លោកហ៊ុន សែន បន្តវាយប្រហារអាមេរិក ខណៈមានការអំពាវនាវឲ្យមានការលុបបំណុល
លោកនាយករដ្ឋមន្ត្រីហ៊ុន សែន នៅថ្ងៃទី០១ខែថ្មីនេះ បានបន្តវាយប្រហារទៅលើអាមេរិកជុំវិញការឈ្លានពានទម្លាក់គ្រាប់បែកនៅកម្ពុជាកាលពីអំឡុងទសវត្សរ៍ទី៧០ និងបញ្ហាបំណុលដែលកម្ពុជាជំពាក់។ ការវាយប្រហារដោយមិនសំចៃមាត់នេះ ធ្វើឡើងស្របពេលដែលអាជ្ញាធរមីនកម្ពុជាបានអំពាវនាវដល់ប្រជាពលរដ្ឋនៅទូទាំងប្រទេសចូលរួមគាំទ្ររដ្ឋាភិបាលកម្ពុជា ដើម្បីទាមទារឲ្យអាមេរិកលុបបំណុលពីកម្ពុជា។
ចុះផ្សាយនៅថ្ងៃ៖
ស្តាប់ - ០២:២២
គឺនៅក្នុងសន្និសីទអន្តរជាតិថ្នាក់តំបន់អាស៊ីប៉ាស៊ីហ្វិកស្តីពីការអភិវឌ្ឍន៍កុមារតូចនៅក្នុងខេត្តសៀមរាប ប្រមុរដ្ឋាភិបាលកម្ពុជាលោកហ៊ុន សែន បានបន្តវាយប្រហារលើអាមេរិកជាថ្មីទៀតអំពីការទម្លាក់គ្រាប់បែករាប់សែនតោននៅកម្ពុជានិងការមកទាមទារលុយដែលកម្ពុជាបានជំពាក់ក្នុងទសរត្សរ៍៧។ លើកនេះ កាន់តែខ្លាំងជាងមុខទៅទៀត ដោយសារតែលោកនាយករដ្ឋមន្ត្រីខ្មែរមិនមែនបរិហារអាមេរិកត្រឹមតែករណីកម្ពុជាប៉ុណ្ណោះទេ គឺលោកថែមទាំងបរិហារអាមេរិករឿងឈ្លានពានប្រទេសគេផ្សេងដូចជា ស៊ីរី អ៊ីរ៉ាក់ និងលីប៊ីជាដើម ដែលបង្កឲ្យកុមារជាច្រើននាក់បានស្លាប់។ លោកក៏បានជំរុញឲ្យប្រទេសដទៃហ៊ាននិយាយការពិត កុំខ្លាចពួកចក្រពត្តិនិយមតទៅទៀត។ និយាយការពិតដូចជារូបលោកនេះផ្ទាល់តែម្តង ដែលលោកបានគូសបញ្ជាក់ថា ធ្វើឲ្យអាមេរិកាំងខ្លះមិនចូលចិត្តលោកទាល់តែសោះ។
សម្រាប់ប្រទេសកម្ពុជាវិញ លោកហ៊ុន សែន បានរិះគន់អាមេរិកខ្លាំងៗថា មកសម្លាប់គេហើយ មកប្រដៅគេថែមទៀត។ ជាមួយគ្នានេះ លោកនាយករដ្ឋមន្ត្រីបានសង្កត់ធ្ងន់ថា អាមេរិកបានយកគ្រាប់បែកមកទម្លាក់លើក្បាលខ្មែរ ហើយបែរជាត្រូវមកទារបំណុលថែមទៀត។ បើតាមលោកប្រមុខរដ្ឋាភិបាលខ្មែរ អាមេរិកក៏បានណែនាំដល់រូបិយប័ណ្ណអន្តរជាតិIMF កុំឲ្យកម្ពុជាខ្ចីលុយដោយសារតែបញ្ហាបំណុលដែលកម្ពុជាជំពាក់អាមេរិកនេះ។
ការរិះគន់ជាថ្មីរបស់លោកនាយករដ្ឋមន្ត្រីហ៊ុន សែននេះ ធ្វើឡើងស្របពេលដែលអាជ្ញាធរមីនកម្ពុជា បានអំពាវនាវដល់ប្រជាពលរដ្ឋនៅទូទាំងប្រទេសឲ្យចូលរួមគាំទ្រនិងទុកចិត្តរដ្ឋាភិបាលកម្ពុជា ដើម្បីទាមទារឲ្យអាមេរិកលុបបំណុលរបស់ខ្លួនចេញពីកម្ពុជា។ អាជ្ញាធរមីនកម្ពុជា ក៏ទាមទារឲ្យអាមេរិកទទួលខុសត្រូវចំពោះទង្វើទម្លាក់គ្រាប់បែករបស់ខ្លួនដែលបានសម្លាប់ប្រជាពលរដ្ឋអស់ជាច្រើននាក់ផងដែរ។ នៅថ្ងៃនេះដែរ មជ្ឈមណ្ឌលកំចាត់មីនកម្ពុជាហៅកាត់ថា ស៊ីម៉ាក់ ក៏បានរកឃើញគ្រាប់បែកប្រភេទMK82 ចំនួន៤គ្រាប់នៅក្នុងខេត្តកណ្តាល ដែលស៊ីម៉ាក់អះអាងថា ជាគ្រាប់បែកដែលទម្លាក់ដោយយន្តហោះអាមេរិក។
សូមបញ្ជាក់ថា កម្ពុជាបានខ្ចីលុយអាមេរិកចំនួនជិត៣០០លានដុល្លារចន្លោះពីឆ្នាំ១៩៧០-១៩៧។ បើគិតមកដល់បច្ចុប្បន្ននេះ ទាំងការ ទាំងប្រាក់ដើម បំណុលនេះបានកើតឡើងដល់ទៅប្រមាណជា៥០០លានដុល្លារហើយ។ កម្ពុជាតែងតែចង់ឲ្យអាមេរិកលុបបំណុលនេះ ឫបង្វែរទៅជាជំនួយសប្បុរសធម៌វិញ ព្រោះថា វាជាបំណុលដែលដាបដោយឈាមប្រជាពលរដ្ឋខ្មែរ ដោយសារតែការទម្លាក់គ្រាប់បែក២លាន៥សែនតោនរបស់អាមេរិកមកលើប្រទេសកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ