GMAC ស្នើឲ្យមេសហជីពដកពាក្យបណ្តឹង
សមាគមរោងចក្រកាត់ដេរនៅកម្ពុជា បានចេញសេចក្តីថ្លែងការណ៍មួយកាលពីថ្ងៃព្រហស្បតិ៍ដោយទទូចឲ្យលោកប៉ាវ ស៊ីណា ប្រធានសហជីពចលនាកម្មករ បង្ហាញភ័ស្តុតាងផ្សេងទៀត ដែលអាចយកជាការបាន។ តាមរយៈភ័ស្តុតាងជាខ្សែអាត់សំឡេង ដែលស្តាប់មិនច្បាស់លោកប៉ាវ ស៊ីណា បានលើកឡើងកាលពីដើមសប្តាហ៍នេះថា លោករងការគំរាមសម្លាប់ដោយថៅកែរោងចក្រកាត់ដេរមួយចំនួននៅតំបន់ឧស្សាហកម្មពិសេសខេត្តស្វាយរៀង។
ចុះផ្សាយនៅថ្ងៃ៖
ស្តាប់ - ០១:៤៤
សមាគមរោងចក្រកាត់ដេរនៅកម្ពុជា (GMAC) បានស្នើសុំឲ្យលោកប៉ាវ ស៊ីណា ប្រធានសហជីពចលនាកម្មករ ផ្តល់ភ័ស្តុតាងរឹងមាំដែលបញ្ជាក់ថា គាត់ពិតជាបានទទួលរងការគំរាមសម្លាប់។ បើពុំនោះទេ សមាគមនេះ បានប្រាប់ឲ្យលោកប៉ាវ ស៊ីណា ត្រូវដកពាក្យចោទប្រកាន់ដ៏ធ្ងន់ធ្ងររបស់គាត់វិញជាកំហិត។
នៅក្នុងលិខិតរបស់ខ្លួនចុះថ្ងៃទី២៦កុម្ភៈម្សិលមិញ GMAC បានហៅភ័ស្តុតាងជាខ្សែអាត់ដែលមេសហជីពលោកប៉ាវ ស៊ីណា បានយកមកជាសំអាងក្នុងការចោទប្រកាន់ គឺមានភាពមិនច្បាស់លាស់ ពិបាកសន្និដ្ឋាន ពិបាកស្តាប់ គឺជាចរិកខ្វះការទទួលខុសត្រូវ និងមានចេតនា បង្ករឿង។
លោកប៉ាវ ស៊ីណា ដែលគេជឿថាកំពុងតែលាក់ខ្លួនដើម្បីសុវត្ថិភាពនោះ មកទល់ថ្ងៃសុក្រនេះមិនអាចទាក់ទងបានទេ ទាំងទូរស័ព្ទដៃ និងសហការីឬប្រព័ន្ធបណ្តាញសង្គមផ្សេងៗទៀតដែលលោកធ្លាប់ប្រើ សុទ្ធតែមិនដំណើរការទាំងអស់។
ទោះយ៉ាងនេះក្តី លោក អំ សំអាត ប្រធានផ្នែកបច្ចេកទេសស៊ើបអង្កេតអង្គការការពាសិទ្ធិមនុស្សលីកាដូ ថ្លែងថាលោកកំពុងតែតាមឃ្លាំមើលពីសុវត្ថិភាពរបស់លោកប៉ាវ ស៊ីណា យ៉ាងដិតដល់ ព្រមទាំងទទូចដល់សមត្ថកិច្ច ឲ្យមានការស៊ើបអង្កេតរឿងនេះ។ ការថ្លែងដូច្នេះគឺដោយសារតែ ប្រទេសកម្ពុជាធ្លាប់មានបទពិសោធន៍ម្តងរួចមកហើយ គឺការបាញ់សម្លាប់លោកជា វិជ្ជា មេដឹកនាំសហជីព មេដឹកនាំសហជីពសេរីកម្មករនៃព្រះរាជាណាចក្រកម្ដុជាដ៏ល្បីល្បាញកាលពីខែមករាឆ្នាំ២០០៤។
សូមរំលឹកថា លោក ប៉ាវ ស៊ីណា បានដាក់ពាក្យប្តឹងទៅសមត្ថកិច្ច ប្រឆាំងនឹងការគំរាមសម្លាប់ជីវិតលោកបន្ទាប់ពីលោកអះអាងថា ថៅកែរោងចក្រកាត់ដេរមួយចំនួននៅតំបន់ឧស្សាហកម្មពិសេស Manhattan ស្ថិតនៅខេត្តស្វាយរៀងមានគម្រោងការប្រមូលលុយគ្នាជួលឃាតករបាញ់សម្លាប់រូបលោក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ