ការភ្នាល់ពីដំណើរមាតុភូមិនិវត្តន៍លោក សម រង្ស៊ី៖ លោក ហ៊ុន សែន ប្រកាសធ្វើសាក្សី ខណៈលោក សម រង្ស៊ី មិនចាប់អារម្មណ៍
ការប្រកាសមាតុភូមិនិវត្តន៍របស់លោក សម រង្ស៊ី នៅថ្ងៃទី ០៩ វិច្ឆិកា បានក្លាយជាល្បែងភ្នាល់គ្នានិងមានការចាប់អារម្មណ៍ពីលោក ហ៊ុន សែន ផងដែរ។ សម្រាប់លោកនាយករដ្ឋមន្ត្រី ហ៊ុន សែន កាលពីម្សិលមិញ បានប្រកាសធ្វើជាសាក្សីឈរនៅខាងសមាជិកអង្គព្រោកប្រាជ្ញ។ ក្នុងនោះ អង្គព្រោកប្រាជ្ញ» គ្រោងរៃអង្គាសប្រាក់ពីពលរដ្ឋម្នាក់១ដុល្លារសម្រាប់គម្រោងវិលចូលស្រុករបស់ លោក សម រង្ស៊ី។ ចំណែក លោក សម រង្ស៊ី លើកឡើងថា មិនចាប់អារម្មណ៍ជាមួយល្បែងភ្នាល់គ្នានេះឡើយដោយអះអាងជាថ្មីថា នឹងវិលចូលស្រុកតាមការសន្យា ថ្ងៃ៩ខែវិច្ឆិកា ដដែល។
ចុះផ្សាយនៅថ្ងៃ៖
ជួនចំពេលលោក សម រង្ស៊ី ប្រកាសចូលស្រុកនៅថ្ងៃទី០៩វិច្ឆិកាខាងមុខ ក្រុមអង្គព្រោកប្រាជ្ញបានរៀបចំវេទិកានៃការភ្នាល់ដោយដាក់ថវិកា១លានដុល្លារ ដើម្បីចង់ដឹងថា លោក សម រង្ស៊ី វិលមកស្រុកវិញតាមការសន្យាឬអត់? ដើម្បីការភ្នាល់នេះ ក្រុមអង្គព្រោកប្រាជ្ញ មានបំណងរៃអង្គាសលុយម្នាក់១ដុល្លារពីពលរដ្ឋខ្មែរ ដើម្បីឲ្យគ្រប់១លានដុល្លារផ្ដល់ជូនលោក សម រង្ស៊ី នៅពេលដែលលោកមកដល់ប្រទេសកម្ពុជា។ តែយ៉ាងណា ការបង្កើតមូលនិធិរៃអង្គាស នឹងដំណើរការលុះត្រាមានការយល់ព្រមភ្នាល់ពីលោក សម រង្ស៊ី ដែរ។
គួរជម្រាបថា អង្គព្រោកប្រាជ្ញគឺជារណសិរ្សមួយក្រុមដែលដឹកនាំដោយ លោក ខាន់ សុវណ្ណ។ បើតាមស្ថានិបរូបនេះ អង្គព្រោកប្រាជ្ញតែងតែជជែកពីនេះពីនោះគ្រប់បញ្ហាសង្គម និងនយោបាយ។ ហើយអង្គព្រោកប្រាជ្ញមិនចំណុះឲ្យគណបក្សនយោបាយណាមួយឡើយ។ នេះបើតាម លោក ខាន់ សុវណ្ណ។
អ្វីគួរឲ្យកត់សម្គាល់ គម្រោងនៃការភ្នាល់របស់អង្គព្រោកប្រាជ្ញទទួលបានការចាប់អារម្មណ៍មុនគេពីលោកនាយករដ្ឋមន្ត្រី ហ៊ុន សែន ។ គឺតាមរយៈ Live Show របស់អង្គព្រោកប្រាជ្ញ លោកនាយករដ្ឋមន្ត្រី បានប្រកាសព្រមធ្វើសាក្សីលើការភ្នាល់នេះ។ ប៉ុន្តែទន្ទឹមនឹងធ្វើជាសាក្សីនៃការភ្នាល់នេះ លោកនាយករដ្ឋមន្ត្រី ហ៊ុន សែន បានបញ្ជាក់ថា វិធានការផ្លូវច្បាប់នឹងត្រូវអនុវត្តចំពោះលោក សម រង្ស៉ី។
ពីខាងលោក សម រង្ស៊ី វិញ។ ប្រធានអតីតគណបក្សសង្គ្រោះជាតិរូបនេះ បានលើកឡើងថា លោកមិនចាប់អារម្មណ៍ជាមួយនឹងការភ្នាល់គ្នា ដោយដាក់ប្រាក់១លានដុល្លារនេះឡើយ។ បន្ថែមលើនេះ លោកបានរិះគន់ចំពោះគំនិតផ្ដួចផ្ដើមក្នុងការភ្នាល់ចំពោះដំណើរវិលវិញរបស់លោកផងដែរ។ សម្រាប់លោក សម រង្ស៊ី ដំណើរមាតុភូមិនិវត្តន៍របស់លោក ដែលគ្រោងមកដល់កម្ពុជាវិញនៅថ្ងៃទី០៩វិច្ឆិកា ឆ្នាំ២០១៩នេះ នៅតែមានសុពលភាពដដែល ដោយគ្មានការកែប្រែណាមួយឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ