ក្រសួងមហាផ្ទៃប្រកាសបិទបញ្ចប់ការទទួលពាក្យស្នើសុំជាជនបរទេស
ក្រសួងមហាផ្ទៃកាលពីពេលថ្មីៗនេះ បានប្រកាសបិទបញ្ចប់ការទទួលពាក្យស្នើសុំជាជនបរទេសអន្តោប្រវេសន្ត ឬបណ្ណស្នាក់នៅអន្ត្រៃយ៍ និងផ្អាកទទួលបណ្ដឹងតវ៉ានានា។ ចំណែកមន្ត្រីអង្គការសង្គមស៊ីវិលចាត់ទុកនីតិវិធីនេះថា គ្មានប្រសិទ្ធភាព ដោយសារជនបរទេសមួយចំនួនកំពុង រស់នៅជាមួយភាពមិនស្របច្បាប់ ប៉ុន្តែពួកគេមិនត្រូវបានបណ្ដេញចេញពីកម្ពុជាឡើយ។
ចុះផ្សាយនៅថ្ងៃ៖
ស្តាប់ - ០១:៥៩
ការបិទបញ្ចប់ការទទួលពាក្យស្នើសុំជាជនបរទេសអន្តោប្រវេសន្ត ឬបណ្ណស្នាក់នៅអន្ត្រៃយ៍នេះ ធ្វើឡើងបន្ទាប់ពីក្រសួងមហាផ្ទៃ ដកហូតឯកសារមិនប្រក្រតីជិត៤ម៉ឺនឯកសារ ពីជនអន្តោប្រវេសន៍ប្រមាណជាជិត២ម៉ឺនគ្រួសារ នៅក្នុងឆ្នាំ២០១៩នេះ។ ដូច្នេះការបិទបញ្ចប់ការទទួលពាក្យស្នើសុំជាជនបរទេសអន្តោប្រវេសន្ត ឬបណ្ណស្នាក់នៅអន្ត្រៃយ៍ គឺដើម្បីឲ្យការផ្ដល់សេវារដ្ឋបាលមានភាពល្អប្រសើរ សម្រាប់បម្រើសេចក្ដីត្រូវការចាំបាច់របស់សហព័ទ្ធជាខ្មែរ និងកូនរបស់ពួកគេបន្ទាប់ពីត្រូវបានអាជ្ញាធរដកហូតឯកសារ។
អាជ្ញាធរដែលត្រូវបាន ក្រសួងមហាផ្ទៃបានអង្កេតឃើញថា នៅមានភាពស្រពេចស្រពិលអំពីគោលការណ៍ច្បាប់ដែលនាំឲ្យមានភាពស្ទាក់ស្ទើរក្នុងការចេញលិខិតរដ្ឋបាល ឬលិខិតអត្រានុកូលដ្ឋានដល់សហព័ទ្ធជាខ្មែរដែលមានកូនជាមួយនឹងជនអន្តោប្រវេសន្ត។ នេះបើតាមសេចក្ដីជូនដំណឹងរបស់ក្រសួងមហាផ្ទៃ ចេញផ្សាយកាលពីថ្ងៃទី១ខែកក្កដា ដែលត្រូវបានផ្សព្វផ្សាយនៅថ្ងៃទី៥ខែកក្កដានេះ។
ចំណែក លោក សន ជ័យ ប្រធានអង្គការសម្ព័ន្ធគណនេយ្យភាពសង្គមកម្ពុជាលើកឡើងថា កម្ពុជាមានរឿងអាស្រូវច្រើនទាក់ទងភាពមិនប្រក្រតីក្នុងការចេញឯកសារអត្តសញ្ញាណឲ្យជនបរទេស។ ដូច្នេះការប្រកាសបិទបញ្ចប់ការទទួលពាក្យស្នើសុំជាជនបរទេសអន្តោប្រវេសន្ត លោកមិនរំពឹងថា មានប្រសិទ្ធភាពឡើយ ខណៈតួលេខស្ដីពីជនអន្តោប្រវេសន៍វៀតណាម និងការរស់នៅជាក់ស្ដែងមានភាពផ្ទុយគ្នាស្រឡះ។
បន្ទាប់ពីប្រកាសបិទបញ្ចប់ការទទួលពាក្យស្នើសុំជាជនបរទេសអន្តោប្រវេសន្ត ឬបណ្ណស្នាក់នៅអន្ត្រៃយ៍ និងផ្អាកទទួលបណ្ដឹងតវ៉ានានា ក្រសួងមហាផ្ទៃក៏បានណែនាំឲ្យអាជ្ញាធរពាក់ព័ន្ធចេញលិខិតរដ្ឋបាលនិងលិខិតអត្រានុកូលដ្ឋានទៅឲ្យសហព័ទ្ធខ្មែរ ដែលស្រ្តីឬបុរសខ្មែរមានប្ដីឬប្រពន្ធនិងកូនជាជនបរទេស។ មានន័យថា ចំពោះពលរដ្ឋខ្មែរទាំងពីរភេទ ដែលគាត់មានប្ដីឬប្រពន្ធ ជាជនបរទេសគឺមានសិទ្ធិទទួលបានលិខិតរដ្ឋបាល និងលិខិតអត្រានុកូលដ្ឋាន ដូចពលរដ្ឋដទៃទៀត ហើយចំពោះសហព័ទ្ធជាបរទេសអាចទទួលលិខិតកំណើតបានគ្រាន់តែបញ្ជាក់សញ្ជាតិរបស់គាត់តែប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ