កម្ពុជារំពឹងថា នឹងមានអ្នកចូលរួម១ម៉ឺននាក់ក្នុងព្រឹត្តការណ៍រត់ប្រណាំងនៅឆ្នាំ២០២០
មនុស្ស៦២០០នាក់ បានចូលរួមទិវារត់ប្រណាំងភ្នំពេញពាក់កណ្ដាលម៉ារ៉ាតុងអន្តរជាតិលើកទី៩នាថ្ងៃអាទិត្យនេះ។ លោក វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជាអះអាងថា អ្នកចូលរួមរត់ប្រណាំងភ្នំពេញពាក់កណ្ដាលម៉ារ៉ាតុងនៅឆ្នាំ២០១៩នេះ មានការកើនឡើងលើសការរំពឹងទុក។ ក្នុងនោះគណៈកម្មាធិការជាតិអូឡាំពិកកម្ពុជានឹងយកភាពជោគជ័យនិងចំណុចខ្វះខាតនៅក្នុងឆ្នាំ២០១៩នេះ ទុកជាបទពិសោធន៍ក្នុងការត្រៀមរៀបចំនៅឆ្នាំ២០២០ ដែលអាចនឹងមានអ្នកចូលរួម១ម៉ឺននាក់។
ចុះផ្សាយនៅថ្ងៃ៖
ថ្លែងប្រាប់វិទ្យុបារាំងអន្តរជាតិ RFI នៅថ្ងៃអាទិត្យនេះ លោក វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជាគូសបញ្ជាក់ថា ព្រឹត្តការណ៍រត់ពាក់កណ្ដាលម៉ារ៉ាតុងអន្តរជាតិលើកទី៩ នាថ្ងៃអាទិត្យនេះ ទទួលបានជោគជ័យ តាមរយៈកំណើននៃអ្នកចូលរួមយ៉ាងគំហុកលើវិញ្ញាសារត់ រយៈ ចម្ងាយ ១០ គីឡូម៉ែត្រ។ ហើយទន្ទឹមនឹងនោះ កំណើនជនបរទេសចូលរួមដល់ទៅជាង៥០០នាក់។
ទន្ទឹមនឹងជោគជ័យ អគ្គលេខាធិការគណៈកម្មាធិការជាតិអូឡាំពិក លោក វ៉ាត់ ចំរើន ទទួលស្គាល់ថា ព្រឹត្តការណ៍រត់ឆ្នាំនេះ ប្រឈមនឹងកង្វះមេដាយផ្ដល់ជូនជ័យលាភី ដែលមេដាយបំរុងទុកមានចំនួនជាង៤ពាន់មេដាយ ខណៈចំនួនអ្នកចូលរួមដល់ទៅជាង៦ពាន់នាក់។ ដូច្នេះហើយចំណុចខ្វះខាតនៅក្នុងឆ្នាំ២០១៩នេះ នឹងក្លាយជាបទពិសោធន៍ប្រុងប្រយ័ត្នក្នុងឆ្នាំ២០២០។ ឆ្នាំ២០២០ បើតាមការប៉ាន់ស្មាន នឹងមានអ្នកចូលរួមប្រមាណជា១ម៉ឺននាក់ ព្រោះគណៈកម្មាធិការជាតិអូឡាំពិក នឹងប្រារព្ធខួប១០ឆ្នាំនៃការរត់ប្រណាំងភ្នំពេញពាក់កណ្ដាលម៉ារ៉ាតុងអន្តរជាតិ។
លោក វ៉ាត់ ចំរើន បានឆ្លៀតឱកាសនេះ ផ្ញើសារដល់ជ័យលាភីដែលមិនទាន់ទទួលបានមេដាយ ឲ្យទៅទទួលយកមេដាយដោយផ្ទាល់បាននៅគណៈកម្មាធិការជាតិអូឡាំពិកកម្ពុជា។ សូមជម្រាបជូនថា ការរត់ប្រណាំងភ្នំពេញពាក់កណ្ដាលម៉ារ៉ាតុងអន្តរជាតិនៅភ្នំពេញនាថ្ងៃទី១៦ មិថុនានេះ ចែកចេញជាបីវិញ្ញាសាររួមមាន៖ ការរត់រយៈចម្ងាយ៣គីឡូម៉ែត្រជាលក្ខណៈគ្រួសារ ការរត់រយៈចម្ងាយ១០គីឡូម៉ែត្រ និងការរត់រយៈចម្ងាយ២១គីឡូម៉ែត្រពាក់កណ្ដាលអាជីព៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ