លោក មាជ សុវណ្ណារ៉ា៖ សំណុំរឿងក្តីរបស់លោក ជារឿងនយោបាយ
កាលពីព្រឹកថ្ងៃទី៤ ខែមីនានេះ តុលាការកំពូល បានបើកសវនាការលើបណ្តឹងនៅក្រៅឃុំរបស់សកម្មជនគណបក្សសង្គ្រោះជាតិ លោក មាជ សុវណ្ណារ៉ា។ បន្ទាប់ពីសវនាការរយៈពេល ៣០ នាទី ចៅក្រមបានប្រកាសថា សាលក្រមក្នុងសំណុំរឿងក្តីសុំនៅក្រៅឃុំរបស់លោក មាជ សុវណ្ណារ៉ា នឹងត្រូវប្រកាស នៅម៉ោង ៨ ព្រឹក ថ្ងៃទី១១មីនា។ ដោយឡែកនៅព្រឹកថ្ងៃទី៤មីនានេះ តុលាការកំពូល ក៏បានជំនុំជម្រះលើបណ្តឹងសុំនៅក្រៅឃុំលើសកម្មជនគណបក្សសង្គ្រោះជាតិ លោក អ៊ុក ពេជ្រសំណាង និងអតីតព្រះសង្ឃ សឺន ហៃ ផងដែរ។
ចុះផ្សាយនៅថ្ងៃ៖
ស្តាប់ - ០១:៥២
ក្នុងពេលឆ្មាំពន្ធនាគារ បណ្តើរចូលបន្ទប់សវនាការតុលាការកំពូល កាលពីព្រឹថ្ងៃទី៤មីនា លោក មាជ សុវណ្ណារ៉ា ប្រធានផ្នែកប្រព័ន្ធផ្សព្វផ្សាយរបស់គណបក្សសង្គ្រោះជាតិ បានថ្លែងទៅកាន់អ្នកកាសែតថា សំណុំរឿងក្តីរបស់លោកជារឿងនយោបាយ ដែលទាមទារឲ្យមានការចរចារវាងថ្នាក់ដឹកនាំគណបក្សប្រជាជនកម្ពុជា និងគណបក្សសង្គ្រោះជាតិ។
លោក មាជ សុវណ្ណារ៉ា បានលើកឡើងថា “ខ្ញុំគ្មានសង្ឃឹមថា បាននៅក្រៅឃុំ ក្រៅពីការកាត់ឲ្យមានទោស ហើយយើងអត់មានទោសអ្វីទេ។ អីចឹង សង្ឃឹមថា តុលាការនឹងរកយុត្តិធម៌ កុំឲ្យមានសំពាធចំពោះអ្នកនយោបាយ។ យើងសង្ឃឹមថា មេដឹកនាំនឹងចរចាពីបញ្ហានេះ បើសិនជាគ្មានការចរចា គ្មានសង្ឃឹមទេ ព្រោះអានេះ ជារឿងនយោបាយ។
បន្ទាប់ពីសវនាការរយៈពេល ៣០ នាទី ចៅក្រមតុលាការកំពូល បានប្រកាសថា សាលក្រមក្នុងសំណុំរឿងក្តីសុំនៅក្រៅឃុំរបស់លោក មាជ សុវណ្ណារ៉ា នឹងត្រូវប្រកាស នៅម៉ោង ៨ ព្រឹក ថ្ងៃទី១១មីនា។ ដោយឡែកនៅព្រឹកថ្ងៃទី៤មីនានេះ តុលាការកំពូល ក៏បានជំនុំជម្រះលើបណ្តឹងសុំនៅក្រៅឃុំលើសកម្មជនគណបក្សសង្គ្រោះជាតិ លោក អ៊ុក ពេជ្រសំណាង និងអតីតព្រះសង្ឃ សឺន ហៃ ផងដែរ។
លោក ជូង ជូងី មេធាវីការពារក្តី បានឲ្យដឹងថា នៅថ្ងៃទី២៥មីនា តុលាការសាលាដំបូងរាជធានីភ្នំពេញ នឹងបើកសវនាការលើអង្គសេចក្តីលើសំណុំរឿងសកម្មជនគណបក្សសង្គ្រោះជាតិ សរុប ១១ នាក់ រួមទាំងលោកមាជសុវណ្ណារ៉ា។
លោកមាជសុវណ្ណារ៉ា ដែលត្រូវបានចាប់ខ្លួនកាលពីថ្ងៃទី១១វិច្ឆិកា ឆ្នាំ២០១៤ ព្រមទាំងសកម្មជនគណបក្សសង្គ្រោះជាតិ សរុបចំនួន ១១ នាក់ ក្នុងនោះ ៥ នាក់ នៅក្នុងពន្ធនាគារ ត្រូវបានចោទប្រកាន់ពីបទបង្កអំពើហិង្សា ក្នុងពេលធ្វើបាតុកម្មរំដោះទីលានប្រជាធិបតេយ្យ រវាងបាតុករ និងក្រុមកងសន្តិសុខរាជធានីភ្នំពេញ កាលពីព្រឹកថ្ងៃទី១៥ ខែកក្កដា ឆ្នាំ២០១។ ជាបទចោទប្រកាន់ ដែលអាចប្រឈមមុខនឹងការផ្តន្ទាទោសដាក់ពន្ធនាគារ ពី ២២ ឆ្នាំ ៦ខែ ទៅ ៣៧ ឆ្នាំ និងពិន័យជាប្រាក់ពី ៥ លានរៀល ទៅ ១៥ លានរៀល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ