម្លាប់មនុស្ស២២នាក់ ដែលចំនួនមនុស្សស្លាប់នេះមានការកើនឡើង ធៀបនឹងឆ្នាំ២០១៦ អគ្គិភ័យសម្លាប់មនុស្សចំនួន១៣នាក់។ ប៉ុន្តែផ្ទុយទៅវិញករណីឆេះនៅក្នុងឆ្នាំ២០១៦កើនឡើង តែករណីឆេះថយចុះនៅឆ្នាំ២០១៧។ ថយចុះក៏ដោយសារតែឥរិយាបថពលរដ្ឋមានការផ្លាស់ប្ដូរគឺប្រុងប្រយ័ត្នជាងពេលមុន។
ពលរដ្ឋមានវិធានការណ៍ទប់ស្កាត់ផ្ទាល់ខ្លួន តាមរយៈការបំពាក់ឧបករណ៍ពន្លត់អគ្គិភ័យដោយស្វ័យប្រវត្តិទុកនៅផ្ទះ។ ម្យ៉ាងទៀតក៏ដោយសារតែការអំណោយផលអាកាសធាតុមិនក្ដៅខ្លាំងនៅក្នុងឆ្នាំ២០១៧។ ជាមួយគ្នានេះបញ្ហាបណ្តាញអគ្គិសនីចាស់ៗ ស្ថានភាពសំណង់ដែលគេអនុញ្ញាតឲ្យសង់ មិនគោរពតាមបទដ្ឋាននគរូបនីយកម្ម គឺនៅជាបញ្ហាចំបងនៅឡើយ ដែលធ្វើឲ្យប៉ះពាល់អាយុជីវិត និង ខាតបង់ទ្រព្យសម្បត្តិ នៅពេលដែលអគ្គិភ័យកើតឡើងម្តងៗ ហើយពិបាកនឹងសង្គ្រោះពីផ្នែកជំនាញ។
តែទោះជាបែបនេះក្ដី លោក នេត វត្ថា បន្តស្នើឲ្យពលរដ្ឋមានការប្រុងប្រយ័ត្នដោយ ខ្លួនឯងឲ្យបានខ្ពស់ ព្រោះថា បើកាលណាមានការឆេះកើតឡើងហើយ ពលរដ្ឋនឹងរង ការ ខូចខាតគ្រប់រូបភាព៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ