លោកគីម សុខ ញ៉ុកក្រដាសចូលត្រចៀកមិនស្ដាប់និងមិននិយាយក្នុងពេលសវនាការកាត់ទោសខ្លួន
តុលាការក្រុងភ្នំពេញនៅរសៀលនេះ បានបើកសវនាការលើសំណុំរឿងលោកគីម សុខ អ្នកឃ្លាំមើលបញ្ហាសង្គមនិងនយោបាយដែលចោទបក្សប្រជាជនថា ជាប់ព័ន្ធនឹងឃាតកម្មលោកកែម ឡី។ មុនសវនាការលើអង្គសេចក្តី តុលាការបានជំនុំជម្រះលើសំណើសុំកោះហៅដើមបណ្តឹងមកតទល់គ្នាក្នុងតុលាការ។ ការជំនុំជម្រះនេះ មានភាពតានតឹងយ៉ាងខ្លាំងដោយតុលាការច្រានចោលសំណើនេះ។ ចូលដល់សវនាការលើអង្គសេចក្តី លោកគីម សុខបានយកក្រដាសញ៉ុកត្រចៀកមិនស្ដាប់តែម្តង។ យ៉ាងណាក៏ដោយ តុលាការសម្រេចថា នឹងប្រកាសសាលក្រមនៅរសៀលថ្ងៃទី១០ ខែសីហាខាងមុខ។
ចុះផ្សាយនៅថ្ងៃ៖
សវនាការលើសំណុំរឿងលោកគីម សុខ របស់សាលាដំបូងរាជធានីភ្នំពេញ បានធ្វើឡើងជាពីរដំណាក់កាល។ ទីមួយ គឺជំនុំជម្រះលើសេចក្តីស្នើសុំកោះហៅដើមបណ្តឹងគឺលោកនាយករដ្ឋមន្ត្រីហ៊ុន សែន មកសួរតទល់គ្នានៅក្នុងតុលាការ។ គឺសវនាការរយៈពេលប្រមាណជា៣០នាទីនេះហើយ ដែលមានការតតាំងគ្នាយ៉ាងតានតឹងរវាងលោកកឹម សុខ មេធាវីរបស់លោក ជាមួយនឹងមេធាវីលោកហ៊ុន សែន តំណាងអយ្យការ និងចៅក្រម។
លោកជូង ជួងី មេធាវីលោកគីម សុខ បានលើកសំអាងហេតុនៃការចង់ឲ្យដើមបណ្តឹងមកតទល់គ្នាក្នុងពេលសវនាការថា គឺដើម្បីបញ្ជាក់ពីភាពស្មើគ្នានៅចំពោះមុខច្បាប់។ ម្យ៉ាងទៀត ជាប្រយោជន៍ដល់ការបកស្រាយច្បាប់ និងការកាត់សេចក្តីដោយយុត្តិធម៌។ ចំណែកលោកគីម សុខ ខ្លួនឯងវិញក្នុងសម្លៀកបំពាក់អ្នកទោសពណ៌ស្លាទុំ ក៏បានសង្កត់ធ្ងន់ថា ហេតុផលសំខាន់នៃសំណើនេះ គឺដើម្បីយុត្តិធម៌ និងស្មើភាពគ្នា។ លោកថា ត្រឹមលោកមេធាវីគី តិច មិនអាចដឹងរឿង និងឆ្លើយជំនួសលោកនាយករដ្ឋមន្ត្រីហ៊ុន សែនបានទាំងអស់ទេ។
លោកមេធាវីគី តិច បានតបទៅវិញថា លោកទទួលសិទ្ធិពីលោកហ៊ុន សែននៅក្នុងរឿងក្តីនេះ ដូច្នេះបើតាមច្បាប់គឺលោកហ្នឹងហើយ គឺជាដើមបណ្តឹងនោះ មិនចាំបាច់មានការវត្តមានលោកហ៊ុន សែនឡើយ។ លោកគី តិច បន្ថែមទៀតថា សូមឲ្យលោកគីម សុខ តទល់ឲ្យឈ្នះលោកទៅ ព្រោះថា បើឈ្នះលោកនឹងមានផលល្អសម្រាប់លោកគីម សុខក្នុងរឿងក្តីនេះ។ សម្រាប់លោកជួង ជូងីវិញ បើទោះបីលោកហ៊ុន សែន ផ្តល់សិទ្ធិដល់មេធាវីក្តី តែនៅតែអាចមកតទល់គ្នាក្នុងតុលាការបានដដែលដើម្បីជាការស្មើភាពគ្នា។ គឺនៅត្រង់ចំណុចនេះ លោកគី តិច បានចោទសួរថា ភាពស្មើគ្នាទាល់តែជនរងគ្រោះមកឈក្នុងក្រចកសេះដូចជនល្មើសឫ។ លោកថា មិនអាចស្មើគ្នារបៀបនេះបានឡើយ។
ជាការកត់សម្គាល់ លោកគីម សុខ មិនត្រូវបានអនុញ្ញាតឲ្យនិយាយបកស្រាយអីច្រើនទេ ខណៈលោកនៅតែចចេសចង់និយាយ និងលើកដៃចង់និយាយជាច្រើនដងក្តី។ នេះធ្វើឲ្យមានការប្រឈមមុខដាក់គ្នាជាមួយលោកចៅក្រមគី ឫទ្ធី ដែលតែងតែបញ្ជាឲ្យលោកគីម សុខឈប់និយាយនិងអង្គុយចុះជាច្រើនសារ។ ទង្វើនេះ ធ្វើឲ្យលោកគី តិចចោទលោកគីម សុខថា មានចរិតច្រងាងច្រងាងក្នុងចេតនាចង់ឈ្លោះជាមួយចៅក្រម។ ចុងបញ្ចប់នៃសវនាការនេះ លោកចៅក្រមបានសម្រេចបដិសេធសំណើរបស់លោកគីម សុខ។
មុនចូលសវនាការដំណាក់កាលទី២ លោកគីម សុខ ដែលត្រូវបានកម្រិតក្នុងការនិយាយស្តីមិនសប្បាយចិត្តទេហើយលោកបានទាមទារឲ្យចៅក្រមចេញសាលក្រមជាសាធារណៈអំពីការសម្រេចនេះ បើមិនដូច្នេះទេ លោកមិនចូលរួមបន្តសវនាការឡើយ។ បន្ថែមលើនេះ លោកគីម សុខ ក៏បានទាមទារសុំផ្លាស់ប្តូរចៅក្រមដែលកំពុងអង្គុយកាត់សេចក្តីនេះទៀតផង។
ដោយស្ដាប់តែហេតុផលរបស់លោកមេធាវីគី តិច និងលោកព្រះអាជ្ញារងសៀង សុខ លោកចៅក្រមមិនទទួលយកការទាមទារនេះទេ។ លោកចៅក្រមសម្រេចនេះ ដោយមិនបានស្ដាប់ហេតុផលពីលោកមេធាវីជួង ជូងីនោះឡើយ។ នេះធ្វើឲ្យលោកជួង ជូងី មិនពេញចិត្តហើយក្រោកដើរចេញតែម្តងដោយប្រាប់ទៅចៅក្រមថា លោកមិនអាចនៅបន្តចូលរួមក្នុងសវនាការដែលលោកហៅថា “ឡប់ឡែ”នេះបានទេ។ ចំណែកលោកគីម សុខ វិញ នៅតែព្យាយាមទាមទារមិនចូលរួម និងសុំឲ្យនាំលោកទៅពន្ធនាគារវិញ។ ប៉ុន្តែការព្យាយាមនេះគ្មានន័យឡើយគឺលោកចៅក្រមបានបញ្ជាឲ្យលោកនៅបន្តអង្គុយក្នុងសវនាការដោយមានប៉ូលីសពីរនាក់ផងអមសងខាង។
ដោយគ្មានជម្រើស លោកគីម សុខ បានបង្ខំចិត្តអង្គុយទាំងធុញថប់ និងបានហែកក្រដាសញ៉ុកចូលត្រចៀកទាំងពីរផងព្រោះមិនចង់ស្ដាប់ និងមិនព្រមនិយាយអ្វីទាំងអស់។ ទោះជាបែបនេះក្តី សវនាការនៅតែបន្តទៅមុខដដែលដោយមានតែចៅក្រមម្នាក់ តំណាងអយ្យការម្នាក់ និងមេធាវីដើមបណ្តឹងម្នាក់។ បន្ទាប់ពីចំណាយពេលប្រមាណជាជិតមួយម៉ោង លោកចៅក្រមគី ឫទ្ធី បានប្រកាសថា សាលក្រមកាត់លោកគីម សុខ នឹងប្រកាសនៅរសៀលម៉ោង២ និង៣០នាទី ថ្ងៃទី១០ ខែសីហា ឆ្នាំ២០១។ រីឯលោកគីម សុខ វិញ ពេលកំពុងត្រូវបានអនុរក្សពន្ធនាគារនាំចេញពីតុលាការ បាននិយាយឮៗដោយហៅសវនាការពេលនេះថា ជាសវនាការសិប្បនិមិត្ត ធ្វើឡើងដើម្បីផ្គាប់ចិត្តលោកហ៊ុន សែន តែប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ