អតីតតំណាងរាស្ត្របក្សប្រឆាំងស្វែងរកអន្តរាគមន៍ពីប្រមុខUNរឿងរំលាយបក្សសង្គ្រោះជាតិ
អតីតក្រុមតំណាងរាស្ត្របក្សសង្គ្រោះជាតិ បានសរសេរលិខិតស្វែងរកអន្តរាគមន៍មួយទៅកាន់លោក Antonio Guterres អគ្គលេខាធិការអង្គការសហប្រជាជាតិកាលពីថ្ងៃទី៣០ វិច្ឆិកា។ លិខិតនេះទើបបង្ហាញជាសាធារណៈនៅលើទំព័រហ្វេសប៊ុកលោកអេង ឆៃអ៊ាង អតីតអនុប្រធានបក្សសង្គ្រោះជាតិនៅថ្ងៃនេះ។ ក្នុងលិខិតនោះ អតីតក្រុមតំណាងរាស្ត្របក្សប្រឆាំងសុំឲ្យលោក Antonio Guterres ការពារលទ្ធិប្រជាធិបតេយ្យសេរីពហុបក្ស និងជំរុញឲ្យកម្ពុជាងាកទៅគោរពកិច្ចព្រមព្រៀងសន្តិភាពទីក្រុងបារីសឆ្នាំ១៩៩១ឡើងវិញ បន្ទាប់ពីបក្សសង្គ្រោះជាតិត្រូវបានរំលាយ។
ចុះផ្សាយនៅថ្ងៃ៖
ស្តាប់ - ០២:២៦
ដោយនៅតែតាំងខ្លួនថាជាតំណាងរាស្ត្រជាប់ឆ្នោតរបស់កម្ពុជា អតីតក្រុមតំណាងរាស្ត្រគណបក្សសង្គ្រោះជាតិបានបញ្ជាក់ប្រាប់លោក Antonio Guterres អគ្គលេខាធិការអង្គការសហប្រជាជាតិ ពីការរំលាយគណបក្សសង្គ្រោះជាតិ ក៏ដូចជាការយកកៅអីនៅក្នុងរដ្ឋសភារបស់ខ្លួនទៅចែកចាយឲ្យគណបក្សមិនជាប់ឆ្នោតដទៃទៀត។ ត្រង់ចំណុចនេះ អតីតក្រុមតំណាងរាស្ត្របក្សប្រឆាំងបានអះអាងថា ឆន្ទៈរបស់ប្រជាពលរដ្ឋខ្មែរត្រូវបានរំលោភបំពាន ហើយថា អង្គការនីតិបញ្ញត្តិរបស់កម្ពុជានៅពេលនេះ មិនអាចចាត់ទុកថាជាតំណាងស្របច្បាប់របស់ប្រជាពលរដ្ឋកម្ពុជានោះឡើយ។ ក្រៅពីនេះ អតីតក្រុមតំណាងរាស្ត្រក៏បានចង្អុលបង្ហាញលោក Antonio Guterres ដែរថា គណបក្សកាន់អំណាចរបស់លោកនាយករដ្ឋមន្ត្រីហ៊ុន សែន បានគំរាមកំហែងនិងបានបិទអង្គការសង្គមស៊ីវិល និងប្រព័ន្ធផ្សព្វផ្សាយមួយចំនួននាពេលកន្លងមក។
សម្រាប់អតីតក្រុមតំណាងរាស្ត្របក្សប្រឆាំង ទង្វើទាំងអស់នេះរបស់រដ្ឋាភិបាលខ្មែរ គឺបានបំពានទៅនឹងកិច្ចព្រមព្រៀងសន្តិភាពទីក្រុងបារីសឆ្នាំ១៩៩១។ ហេតុដូចនេះហើយ ពួកគេជំរុញឲ្យលោកអគ្គលេខាធិការអង្គការសហប្រជាជាតិធ្វើអ្វីគ្រប់យ៉ាងក្នុងដែនអំណាចរបស់គាត់ ដើម្បីជំរុញប្រទេសកម្ពុជាត្រឡប់ទៅគោរពគោលការណ៍ដែលមាននៅក្នុងកិច្ចព្រមព្រៀងសន្តិភាពទីក្រុងបារីស។ លើសពីនេះទៀត ពួកគេក៏សុំឲ្យ លោកAntonio Guterres រំលឹកដល់ប្រទេសជាហត្ថលេខីឲ្យជួយការពារ និងលើកស្ទួយលទ្ធិប្រជាធិបតេយ្យ សេរីពហុបក្ស និងការគោរពសិទ្ធិនៅមនុស្សកម្ពុជា។
លោកសុខ ឥសាន អ្នកនាំពាក្យគណបក្សកាន់អំណាចបានអះអាងថា លោកមិនជឿសោះឡើយថា អង្គការសហប្រជាជាតិធ្វើតាមការចង់បានរបស់អតីតក្រុមតំណាងរាស្ត្រគណបក្សប្រឆាំង។ មិនជឿ ដោយលោកសំអាងថា បញ្ហាទាំងអស់គឺជារឿងផ្ទៃក្នុងរបស់កម្ពុជា ដែលគ្មានច្បាប់ណាមួយឲ្យអង្គការសហប្រជាជាតិមកលូកដៃចូលនោះទេ។ បើតាមលោកសុខ ឥសាន លទ្ធិប្រជាធិបតេយ្យនៅកម្ពុជាមិនត្រូវការការពារឬពង្រឹងអ្វីទេ ព្រោះថា ពេលនេះរដ្ឋាភិបាលកម្ពុជាកំពុងតែពង្រឹងស្រាប់ហើយ គឺតាមរយៈការចាប់ខ្លួនជនប្រព្រឹត្តបទល្មើសផ្សេង។
ជាការកត់សម្គាល់ គិតត្រឹមពេលនេះ គេនៅមិនទាន់ឃើញមានការឆ្លើយតបបែបណាមួយពីលោកអគ្គលេខាធិការអង្គការសហប្រជាជាតិនៅឡើយទេ។ តែទោះជាយ៉ាងណា អតីតក្រុមតំណាងរាស្ត្រគណបក្សសង្គ្រោះជាតិសង្ឃឹមជឿជាក់ថា យ៉ាងហោចណាស់ការិយាល័យរបស់លោក Antonio Guterres អាចកោះប្រជុំប្រទេសហត្ថលេខីនៃកិច្ចព្រមព្រៀងសន្តិភាពទីក្រុងបារីស ដើម្បីដោះស្រាយវិបត្តិដែលកំពុងកើតឡើង និងរៀបចំផែនការសម្រាប់ឲ្យកម្ពុជាវិលត្រឡប់ទៅរកប្រព័ន្ធលទ្ធិប្រជាធិបតេយ្យសេរីពហុបក្សឡើងវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ