ជម្លោះផ្ទៃក្នុងមិនទាន់ដោះស្រាយ តែអគ្គលេខាធិការចេញលិខិតកោះប្រជុំ ត្រៀមធ្វើសមាជ ថ្ងៃ១២មីនា
រហូតមកដល់ពេលនេះ ជម្លោះផ្ទៃក្នុងរវាងលោកញឹក ប៊ុនឆៃ អនុប្រធានទី២ គណបក្សហ្វ៊ុនស៊ិនប៉ិច និងលោកសាយ ហាក់ អគ្គលេខាធិការថ្មី របស់គណបក្សហ្វ៊ុនស៊ិនប៉ិច មិនទាន់ដោះស្រាយនៅឡើយទេ។ ប៉ុន្តែលោកសាយ ហាក់ ក្នុងនាមអគ្គលេខាធិការប្រតិបត្តិ បានចេញលិខិតកោះប្រជុំរវាងថ្នាក់ដឹកនាំគណបក្សហ្វ៊ុនស៊ិនប៉ិច ខេត្ត រាជធានី ក្រុង ស្រុក និងឃុំសង្កាត់ នៅថ្ងៃទី៥មីនា។ ជាកិច្ចប្រជុំ ក្រោមអធិបតីភាពសម្តេចក្រុមព្រះនរោត្តម រណឫទ្ធិ ដើម្បីត្រៀមទៅរៀបចំសមាជ នៅថ្ងៃទី១២មីនា។
ចុះផ្សាយនៅថ្ងៃ៖
ស្តាប់ - ០២:០១
គម្រោងជំនួបរវាងសម្តេចក្រុមព្រះ នរោត្តម រណឫទ្ធិ និងលោកញឹក ប៊ុនឆៃ នៅថ្ងៃសៅរ៍ ទី២៨កុម្ភៈ ត្រូវបានលុបចោល។ កិច្ចប្រជុំនោះ ត្រូវបានគេរំពឹងថា ដើម្បីសម្របសម្រួលបញ្ហាផ្ទៃក្នុងគណបក្សហ្វ៊ុនស៊ិនប៉ិច រវាងលោកញឹក ប៊ុនឆៃ និងលោកសាយ ហាក់ ប៉ុន្តែលោកញឹក ប៊ុនឆៃ អះអាងថា សម្តេចក្រុមព្រះ បានព្យាយាមមិនជួបរូបលោកឡើយ។
ក្នុងពេលបញ្ហាផ្ទៃក្នុង មិនទាន់ដោះស្រាយ នៅពេលនេះ លោកសាយ ហាក់ អគ្គលេខាធិការប្រតិបត្តិ ដែលទើបតែងតាំងថ្មី បានចេញលិខិត កោះប្រជុំថ្នាក់ដឹកនាំហ្វ៊ុនស៊ិនប៉ិច តាមខេត្ត រាជធានី ក្រុង ស្រុក ខណ្ឌ និងឃុំសង្កាត់ នៅថ្ងៃទី៥មីនា។ កិច្ចប្រជុំ ដែលនឹងធ្វើឡើងក្រោមព្រះអធិបតីភាពសម្តេចក្រុមព្រះ នរោត្តម រណឫទ្ធិ ត្រូវបានគេអះអាងថា ដើម្បីត្រៀមឈានទៅធ្វើសមាជ នៅថ្ងៃទី១២មីនា។
សមាជគណបក្សហ្វ៊ុនស៊ិនប៉ិច នៅថ្ងៃទី១២មីនា ត្រូវបានគេអះអាងថា ដើម្បីប្តូររូបសញ្ញាគណបក្សហ្វ៊ុនស៊ិនប៉ិច រំលាយគណៈកម្មាធិការអចិន្ត្រៃយ៍ គណៈកម្មាធិការនាយក និងរចនាសម្ព័ន្ធដឹកនាំតាមខេត្តរាជធានី ក្រុង ស្រុក ខណ្ឌ និងឃុំសង្កាត់ របស់គណបក្សហ្វ៊ុនស៊ិនប៉ិច។
ក៏ប៉ុន្តែគម្រោងរៀបចំសមាជ ប្តូររូបសញ្ញាហ្វ៊ុនស៊ិនប៉ិច និងរចនាសម្ព័ន្ធដឹកនាំគណបក្សហ្វ៊ុនស៊ិនប៉ិចតាំងពីថ្នាក់លើ ដល់ថ្នាក់មូលដ្ឋានដូច្នេះ ត្រូវបានលោកញឹក ប៊ុនឆៃ ប្រកាសជាថ្មី នៅថ្ងៃអាទិត្យ ទី១មីនាថា លោកត្រូវការពារដាច់ខាតនូវរចនាសម្ព័ន្ធហ្វ៊ុនស៊ិនប៉ិច ដែលមានស្រាប់សព្វថ្ងៃ។ តាមលោកញឹក ប៊ុនឆៃ គឺគណៈកម្មាធិការអចិន្ត្រៃយ៍ គណៈកម្មាធិការនាយក ព្រមទាំងថ្នាក់ដឹកនាំហ្វ៊ុនស៊ិនប៉ិចខេត្តរាជធានី ក្រុង ស្រុក ខណ្ឌ និងឃុំសង្កាត់ នេះហើយ ដែលបានព្រមព្រៀងឲ្យលោក និងសម្តេចព្រះអនុជ រាជបុត្រី ទូលយាងសម្តេចក្រុមព្រះ មកធ្វើជាប្រធាន ដឹកនាំគណបក្សហ្វ៊ុនស៊ិនប៉ិច ឡើងវិញ។
លោកញឹក ប៊ុនឆៃ នៅតែទទូច ឲ្យមានកិច្ចប្រជុំរវាងថ្នាក់ដឹកនាំកំពូលហ្វ៊ុនស៊ិនប៉ិច ពិសេសរវាងរូបលោក និងសម្តេចក្រុមព្រះ ដើម្បីដោះស្រាយការមិនចុះសម្រុងគ្នានេះ។ នៅព្រឹកថ្ងៃអាទិត្យ ទី១មីនា លោកសាយ ហាក់ អគ្គលេខាធិការប្រតិបត្តិថ្មី មិនធ្វើអត្ថាធិប្បាយអ្វីទេ ដោយលោកអះអាងថា ជាប់រវល់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ