គបម៖វិធានការគន្លឹះ៣ចំណុចដើម្បីរក្សាEBA និងកែលម្អស្ថានភាពនយោបាយនៅកម្ពុជា
គណបក្សប្រជាធិបតេយ្យមូលដ្ឋានបានលើកឡើងពីវិធានការ៣ចំណុចសម្រាប់ឲ្យរដ្ឋាភិបាលកម្ពុជាធ្វើការពិចារណាដើម្បីរក្សាEBA និងកែលម្អស្ថានការណ៍នយោបាយនៅកម្ពុជា។ ការចេញសេចក្តីថ្លែងការណ៍លើកឡើងយ៉ាងដូច្នេះរបស់គណបក្សប្រជាធិបតេយ្យមូលដ្ឋាន គឺបន្ទាប់ពីប្រមុខរដ្ឋាភិបាលកម្ពុជាបានស្វែងរកការគាំទ្រពីប្រទេសមួយចំនួននៅតំបន់អឺរ៉ុបដើម្បីជួយកម្ពុជាក្នុងការបន្តបានភាពអនុគ្រោះពន្ធនាំទំនិញទៅអឺរ៉ុប(EBA)បន្តទៀត។
ចុះផ្សាយនៅថ្ងៃ៖
តាមរយៈសេចក្តីថ្លែងការណ៍ ថ្ងៃទី១៩តុលា គណបក្សប្រជាធិបតេយ្យមូលដ្ឋានផ្តល់គន្លឹះ៣ចំណុចដើម្បីរក្សាបាននូវភាពអនុគ្រោះពន្ធពីអឺរ៉ុប។ គន្លឹះចំនួន៣ចំណុច គឺទី១ ត្រូវផ្តល់សេរីភាពដល់លោក កឹម សុខា និងអ្នកនយោបាយឡើងវិញ។ ទី២.ធានាឲ្យគណបក្សនយោបាយទាំងអស់ រួមទាំងអង្គការសង្គមស៊ីវិល និងប្រព័ន្ធផ្សព្វផ្សាយ មានសេរីភាពពេញលេញ ក្នុងការបំពេញការងារ និងទី៣.គឺការធានាឲ្យមានការបោះឆ្នោតនៅឆ្នាំ ២០២២ និងឆ្នាំ២០២៣ ប្រកបដោយសេរី និងយុត្តិធម៌ ដោយមានការចូលរួមប្រកបដោយប្រសិទ្ធភាព ពីសហភាពអឺរ៉ុប ភ្នាក់ងារជាតិ និងអន្តរជាតិ ផ្សេងទៀត ក្នុងការកែទម្រង់ គជប និងការសង្កេតការបោះឆ្នោតជាដើម។
បើតាមសេចក្តីថ្លែងការណ៍របស់គណបក្សប្រជាធិបតេយ្យមូលដ្ឋាន ការកែលម្អស្ថានភាពតាមរយៈគន្លឹះទាំង៣ចំណុចនេះ គឺជាការចាប់ផ្តើមដ៍ល្អក្នុងការពង្រឹងកិច្ចសហការរវាង កម្ពុជា និងអឺរ៉ុប ដើម្បីធ្វើឲ្យប្រសើរឡើងនូវស្ថានភាពនយោបាយ និងសេដ្ឋកិច្ចនៅកម្ពុជា។
ការចេញសេចក្តីថ្លែងការណ៍លើកឡើងយ៉ាងដូច្នេះរបស់គណបក្សប្រជាធិបតេយ្យមូលដ្ឋាន គឺបន្ទាប់ពីគណបក្សនេះបានសង្កេតឃើញថា រដ្ឋាភិបាលកម្ពុជា បានបង្កើននូវការជួបជាមួយរដ្ឋាភិបាល ប្រទេសជាសមាជិកសហភាពអឺរ៉ុប ជាបន្តបន្ទាប់ ដូចជា អង់គ្លេស រួមទាំងការទស្សនកិច្ចរបស់រដ្ឋមន្ត្រីសំខាន់ៗទៅកាន់ប្រទេសអាល្លឺម៉ង់ និងទស្សនកិច្ចផ្លូវការរបស់នាយករដ្ឋមន្ត្រីកម្ពុជាទៅកាន់ប្រទេសឆែក ហុងគ្រី និងប៊ុលហ្គារីជាដើម ដោយរដ្ឋាភិបាលសង្ឃឹមថា ប្រទេសទាំងនេះ នឹងជួយគាំទ្រកម្ពុជា ដើម្បីរក្សា EBA ។
យ៉ាងណាក៏ដោយ អ្នកនាំពាក្យរដ្ឋាភិបាល លោក ផៃ ស៊ីផាន ឆ្លើយតបថា ការទាមទារឲ្យដោះលែង លោក កឹម សុខា គឺមិនទាន់អាចធ្វើទៅបានទេព្រោះមិនទាន់ចប់នីតិវិធីតុលាការ ខណៈការស្នើឲ្យអង្គការសង្គមស៊ីវិលមានសេរីភាពពេញលេញ គឺលោក ផៃ ស៊ីផាន អះអាងថា តម្រូវឲ្យអង្គការទាំងនោះត្រូវតែគោរពច្បាប់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ